سولتۇستىك قازاقستان وبلىسىنىڭ جامبىل اۋدانىندا اۋداندىق پروكۋراتۋرانىڭ كامەلەتتىك جاسقا تولماعان بالالاردىڭ قۇقىعىن قورعاۋ بويىنشا ۇتقىر توبى مەكتەپتەردىڭ ءبىرىنىڭ مۇعالىمىن جاۋاپكەرشىلىككە تارتتى. بۇل تۋرالى سولتۇستىك قازاقستان وبلىسى قاداعالاۋ ورگانىنىڭ ءباسپاسوز قىزمەتى حابارلادى.
پروكۋراتۋرا قىزمەتكەرلەرىنىڭ مالىمدەۋىنشە, ك. ءاسىمجانوۆا دەگەن مۇعالىم الگەبرا ساباعىندا وقۋشىلاردىڭ كوز الدىندا ءبىر وقۋشىنىڭ كەكىلىن قايشىمەن قيىپ, ماڭدايىنا قالاممەن «ەكىگە وقيتىن بالا» دەپ جازىپ قويعان. جانە ونى وشىرمەۋگە بۇيرىق بەرگەن.
«وسى جاعدايدان كەيىن بالا كەشكى 9-عا دەيىن اۋىلدان 1,5 شاقىرىم جەردەگى ورماندا جۇرگەن. ءوزىنىڭ بۇل ارەكەتىن ول سىنىپ جەتەكشىسىنەن قورقىپ, مەكتەپكە بارعىسى كەلمەيتىندىگىمەن تۇسىندىرگەن», - دەپ حابارلادى ءباسپاسوز قىزمەتىنەن.
وقۋشىلار پروكۋرورلارعا وسى وقيعادان كەيىن ەكى كۇننەن سوڭ سىنىپ جەتەكشىسىنىڭ بولعان جاعداي تۋرالى ولاردىڭ ەشكىمگە ءتىس جارماۋى تۋرالى سۇراعانىن ايتقان. ول ءۇشىن وقۋ جىلىنىڭ ءبىرىنشى توقسانىندا الگەبرا ءپانى بويىنشا بارىنە «بەس» قويۋعا ۋادە بەرگەن.
اۋدان پروكۋرورىنىڭ ۇيعارىمىنا سايكەس, مۇعالىمگە «ەڭبەك كودەكسىنىڭ» تالاپتارى قولدانىلىپ, ول جۇمىستان شىعارىلعان. ءدال سول كۇنى باۋمان ورتا مەكتەپتىڭ ديرەكتورى ك.قاراباەۆا دا قىزمەتىنەن الىنعان.
قۇرىش نۇرىمبەت.
