جازدا قىزمەت كورسەتۋى كوزدەلگەن قالا سىرتىنداعى 23 ساۋىقتىرۋ لاگەرىنىڭ 8-ءى مەملەكەتتىك, 15-ءى جەكەمەنشىك. بيىل وبلىس بويىنشا 1-10 سىنىپ وقۋشىلارىنىڭ جالپى سانى – 416 086. ال 23 ساۋىقتىرۋ لاگەرى 32 مىڭنان استام بالانى قابىلداي الادى.
وڭىرلىك كوممۋنيكاتسيالار قىزمەتىندە وتكەن بريفينگتە وسىنداي دەرەكتەردى كەلتىرگەن وبلىستىق ادامي الەۋەتتى دامىتۋ باسقارماسىنىڭ باسشىسى راقىمبەك جولاەۆ تۇلكىباس اۋدانىنداعى «سامال» لاگەرىندە وبلىستاعى 5 بالالار ءۇيىنىڭ جەتىم جانە اتا-انا قامقورلىعىنسىز قالعان 250-گە جۋىق تاربيەلەنۋشىلەرى جاز بويى دەمالاتىنىن ءمالىم ەتتى. «سونداي-اق, ماقتاارال اۋدانىنداعى توتەنشە جاعداي ورىن العان ەلدى مەكەندەردەگى 820 وقۋشى 15 كۇننەن جازعى دەمالىسقا بارادى. ولار «بالداۋرەن-قاپشاعاي» جانە «بالداۋرەن-تۇركىستان» وقۋ-ساۋىقتىرۋ ورتالىعىنا, «سارىاعاش» بالالار ساناتوريىنە, اۋداندارداعى «بالداۋرەن», «قازىعۇرت», «بايشەشەك», «ەركەجان» ساۋىقتىرۋ لاگەرلەرىنە بارادى», - دەدى راقىمبەك قۋاتبەك ۇلى.
ال وبلىستاعى بالاباقشالار تەك اتا-انالاردىڭ سۇرانىسى مەن ءوتىنىشى نەگىزىندە ىسكە قوسىلادى. «بيىل وبلىستا 20 ناۋرىزعا دەيىن 1447 مەكتەپكە دەيىنگى ۇيىمدار جۇمىس ىستەدى. ونىڭ ىشىندە 1271 بالاباقشا, 176 مەملەكەتتىك شاعىن ورتالىق. وندا 1-6 جاستاعى 153 296 بالا تاربيەلەنۋدە. جالپى مەكتەپكە دەيىنگى ۇيىمدار ۇلەسىنىڭ 69%-ى جەكەمەنشىك. قاۋلىنىڭ №9 قوسىمشاسىندا مەكتەپكە دەيىنگى ۇيىمداردا اتا-اناسىنىڭ مىندەتتى جۇمىستا بولۋى شارت جانە بالالارىنا قاراۋشىسى جوق وتباسىلار ءۇشىن جۇمىس ىستەيتىن كەزەكشى توپتاردى اشۋ جانە كەزەكشى توپتارمەن جۇمىس جاساۋ الگوريتمى كورسەتىلگەن. سوندىقتان بالاباقشالاردا كەزەكشى توپتار اشىلۋى مۇمكىن», - دەدى باسقارما باسشىسى.
ايتا كەتەرلىگى, مەكتەپكە دەيىنگى ۇيىمدارداعى قىزمەتكەرلەردىڭ ەڭبەك جالاقىسى ساقتالا وتىرىپ, ۇيلەرىندە قاشىقتان جۇمىستارىن جالعاستىرۋدا, ال, كەيبىرى ءوز وتىنىشتەرى بويىنشا كەزەكتى ەڭبەك دەمالىسىندا.
تۇركىستان وبلىسى
