وبلىس اكىمى ومىرزاق شوكەەۆتىڭ باقىلاۋىنداعى توتەنشە جاعدايدىڭ سالدارىن جويۋ, قالپىنا كەلتىرۋ جۇمىستارى ماقتاارال اۋدانىنىڭ ورتالىعى مىرزاكەنت كەنتىندە وتكەن كەڭەيتىلگەن ماجىلىستە تالقىلاندى. وبلىستىق ءماسليحاتتىڭ حاتشىسى قايرات بالابيەۆ, Nur Otan پارتياسى وبلىستىق فيليالى توراعاسىنىڭ ءبىرىنشى ورىنباسارى بەيسەن تاجىباەۆ, وبلىستىق باسقارما باسشىلارى, جەتىساي, شاردارا, سارىعاش, كەلەس اۋدانى اكىمدەرىنىڭ ورىنباسارلارى قاتىسقان جيىندا نەگىزگى 5 ماسەلە قارالدى.
بۇگىندە اۋدانداعى ەۆاكۋاتسييالىق 8 بەكەتتە 996 ادام ورنالاسقان. ونىڭ 79-ى جاڭاتۇرمىس, 407-ءسى جەڭىس, 345-ءى فيردوۋسي, 165-ءى ورگەباس اۋىلدارىنىڭ تۇرعىندارى. بەكەتتەردە سانيتارلىق تالاپتاردى ساقتاۋ شارالارى قاراستىرىلىپ, اسپازدار كۇندەلىكتى مەديتسينالىق تەكسەرۋدەن وتكىزىلۋدە. «جەڭىس ەلدى مەكەنىندە 1 مىڭ دوللارعا 273 وتباسىنىڭ قۇجاتى قابىلدانىپ, وبلىستىق قارجى باسقارماسىنا تاپسىرىلدى. سونىمەن قاتار جالپى 323 وتباسىنىڭ 301-ىنەن قۇجات جيناقتالىپ, كارتوچكالارى تابىستالدى. جەڭىس ەلدى مەكەنىندە جالپى تۇرعىن ءۇي سانى – 257, سونىڭ ىشىندە 204 تۇرعىن ءۇيدىڭ قۇجاتى جينالىپ, ماقتاارال اۋداندىق قۇرىلىس بولىمىنە تاپسىرىلدى», دەدى شاردارا اۋدانى اكىمىنىڭ ورىنباسارى باۋىرجان شومپيەۆ.
وبلىستىق قۇرىلىس باسقارماسى باسشىسىنىڭ ورىنباسارى ءتاجىباي ەگەتاەۆ بۇگىندە مىرزاكەنت ماڭىنداعى جاڭا شاعىن اۋداندا قۇرىلىس قارقىندى جۇرگىزىلىپ جاتقانىن جەتكىزدى. زارداپ شەككەن الەۋمەتتىك نىساندار جاڭادان سالىنادى. ياعني فيردوۋسي جانە ورگەباس ەلدى مەكەندەرى مەن مىرزاكەنت كەنتىندە زاماناۋي فەلدشەرلىك-اكۋشەرلىك پۋنكتىنىڭ قۇرىلىسى مەن 1200 ورىندىق مەكتەپ, پوليتسيا تىرەك پۋنكتى جانە 280 ورىندىق بالاباقشا قۇرىلىسى باستالادى. بۇل ماقساتتا وبلىس اكىمدىگى رەزەرۆىنەن قارجى قاراستىرىلادى. بۇگىندە جەڭىس, جاڭاتۇرمىس, دوستىق ەلدى مەكەن تۇرعىندارىنىڭ كەلىسىمى بويىنشا مىرزاكەنت كەنتىندە 425 جەكە تۇرعىن ءۇيدىڭ قۇرىلىسى جۇرگىزىلۋدە. سونىڭ ىشىندە 235 تۇرعىن ءۇي مەملەكەتتىك بيۋدجەت ەسەبىنەن, قالعان 190 ءۇيدىڭ 150-ءى «ب.