زيالى قاۋىم وكىلدەرى بۇل ماسەلەنى قاشاننان كوتەرىپ ءجۇر. دەگەنمەن بۇل سالاداعى زەرتتەۋلەردىڭ ءالى دە تولىق ەمەس ەكەنىن ەسكەرگەن ءجون. قازاقستانداعى قۋعىن-سۇرگىننىڭ ەرەكشەلىگى تولىققاندى انىقتالماعان. ياعني تولىق زەرتتەۋ مەن ساراپتاما جاسالماعان. ءبىزدىڭ ەلگە ءتان ەرەكشەلىكتەرى بەكىتىلمەگەن.
ءبىز قۋعىن-سۇرگىنگە ۇشىراعانداردىڭ جالپى ءتىزىمىن ءبىلىپ, سولاردى عانا اقتاپ الۋمەن شەكتەلمەۋىمىز كەرەك. سوتسىز, ناقتى قىلمىستىق ءىس جۇرگىزىلمەي, اتىلعان ازاماتتار قانشاما. ولاردىڭ سانى تۋرالى دەرەك تە جوق. ال ءدىنىن, ءدىلىن قورعايمىن دەپ جازىقسىز قۇربان بولعان ارىستارىمىز كوپ.
ەلدەن قۋىلعان ازاماتتاردى دا اقتاۋ كەرەك. ۇجىمداستىرۋ سالدارىنان تۋعان جەرىن تاستاپ كەتۋگە ءماجبۇر بولعان ازاماتتارىمىز ۇمىت قالدى. سول جىلدارى كوبى شەكارادان جاياۋ وتكەن, ازاپتى جولدا قايتىس بولعان جاندار دا كوپ. قازاقستانعا جەر اۋدارىلىپ كەلگەندەر اقتالدى دا, ال ەلدەن كەتكەندەر ءالى اقتالعان جوق.
تاۋەلسىزدىك ءۇشىن كۇرەسكەن قاھارماندارىمىزدى دا اقتاۋ ماڭىزدى. 1993 جىلى قابىلدانعان زاڭدا ولار تۋرالى ايتىلماعان. تاۋەلسىزدىك ءۇشىن كۇرەسكەندەردىڭ تالايى «تىڭشى», «حالىق جاۋى» دەگەن جالا جابىلىپ, سوتتالىپ كەتتى. بۇل جەردە ولاردى ساياسي تۇرعىدا اقتاپ الۋدىڭ ماڭىزدى ەكەنىن ەسكەرۋىمىز قاجەت. رەسپۋبليكانىڭ تۇكپىر-تۇكپىرىندە قۋدالاۋعا ۇشىراعاندار كوپ ەكەنى بەلگىلى. ايماقتا بولعاننان كەيىن كوپشىلىگىنىڭ ەسىمدەرى بەلگىسىز قالىپ قويدى.
ەل پرەزيدەنتىنىڭ ۇندەۋىن وقىعان زيالى قاۋىم وكىلدەرى مەملەكەت باسشىسىنا رازىلىعىن ءبىلدىرىپ جاتىر. ەڭ باستىسى, ساياسي قۋعىن-سۇرگىن قۇرباندارى ۇرپاقتارىنىڭ «وشكەنى جانىپ, ولگەنى تىرىلگەندەي» قۋانىشتى كۇيگە بولەندى. ولار ۇنەمى تاۋەلسىز قازاقستاننىڭ مۇددەسى, جەرى ءۇشىن كۇرەسكەن اتالارىمىز قاشان اقتالادى دەپ رەنجيتىن. ەندى قازاق حالقىنىڭ ازاتتىعى جولىندا قۇربان بولعانداردى اقتاۋ جۇيەلى جۇمىس ىستەۋى كەرەك.
سابىر قاسىموۆ,
قازاقستاننىڭ ەڭبەك سىڭىرگەن قايراتكەرى, «قاھارماندار» رەسپۋبليكالىق قوعامدىق قورىنىڭ پرەزيدەنتى
