اسكەري ىنتىماقتاستىققا جوعارى باعا

قازاقستان رەسپۋبليكاسىنىڭ مەملەكەتتىك حاتشىسى – سىرتقى ىستەر ءمينيسترى قانات ساۋداباەۆ استانادا ىسساپارمەن جۇرگەن اقش ورتالىق قولباسشىلىعىنىڭ قولباسشىسى گەنەرال دەۆيد پەترەۋسپەن كەزدەستى, دەپ حابارلادى ءسىم-ءنىڭ ءباسپاسوز قىزمەتى. تاراپتار قازاقستان مەن اقش اراسىنداعى ستراتەگيالىق ارىپتەس­تىك­تى كەڭەيتىپ جانە نىعايتۋعا قاتىستى ماسەلەلەردى تالقىلادى. بۇل ورايدا اسكەري ىنتىماقتاستىق جانە اۋعانستاندى وڭالتۋ ماسە­لەسى ماڭىزدى باعىت بولىپ تابى­لادى. اۋعانستاندا تۇراقتىلىققا جەتۋ ءۇشىن ەكى مەملەكەتتىڭ ىنتى­ماقتاستىعىن ودان ءارى دامىتۋدىڭ ماڭىزدىلىعى اتاپ ءوتىلدى. بۇعان  ايماقتىق, سونىمەن قاتار, عالام­دىق دەرجاۆالار دا مۇددەلى. “اۋعانستاندا تۇراقتىلىق ورنا­مايىنشا, بۇكىل ورتالىق ازياداعى تۇراقتىلىق جايلى ايتۋ مۇمكىن ەمەس”, – دەدى وسىعان بايلانىستى ق.ساۋداباەۆ. ءوز كەزەگىندە د.پەترەۋس اسكەري جانە جاپپاي قىرىپ-جويۋ قارۋىن تاراتپاۋ سالاسىنداعى ەكىجاقتى ىن­تىماقتاستىقتىڭ تابىستىلىعىن اتاپ ءوتتى. امەريكالىق اسكەري باسشى 2008-2012 ج.ج. ارنالعان اسكەري ىنتىماقتاستىقتىڭ ەكىنشى بەسجىلدىق باعدارلاماسى اياسىن­دا­عى قازاقستان مەن اقش اراسىن­دا­عى اسكەري ىنتىماقتاستىققا جو­عا­رى باعا بەردى. 2003-2008 ج.ج. ارا­لىعىنداعى قازاقستاندىق ساپەرلار­دىڭ بەسجىلدىق ءتيىمدى قىزمەتىنە شىنايى العىسىن بىلدىرە وتىرىپ, د.پەترەۋس قازاقستانعا اۋعانستان­دى وڭالتۋعا قوسقان ۇلكەن ۇلەسى ءۇشىن, سونىڭ ىشىندە 1000 اۋعان­دىق­قا قازاقستاندا بەيبىت سالالار بويىنشا ءبىلىم الۋ ماقساتىندا 50 ملن. اقش دول­لارىن بولگەنى ءۇشىن ريزاشىلىعىن جەتكىزدى. قازاقستان حالىقارالىق كۇش­تەر­دىڭ اۋعانستانداعى قاۋىپسىزدىككە جۇمساعان كۇش-جىگەرىن, 2001 جىلى باستالعان “قاجىماس بوستاندىق” وپەراتسياسىن ونىڭ ەڭ العاشقى كۇنىنەن قولداپ كەلەدى. اۋعانستاندى تۇراقتاندىرۋ قا­زاقستاننىڭ ەقىۇ-عا توراعالى­عىن­داعى نەگىزگى باسىمدىقتاردىڭ ءبىرى رەتىندە پرەزيدەنت نۇرسۇلتان نازارباەۆپەن ايقىندالعان. ءۇستى­مىز­دەگى جىلى جوسپارلانىپ وتىر­عان استانادا وتەتىن ۇيىم ساممي­تىنىڭ كۇن تارتىبىندەگى نەگىزگى تا­قى­رىپ­تاردىڭ ءبىرى وسى اۋعان ماسە­لەسىنە ارنالۋى ابدەن مۇمكىن.