وتەمۇراتوۆ», 20-cى «ساليقالى ۇرپاق», 20-cى ء«بىز بىرگەمىز!» قورلارىنىڭ دەمەۋشىلىگىمەن سالىنۋدا. جالپى 839 تۇرعىن ۇيگە اككرەديتتەلگەن ساراپشىلار تاراپىنان تەحنيكالىق زەرتتەۋ جۇمىستارى جۇرگىزىلىپ, 623 ۇيگە قورىتىندى الىنعان. قازىرگى تاڭدا 188 ءۇيدىڭ ىرگەتاسى قۇيىلىپ, 73-ءىنىڭ قابىرعاسى كوتەرىلۋدە. سونداي-اق ءبىر ءۇيدىڭ شاتىرى جابىلۋدا. بۇل جۇمىستارمەن 37 مەردىگەر كومپانيا مەن 1334 قۇرىلىسشى اينالىسۋدا. ءماجىلىس بارىسىندا جاڭاجول اۋىلدىق وكرۋگى ورگەباس, فيردوۋسي اۋىلدارىن قالپىنا كەلتىرۋ جۇمىستارىنىڭ دا ەسەبى تىڭدالدى. «تۇركىستان» كورپوراتيۆتىك الەۋمەتتىك دامۋ قورىنىڭ توراعاسى جاندوس ورىنباەۆتىڭ ايتۋىنشا, بۇگىندە فيردوۋسي جانە ورگەباس اۋىلىنان 400 تونناعا جۋىق قوقىس شىعارىلعان. فيردوۋسيدە 100 ءۇي, ورگەباستا 55 باسپانا تولىعىمەن بۇزىلعان. سونداي-اق تۇرعىن ءۇي قۇرىلىسىنا ورگەباس اۋىلىنىڭ 156, فيردوۋسي اۋىلىنداعى 183 وتباسىنىڭ ارقايسىسىنا 17 ملن تەڭگەنىڭ 50 پايىزى, ياعني, 8,5 ملن تەڭگەسى تولىق اۋدارىلعان.
سۋ باسۋدىڭ سالدارىنان زارداپ شەككەن ازاماتتارعا تولەنەتىن وتەماقىلار تۋرالى بايانداعان وبلىستىق قارجى جانە اۋديت مەملەكەتتىك اكتيۆتەر باسقارماسىنىڭ باسشىسى ابدراحمان تاسىباەۆ زارداپ شەككەن تۇرعىندارعا ءا.ۋسمانوۆ قورىنان 5 ملن 202 مىڭ اقش دوللارى 5202 وتباسىنىڭ (30 420 ادام) ەسەپشوتىنا اۋدارىلىپ جاتقانىن جەتكىزدى. بۇگىندە بۇل قارجىنى 1308 وتباسى الىپ ۇلگەرىپتى. سونداي-اق تۇرعىندارعا 4638 بانك كارتاسىنىڭ 90 پايىزى تاراتىلىپ بەرىلگەن. ال 650 ملن تەڭگە ءار وتباسىنا ۇكىمەتتىڭ رەزەرۆىنەن 100 مىڭ تەڭگەدەن بەرۋ ماقساتىندا ءبولىنىپ وتىر. ول اۋدان اكىمدىگىنىڭ مالىمەتىنە سايكەس, 846 ءۇيدىڭ 6128 ادامىنا بەرىلەدى.
اۋىل شارۋاشىلىعى باسقارماسى باسشىسىنىڭ ورىنباسارى تۇرعانبەك وسپانوۆ سۋ تاسقىنى كەزىندە ماقتاارال اۋدانىنداعى 10 ەلدى مەكەننىڭ 994 اگروقۇرىلىمىنا تيەسىلى 5624,8 گەكتار ەگىستىك القابىنا زاقىم كەلگەنىن ايتىپ ءوتتى. سونىڭ بۇگىندە 1893,2 گەكتارى قايتا وڭدەلىپ, 1545 گەكتارىنا ءتۇرلى اۋىل شارۋاشىلىعى داقىلدارى ەگىلىپتى. سونداي-اق قازىرگى تاڭدا 22 ازاماتقا تيەسىلى 144 باس اۋىل شارۋاشىلىعى جانۋارلارى انىقتالىپ, وتەماقى تاعايىندالۋدا.
جيىن قورىتىندىسى بويىنشا توپان سۋدىڭ سالدارىن جويۋ باعىتىنداعى جۇمىستاردى كۇشەيتۋ, سونىڭ ىشىندە ەۆاكۋاتسيالىق بەكەتتەردىڭ, مىرزاكەنت ماڭىنداعى جاڭا شاعىن اۋدانداعى قۇرىلىس جۇمىستارىنىڭ قارقىنىن باسەڭدەتپەۋ, سۋ باسقان اۋىل تۇرعىندارىنىڭ وتەماقىلارىن تەزدەتىپ تولەۋ, ورگەباس, فيردوۋسي اۋىلدارىنداعى قالپىنا كەلتىرۋ جۇمىستارىن نازارعا الۋ قاجەتتىگى ايتىلدى.
تۇركىستان وبلىسى
