رۋحانيات • 31 مامىر، 2020

قارىنداسىمدى قاسقىرلار جەپ كەتتى - مەكەمتاس مىرزاحمەت ۇلى

4083 رەت كورسەتىلدى

اشارشىلىق كۋاگەرى فيلولوگيا عىلىمدارىنىڭ دوكتورى، پروفەسسور مەكەمتاس مىرزاحمەت ۇلى «Egemen Qazaqstan» گازەتىنىڭ ۇيىمداستىرۋىمەن وتكەن قۋعىن-سۇرگىن جانە اشارشىلىق قۇرباندارىن ەسكە الۋ كۇنىنە ارنالعان «عاسىر زۇلماتى» اتتى ونلاين دوڭگەلەك ۇستەلىندە اناسى بالا كەزىندە ونى امان ساقتاپ قالۋ ءۇشىن قارىنداسىن قاسقىرلارعا قالدىرىپ كەتكەنى جايىندا ايتىپ بەردى.

«1932-1933 جىلدارى اشارشىلىق بولدى. اشتىقتان قينالعان سوڭ، ءتۇس كەزىندە جەزدەمىزدىڭ ۇيىنە قاراي جولعا شىقتىق. انام سوندا قارىنداسىمدى باۋىرىنا الىپ، مەنى قولىمنان جەتەلەپ، اشتىقتان بۇرالىپ ارەڭ ءجۇردى. جول ونبەي، اۋىلعا جاقىنداعان شاقتا قاس قارايىپ كەتتى. ءبىر كەزدە ءبىزدى 3 قاسقىر قاماپ، توپىراق شاشا باستادى. مەن قورىققانىمنان انامنىڭ ەتەگىنە تىعىلا باستادىم. انام تاياعىن كوتەرىپ، ايعايلاسا دا قاسقىرلار قايمىقپادى. سودان انام قارىنداسىمدى جەرگە قويىپ، مەنى ارقالاي جونەلدى. قاسقىرلار قارىنداسىما قاراي باس سالعان بولۋ كەرەك، شار ەتكەن  داۋسى ەستىلدى. ءبىز سول ۋاقىتتا امان-ەسەن قۇتىلىپ ۇلگەردىك. كەيىن بارىپ قاراساق، شاشىنان باسقا ەشتەڭە قالماپتى. بۇل قاسىرەت. اشارشىلىق كەزىندە ءار جەردە وسىنداي وقيعالار كوپ بولدى. مەن ونى ءوز كوزىممەن كوردىم»،- دەدى م. مىرزاحمەت ۇلى.

سونداي-اق ول اشارشىلىق جايىن قازاق تاريحشىلارى ءالى دە زەرتتەۋى قاجەت ەكەنىن ايتىپ ءوتتى.

بۇگىن «Egemen Qazaqstan» گازەتىنىڭ ۇيىمداستىرۋىمەن قۋعىن-سۇرگىن جانە اشارشىلىق قۇرباندارىن ەسكە الۋ كۇنىنە ارنالعان «عاسىر زۇلماتى» اتتى ونلاين دوڭگەلەك ۇستەل ءوتتى. 

9

9

 

سوڭعى جاڭالىقتار

ۇقساس جاڭالىقتار