ايماقتار • 03 ماۋسىم، 2020

تۇركىستان: ازاماتتىق قورعاۋ كاپيتانى ەكى بالانى اجالدان امان الىپ قالدى

10 رەت كورسەتىلدى

تۇركىستان وبلىسى وتىرار اۋدانىندا توتەنشە جاعدايلار دەپارتامەنتى قىزمەتكەرى 11 جانە 14 جاستاعى ەكى بالانى اجالدان امان الىپ قالدى.

جازدىڭ باستالعانى ەندى، بىراق كۇننىڭ ىستىعى كوپشىلىكتى كولەڭكە ىزدەپ، وزەن-كولدى جاعالاۋعا ءماجبۇر ەتۋدە. وتىرارداعى وقيعا تۇسكى ۋاقىت كەزىندە ورىن العان. توتەنشە جاعدايلار دەپارتامەنتىنە بالالاردىڭ سۋعا شومىلىپ ءجۇرىپ، قيىن جاعدايعا تاپ بولعاندىعى جونىندە حابار كەلىپ تۇسكەن. شاقىرتۋ تۇسە سالىسىمەن دەپارتامەنت اۋداندىق ءبولىمىنىڭ مامانى، ازاماتتىق قورعاۋ كاپيتانى مەيرامحان كەمەلحانوۆ وقيعا ورنىنا جەدەل جەتىپ، 2 بالانى امان الىپ قالعان. اتا-انانىڭ قاراۋىنسىز قالعان بالالار شومىلۋعا تىيىم سالىنعان ايماقتا سۋعا تۇسكەن.

«بىزگە حابارلاسقان ازاماتتار بالالارىن تاپپاي جانە ولاردىڭ شومىلۋعا بارۋى مۇمكىن ەكەندىگىن ايتتى. قوڭىراۋ تۇسىسىمەن جەدەل ءىس-ارەكەتكە كوشتىك. سۇراستىرىپ، ىزدەستىرۋ بارىسىندا الگى بالالاردىڭ شومىلۋعا بولمايتىن جەرگە تۇسكەنى بەلگىلى بولدى. ناتيجەسىندە ولاردى دەر كەزىندە تاۋىپ، قۇتقارىپ الدىق. ءاربىر ادام سۋعا شومىلاتىن سۋ ايدىندارىنىڭ قاۋىپتىلىگى مەن ونىڭ ەرەكشەلىكتەرىن ءبىلۋى ءتيىس. سەبەبى، بەتون پليتالارمەن نەمەسە تاستارمەن جابىلعان ارنالاردا مۇك ءوسىپ، تايعاق بولادى. مۇنداي ارنادان شىعۋ قيىن. ءتىپتى جاتتىعىپ جۇرگەن ءجۇزۋشىنىڭ ءوزى مۇنداي قيىندىقتان شىعا الماي قالادى. سۋعا تۇسەر الدىندا سۋ ايدىنىن تەكسەرۋ كەرەك، شومىلۋعا تاڭدالعان ورىن قۇم جاعاسىندا جانە سۋعا ىڭعايلى تۇسۋگە مۇمكىندىك بولۋى كەرەك»، دەيدى دەپارتامەنت قىزمەتكەرى.

سونداي-اق ماماندار تۇرعىنداردى شومىلۋ كەزىندە ساقتىق شارالارىن قاتاڭ ۇستانۋعا شاقىرادى.

 

تۇركىستان وبلىسى

سوڭعى جاڭالىقتار

NASA مارسكا قامداندى

تەحنولوگيا • كەشە

ۇقساس جاڭالىقتار