«مال شارۋاشىلىعى سالاسىندا 4% كولەمىندەگى تۇراقتى ءوسىم ساقتالىپ وتىر. جىل قورىتىندىسى بويىنشا جالپى ءونىم كولەمى 2,3 ترلن تەڭگەگە ءوستى. كرەديت بەرۋ جانە قوسىمشا سۋبسيديالاۋ ارقىلى ىسكە اسىرىلعان شارالار ءوز جەمىسىن بەردى. ماسەلەن, اۋىل شارۋاشىلىعى جانۋارلارى وسىمىندە وڭ سەرپىن بايقالىپ وتىر: ءىرى قارا مال مەن ۇساق مال 2,7%-عا, جىلقى 11,5%-عا, شوشقا 2,5%-عا, قۇس 1,6%-عا ارتتى», - دەدى س. وماروۆ.
ونىڭ ايتۋىنشا, 2019 جىلى قىزىل ەت ءوندىرۋ كولەمى 5,8%-عا, قۇس ەتىن ءوندىرۋ كولەمى 15,8%-عا ۇلعايدى. مەملەكەتتىك قولداۋدىڭ ارقاسىندا ءسۇت وڭدەۋ 7%-عا, ەت وڭدەۋ 8%-عا ارتتى. بۇل رەتتە ءسۇت زاۋىتتارىنىڭ جۇكتەمەسى 18%-عا, ەت كومبيناتتارىنىڭ جۇكتەمەسى 21,6%-عا ۇلعايدى.
«مال شارۋاشىلىعىن دامىتۋعا قازاگرو 2019 جىلى 156,5 ملرد تەڭگە باعىتتادى. قۇنى 53 ملرد تەڭگە بولاتىن 82 مىڭ باس ءىرى قارا مال اكەلۋ جانە 12,3 ملرد تەڭگەگە 374 مىڭ باس ۇساق مال ساتىپ الۋ قارجىلاندىرىلدى. سونداي-اق, قۇنى 19,1 ملرد تەڭگە بولاتىن 16 جاڭا ينۆەستيتسيالىق جوبا قارجىلاندىرىلدى. وسىلايشا, بۇدان بۇرىن قارجىلاندىرىلعان جوبالاردى ەسكەرگەندە, 2019 جىلى مال شارۋاشىلىعىندا جالپى قۇنى 64,3 ملرد تەڭگەگە 54 ينۆەستيتسيالىق جوبا ەنگىزىلدى», - دەدى مينيستر.
اعىمداعى جىلى 178 مىڭ ءىرى قارا مال باسىن (ىشكى اسىل تۇقىمدى ەمەس مالدى قوسا العاندا) جانە 250 مىڭنان استام ۇساق مالدى ساتىپ الۋدى قارجىلاندىرۋ جوسپارلانۋدا, سونداي-اق يمپورت الماستىرۋ شەڭبەرىندە 46 مىڭ توننا ءسۇت جانە 30 مىڭ توننا قۇس ەتىن ءوندىرۋ جوبالارىن ىسكە اسىرۋ كوزدەلگەن.
