سپورت • 02 ماۋسىم، 2020

بۇگىن «تارزاننىڭ» تۋعان كۇنى

15 رەت كورسەتىلدى

بۇگىن داڭقتى سپورتشى، ايگىلى اكتەر دجونني ۆايسميۋللەردىڭ تۋعان كۇنى. ول وسىدان 116 جىل بۇرىن، ياعني 1904 جىلدىڭ 2 ماۋسىمىندا قازىرگى رۋمىنيانىڭ تيميشوارا قالاسىندا دۇنيەگە كەلدى. 

بولاشاق جۇلدىزدىڭ تۋعانىنا جارتى جىل وتكەننەن سوڭ ونىڭ اتا-اناسى اقش-قا قونىس اۋداردى. بالا كەزىنەن ءتۇرلى اۋرۋعا شالدىققان دجوننيگە دارىگەرلەر جۇزۋمەن اينالىسۋعا كەنەس بەردى. سپورتتىڭ بۇل ءتۇرى ۇناعانى سونشالىق، ول مەكتەپتى تاستاپ، جۇزۋمەن تۇبەگەيلى شۇعىلداندى. ناتيجەسى وزدەرىڭىزگە ءمالىم. ۆايسميۋللەر 1924 جىلى پاريج جانە 1928 جىلى امستەردامدا وتكەن وليمپيا ويىندارىندا 100، 400 مەترلىك قاشىقتىقتار مەن 4ح200 مەترلىك ەستافەتالىق سايىستا بارلىعى بەس بىردەي باس جۇلدەنى قورجىنعا سالدى. اقش-تىڭ سۋ دوبى قۇراما كوماداسى ساپىندا وليمپيادانىڭ قولا مەدالىن جەڭىپ الدى. سونىمەن قاتار، 52 رەت اقش چەمپيونى اتانىپ، 67 الەمدىك رەكورد ورناتتى. دجونني جەڭىلمەگەن كۇيى ۇلكەن سپورتتان قول ءۇزدى.

حح عاسىردىڭ وتىزىنشى جىلدارى دجونني ۆايسميۋللەر كينوعا تۇسە باستادى. «تارزان» فيلم ارقىلى ول جاڭا قىرىنان تانىلدى. كۇللى الەمدە كورسەتىلگەن بۇل فيلم ارقىلى كەيىپكەرىمىز 2 ميلليون اقش دوللارى كولەمىندە ولجاعا كەنەلدى. سونىمەن قاتار، حالىق اراسىندا مول ابىروي جانە زور مارتەبەگە بولەندى. كەيىننەن تاعى كوپتەگەن فيلمدەردە ءتۇرلى رولدەردى سومدادى.  

دجونني 1984 جىلدىڭ 20 قاڭتارىندا 80 جاسقا قاراعان شاعىندا وكپە قابىنۋ دەرتىنەن قايتىس بولدى. داڭقتى سپورتشى، ايگىلى اكتەردىڭ دەنەسى ءوزىنىڭ ءوتىنىشى بويىنشا مەكسيكانىڭ اكاپۋلكو قالاسىندا جەر قويناۋىنا تاپسىرىلدى.   

سوڭعى جاڭالىقتار

NASA مارسكا قامداندى

تەحنولوگيا • كەشە

ۇقساس جاڭالىقتار