CNN ارناسى تاراتقان اقپاراتقا سۇيەنسەك, د.ترامپپەن بىرگە جۇبايى مەلانيا ترامپ پەن ۇلى باررون دا بۋنكەرگە جەتكىزىلگەن. اق ءۇي باسشىسىنىڭ مۇنداي قادامىنا بۇكىل ەلدە ءجۇرىپ جاتقان شەرۋلەر اسەر ەتتى. اسىرەسە اپتانىڭ اياعىندا ۆاشينگتوندا مىڭداعان نارازى اق ءۇي ماڭىنا جينالىپ, د.ترامپتىڭ اتىنا قارعىس جاۋدىرىپ, عيماراتقا قاراي كىرپىش, بوتەلكە لاقتىرعان. شەرۋشىلەردىڭ ەكپىنىنەن سەكەمدەنگەن «قۇپيا قىزمەت» وكىلدەرى پرەزيدەنت پەن ونىڭ وتباسىن پروتوكولعا سايكەس قاۋىپسىز كامەراعا اپارعان.
The New York Times گازەتىنىڭ حابارلاۋىنشا, اق ءۇي ماڭىنداعى ميتينگ كەزىندە د.ترامپ قاۋىپسىز بولمەدە وتىرىپ, تۋيتتەردەگى پاراقشاسىنا جازبالاردى قارشا بوراتىپتى. نارازىلاردىڭ ارەكەتىن زاڭسىزدىققا تەڭەگەن ول ەلدەگى دەموكراتتارعا دا ءتيىسىپتى. دەگەنمەن, اتالعان باسىلىم پرەزيدەنت اينالاسىنداعىلار شەرۋشىلەردىڭ ارەكەتى تىكەلەي د.ترامپقا باعىتتالماعانىن, كەرىسىنشە ەلدەگى ناسىلدىك بولىنۋگە بايلانىستى تۋىنداعانىن جەتكىزۋگە تىرىسقانىن كەلتىرەدى.
ەستەرىڭىزگە سالساق, اقش-تا قارا ءناسىلدى دجوردج فلويدتىڭ پوليتسيا قولىنان قازا تابۋىنا بايلانىستى حالىق شەرۋگە شىعىپ, كوشەلەردى قيراتىپ, توناپ, پوليتسيامەن قاقتىعىسىپ, بىرنەشە ادام جاراقاتتانعان-دى.
ميننەاپوليس قالاسىندا 25 مامىردا پوليتسيا قىزمەتكەرلەرى جالعان بانكنوت قولدانعان-قولدانباعانىن تەكسەرۋ ءۇشىن دجوردج فلويد ەسىمدى قارا ءناسىلدى ازاماتتى توقتاتادى. ول كولىكتەن شىعۋدان باس تارتقان. قۇقىق قورعاۋشىلار ونىڭ قولىنا كىسەن سالعاندا جاعدايى ناشارلاعانىن بايقاپ, اۋرۋحاناعا جەتكىزەدى. ايتسە دە, فلويد اۋرۋحاناعا جەتپەي دەمى ۇزىلەدى.
وسى وقيعادان كوپ ۇزاماي الەۋمەتتىك جەلىلەردە فلويدتى تۇتقىنداۋ ءساتى بەينەلەنگەن ۆيدەو تارادى. وندا پوليتسيا قىزمەتكەرى قارا ءناسىلدى ازاماتتى قىلقىندىرىپ, موينىن تىزەسىمەن باسىپ وتىرعانى بايقالادى. ۆيدەودا فلويدتىڭ بىرنەشە رەت «دەم جەتپەي بارادى!» ايقايلاپ, «مەنى ولتىرمەڭدەرشى» دەپ جالىنعانى ەستىلەدى.
وسى وقيعادان كەيىن فلويدتىڭ ولىمىنە قاتىسى بار 4 پوليتسيا قىزمەتكەرى جۇمىستان قۋىلسا, ونى قىلقىندىرعان دەرەك شوۆين ەسىمدى پوليتسەي تۇتقىندالعان. وعان كۇش قولدانىپ, بىراق قاستاندىقسىز ادام ءولتىردى دەگەن ايىپ تاعىلىپ وتىر.
فلويدتىڭ ولىمىنەن كەيىن اقش-تىڭ كوپتەگەن قالاسىندا الەۋمەتتىك تەڭسىزدىك پەن ناسىلشىلدىككە قارسى جاپپاي نارازىلىق شەرۋلەرى باستالعان-دى. بىرنەشە قالادا ميتين سوڭى تارتىپسىزدىككە ۇلاسقان. نارازىلىق بىلدىرۋشىلەر كوشەلەردە وت جاعىپ, ارنايى جاساق قىزمەتكەرلەرىنە تاس لاقتىرعان. نارازىلىق اكتسيالارىنا بايلانىستى ميننەاپوليس, ۆاشينگتون, لوس-اندجەلەس, مايامي, پورتلەند, سان-فرانتسيسكو, چيكاگو, اتلانت, يندياناپوليس, فيلادەلفيا سەكىلدى بىرقاتار قالادا كوممەندانتتىق ساعات ەنگىزىلدى. سونداي-اق اقش-تىڭ ۇلتتىق گۆاردياسى ءتارتىپتى ساقتاۋعا بەس مىڭ ساربازدى جۇمىلدىرعان. ولار ۆاشينگتون قالاسى مەن 15 شتاتتى ءوز قاراۋىنا العان.
