قوعام • 03 ماۋسىم، 2020

بوياۋ پەرنەسىنەن توگىلگەن پەرىشتە شىرىل

6 رەت كورسەتىلدى

«جانۋارلار – مەنىڭ دوستارىم» رەسپۋبليكالىق بايقاۋىنا ەلىمىزدىڭ تۇكپىر-تۇكپىرىنەن ءۇش مىڭنان استام ءوتىنىش كەلىپ تۇسكەن. جاس تالانتتار سۋرەت سالىپ قانا قويماي، سۇيىكتى جانۋارى تۋرالى ەسسە-جازبالارىن، بەينەماتەريالدارىن قوسا تاپسىرىپ، ۇلكەندەردى جانۋارلارعا قامقورلىق كورسەتۋگە، مەيىرىمدىلىك تانىتۋعا جانە ولاردى جاقسى كورۋگە شاقىرعان. 

سۋرەتتەردە: بالعىنداردىڭ بايقاۋعا جولداعان سۋرەتتەرى

ءساۋىردىڭ 1-نەن باستاۋ العان بايقاۋ ماۋسىمنىڭ سوڭىنا دەيىن جالعاسىن تاپپاق. بايگەگە قاتىسۋشى بالالاردىڭ ءبىرى ۇيىندەگى سۇيىكتى جانۋارىن فوتوعا تۇسىرسە، ەندى بىرەۋلەرى سىنىپ بولىپ ءوتىنىش جىبەرگەن. بايقاۋ شارتى بويىنشا بەينەماتەريال ءتۇسىرۋ مىندەتتى ەمەس، سوعان قاراماستان قيالىنا ەرىك بەرگەن كىشكەنتايلار جەر بەتىندەگى بۇكىل تىرشىلىك يەلەرىن كوز قاراشىعىنداي قورعاۋ كەرەكتىگىن شىرىلداپ تۇرىپ جەتكىزگەن. ەسسەلەر ىشىندە اڭشىلىقتى سىنعا العاندارى دا بار. ءبىر سوزبەن ايتقاندا، جاس ۇرپاق ءتىرى جانعا قيانات جاساۋعا بولمايدى دەپ دابىل قاعادى.

– ءۇپ-ۇلكەن جانە ەستيار ادامدار كىشكەنتاي عانا ءالسىز ءتورت اياقتىلاردى قالايشا قاڭعىتىپ جىبەرەتىنى مەنىڭ ميىما سىيمايدى، – دەپ جازىپتى ەسسەسىندە سارىوزەكتىك وقۋشى اقجان قايىربەكقىزى.

1

–تىم بولماسا ولاردى يەسى جوق جانۋارلارعا ارنالعان ورتالىققا وتكىزۋگە بولادى عوي. ادامگەرشىلىگىمىزدى جوعالتپاي، ءۇي جانۋارى مەن جەر بەتىندەگى بۇكىل حايۋاناتتاردى قورعايىقشى. جانە وتىنەرىم، ءۇيسىز قالعان جانۋاردىڭ جىلى ۇيا، سۇيىكتى قوجايىن تابۋىنا كومەكتەسەيىك، – دەسە، ون ءۇش جاسار گۇلسەزىم زاكىر ەسىمدى نۇر-سۇلتاندىق ءبۇلدىرشىن «جانۋارلاردى قورعايمىز!» تاقىرىبىنا سۋرەت جولداي وتىرىپ: «مەن بۇل سۋرەتىمدە الەمدە بولىپ جاتقان وزەكتى ماسەلەنىڭ ءبىرىن قوزعاپ وتىرمىن. جانۋارلاردى قورلاۋ – ۇلكەن قىلمىس. سەبەبى جانۋارلار – ءبىزدىڭ ءومىرىمىزدىڭ ايرىلماستاي ءبىر بولشەگى. ادامداردىڭ سالعىرتتىعىنان ءتورت اياقتى دوستارىمىز جەر بەتىنەن جويىلىپ بارا جاتىر. بۇنىڭ ءبارى ادامزاتقا قاتتى سوققى بولىپ ورالۋدا. وزىمشىلدىگىمىزدىڭ كەسىرىنەن ەشقانداي كۇناسى جوق جانۋارلار جويىلىپ قانا قويماي، تابيعات-انا دا ءتۇرلى اپاتتى باستان كەشۋدە. سوندىقتان تابيعاتتىڭ ءوزى – باعا جەتپەس بايلىعىمىز. مۇنى كوز قاراشىعىنداي قورعايىق!» دەپ جانايعايىن جەتكىزگەن.

بايقاۋ ەل پرەزيدەنتى قامقورلىعىمەن، بۇۇ قورشاعان ورتانى قورعاۋ باعدارلاماسىنىڭ دۇنيەجۇزىلىك قورشاعان ورتانى قورعاۋ كۇنى اياسىندا، ءبىلىم جانە عىلىم مينيسترلىگى، مادەنيەت جانە سپورت مينيسترلىگىنىڭ قولداۋىمەن، «بالالار  الەمدى بەينەلەيدى» قوعامدىق قورى، باس سەرىكتەس «Edu Stream» كومپانياسى مەن «ناستوياششي بۋراتينو» سەرىكتەستىگى قاتىسۋىمەن ءوتىپ جاتىر. رەسپۋبليكالىق بايقاۋدىڭ باس دەمەۋشىسى – «Edu Stream» وقۋ ورتالىعى.

سوڭعى جاڭالىقتار

NASA مارسكا قامداندى

تەحنولوگيا • كەشە

ۇقساس جاڭالىقتار