ونەر • 03 ماۋسىم، 2020

بىرەۋدىڭ تىككەن كيىمىن «ۇرلاپ»شىعارا المايسىڭ - ديزاينەر

96 رەت كورسەتىلدى

جادىرا ءامىرحانوۆا كيىم ديزاينى سالاسىنا نەبارى ەكى جىل بۇرىن عانا كەلدى. ستۋدەنت شاعىندا ۇلتتىق كيىم ديزاينەرلەرىنىڭ جاڭا ۇلگىلەرى كوپشىلىككە كورسەتەتىن سانگەر بوپ ەڭبەك ەتكەن. ماماندىعى ەكونوميست بولسا دا، بالا كەزىنەن اناسىنان كورگەنىن كوكىرەگىنە ءتۇيىپ وسكەن بويجەتكەننىڭ وزىنە بەيمالىم قىرى وتاۋ قۇرىپ، كىشكەنتايى ومىرگە كەلگەندە بەلگىلى بولدى. بالا كۇتىمىمەن ۇيدە وتىرعان سوڭ تىگىنشىلىكتى قولعا الا باستادى. الدىمەن شاعىن تىگىن شەبەرحاناسىن اشىپ، كۇندەلىكتى كيەتىن كويلەكتەر تىگۋگە كىرىسەدى. سونان سوڭ قولعا العان ءىسىن «Aisha bibi» ديزاينەرلىك كيىم سالونى رەتىندە كەڭەيتتى. بۇل اتاۋدى قازاقى، قۇلاققا جاعىمدى، جۇرەككە جىلى تيگەن سوڭ تاڭداپ قويعان. قازىر وندا 7 ادامدى تۇراقتى جۇمىسپەن قامتىپ وتىر.

ديزاينەرلىك كيىم تىگەتىن شەبەرحانادا تاپسىرىس تا تولاستاعان ەمەس. ايىنا شامامەن 20 ديزاينەرلىك كويلەك، 25-30 دانا بەش­پەنت، كاجەكەي، قامزول تىگىپ كەلەدى. قا­زاق­شا كيىمدەرمەن قاتار زاماناۋي، ءساندى كيىمدەر دە ۇيلەسىمىن تاۋىپ ەرەكشە ستيلدە تىگىلۋدە. توپتامالار شەبەرحانادان بولەك كيىم دۇكەندەرىندە ساۋدالانىپ جاتىر.

جادىراعا يدەيا مەن شابىت توسىننان كە­لە­دى ەكەن. كوبىنە شەتەلدەرگە ساپارلارعا شىق­قاندا، كەيدە، ءتىپتى الەۋمەتتىك جەلىلەردى اقتارعاندا تەڭدەسسىز ويلار كەلىپ، ديزاينداردى ۇيلەستىرۋ قابىلەتى شارىقتاي تۇسەدى.

ديزاينەرلىك كيىمدەردىڭ ماتالارى دا كوپ كەزدەسە بەرمەيتىن، ەرەكشە تاڭ­داۋ­مەن اكەلىنەدى. ماتالار مەن تىگىنگە قاجەت­­­­تى بولشەكتەر دۋباي مەن تۇركيادان تاسى­مالدانادى. باعالى ماتالار مەن تىڭ يدەيا­نىڭ قوسىلۋىنان قايتالانباس، ايرىقشا كيىمدەر تىگىلەدى.

– ديزاينەرلىك كيىمدەردىڭ ەرەكشەلىگى – كوشىرمە بولماۋى ءتيىس. بىرەۋدىڭ ساعان دەيىن تىككەن كيىمىنىڭ مودەلىن «ۇرلاپ» شىعارا المايسىڭ. جان-جاقتى ىزدەنىستىڭ، تولىققاندى يدەيالاردىڭ جەمىسى – جاڭا تۋىندى بولىپ شىعادى. بىرەۋدىڭ ويىن اينا قاتەسىز قايتا­لاۋ­دى تۇسىنبەيمىن. ءار ادام ءوز ديزايندىق شەبەرلىگىمەن، ءوز ءستيلى، ءوز ەرەكشەلىگىمەن تانىلۋى كەرەك، – دەيدى جادىرا ءامىرحانوۆا.

ادال ەڭبەك، توككەن تەر اقتالماۋى مۇمكىن ەمەس. جادىرانىڭ جۇمىستارى دا ۇلكەن ورتادا جاقسى باعالانىپ ءجۇر. نۇر-سۇلتان قالاسىندا وتكەن «ALTYN OIMAQ» كورمە-بايقاۋىنا ديزاينەرلىك كيىمدەرى قويىلدى. سونان سوڭ قىزىلوردا قالاسىندا وتكەن ء«سان مەن ساحنا» بايقاۋىنا قاتىسىپ، باس جۇلدەنى قانجىعاسىنا بايلاپ كەلدى. جادىرانىڭ يدەياسىمەن تىگىلگەن ۇلتتىق كيىمدەر، تۇيە جۇنىمەن سىرىلىپ سالىنعان جاداعايلار، قازاقى ناقىشتاعى اياق كيىمدەر كوپشىلىكتى ءتانتى ەتتى. ۇلكەن قوشەمەت پەن ماراپاتقا بولەنىپ كەلدى. مۇنداي قۋانىشتار ديزاينەردىڭ شابىتىنا شابىت قوسىپ، ديزاينەرلىك شەبەرحانانى ءسان ۇيىنە اينالدىرۋ تۋرالى وي كەلدى. قازىر ءسان ءۇيىنىڭ عيماراتى دايىن. ادام سانىن 15-كە دەيىن كوبەيتىپ، كۇزگە قاراي اشۋدى جوسپارلاپ وتىر. ۇلكەن ءسان ءۇيى كۇندەلىكتى ءستيلدى كيىمدەر مەن سپورتتىق ۇلگىدەگى كوستيۋمدەر تىگۋدى قولعا الۋدى كوزدەپ وتىر.

 

ماڭعىستاۋ وبلىسى

 

سوڭعى جاڭالىقتار

ۇرى الىستان كەلمەپتى

ايماقتار • بۇگىن، 10:15

شاشتان شاحمات تاسىن جونادى

تانىم • بۇگىن، 07:44

ونلاين-سورەدە – ويلى كىتاپتار

رۋحانيات • بۇگىن، 07:42

دارىگەرلەرگە كولىك سىيلادى

وقيعا • بۇگىن، 07:17

سوڭعى پاتسيەنت ۇيىنە قايتتى

قوعام • بۇگىن، 07:05

جامانتاۋدى جوعالتىپ المايىق

رۋحانيات • بۇگىن، 06:50

سەنات دەپۋتاتتارى سايلاندى

سايلاۋ • بۇگىن، 06:48

ادەپتى ادەمى ۇستاز

رۋحانيات • بۇگىن، 06:47

ۇقساس جاڭالىقتار