مەملەكەتتىك قىزمەت پەن سىبايلاس جەمقورلىققا قارسى ءىس-قيمىل تۋرالى زاڭناما تالاپتارىنىڭ ساقتالۋى جانە ارتىق جۇمىس ىستەۋ فاكتىلەرىن بولدىرماۋ باعىتىندا اتقارىلعان جۇمىستار تۋرالى ەسەپتەن كەيىن كەڭەس مۇشەلەرى بىرقاتار كەمشىلىكتەردى اتاپ ءوتتى.
وسى جىلدىڭ اقپان ايىندا پرەزيدەنت اكىمشىلىگىنىڭ, پرەمەر-مينيستر كەڭسەسىنىڭ جانە قر مەملەكەتتىك قىزمەت ىستەرى اگەنتتىگىنىڭ تاپسىرماسىنا سايكەس ايماعىمىزدا ارتىق جۇمىس ىستەۋ فاكتىلەرىن جويۋ ماقساتىندا مونيتورينگتىك توپتار قۇرىلعان. ولار قوعام وكىلدەرىمەن بىرلەسىپ ايماقتاعى 40-تان استام مەملەكەتتىك ورگاندا رەيد جۇمىستارىن جۇرگىزەدى. الايدا, وبلىستىق مەملەكەتتىك كىرىستەر دەپارتامەنتىندە مونيتورينگتىك توپ جۇمىسىنا كەدەرگى كەلتىرىلگەن.
وسى ماقساتتا قۇرىلعان مونيتورينگتىك توپ جاڭاقورعان اۋدانىنداعى مەملەكەتتىك ورگانداردا رەيد جۇرگىزۋ بارىسىندا اۋداندىق مەملەكەتتىك كىرىستەر باسقارماسىندا ۇستەمە جۇمىس ىستەۋ فاكتىلەرىن انىقتاعان.
مەملەكەتتىك كىرىستەر دەپارتامەنتىندە مەملەكەتتىك قىزمەتشىلەرگە تارتىپتىك جازا قولدانۋ ءتارتىبى ساقتالماعان. ءتىپتى ەڭبەك دەمالىسىنداعى قىزمەتكەرگە دە نەگىزسىز تارتىپتىك جازا قولدانىلعان. ال, قالالىق مەملەكەتتىك كىرىستەر باسقارماسىندا بوس مەملەكەتتىك اكىمشىلىك لاۋازىمعا كونكۋرس وتكىزۋدە كەمشىلىكتەر جىبەرىلگەن. اتالعان زاڭبۇزۋشىلىق بويىنشا, كونكۋرستىق كوميسسيانىڭ 5 مۇشەسىنە قر اقبتك-ءنىڭ 99-بابىنىڭ 1-بولىگىمەن اكىمشىلىك حاتتامالار تولتىرىلىپ, اكىمشىلىك ايىپپۇلدار سالىندى, - قر مەملەكەتتىك قىزمەت ىستەرى اگەنتتىگىنىڭ قىزىلوردا وبلىسىنداعى ادەپ جونىندەگى كەڭەسىنىڭ توراعاسى نۇرمان تالقانباەۆ.
ادەپ جونىندەگى كەڭەس مۇشەلەرى كۇن تارتىبىنە قويىلعان ماسەلەنى جان-جاقتى قاراپ, وبلىستىق مەملەكەتتىك كىرىستەر دەپارتامەنتى باسشىسىنا ءوزى باسقاراتىن مەكەمەدە قۇقىق بۇزۋشىلىقتاردىڭ, ارتىق جۇمىس ىستەۋ فاكتىلەرىنىڭ ورىن الۋ سەبەپتەرىنە تالداۋ جاساپ, ۇجىمدا تالقىلاۋ جۇرگىزۋدى جانە اتالعان بۇزۋشىلىقتاردى بولدىرماۋ باعىتىندا ءتيىستى شارالار قابىلداۋدى ۇسىندى.
مەملەكەتتىك كىرىستەر دەپارتامەنتىنىڭ ادەپ جونىندەگى ۋاكىلىنە ارتىق جۇمىس ىستەۋ, قىزمەتتىك اۆتوكولىكتى قىزمەتتەن تىس ماقساتتا پايدالانۋ جانە زاڭسىز سىيلىق الۋ, قوعامدىق ورىنداردا مورالدىق-ەتيكالىق نورمالاردى بۇزۋ سەكىلدى قۇقىقبۇزۋشىلىقتارعا تۇراقتى تۇردە پروفيلاكتيكالىق باقىلاۋ شارالارىن جۇرگىزۋ تاپسىرىلدى. ارتىق جۇمىس ىستەۋ فاكتىلەرىنە جول بەرگەنى ءۇشىن قىزىلوردا قالالىق جانە جاڭاقورعان اۋداندىق مەملەكەتتىك كىرىستەر باسقارمالارى باسشىلارىنىڭ تارتىپتىك جاۋاپكەرشىلىگىن قاراۋدى ۇسىنۋ ءبىراۋىزدان ماقۇلداندى.
