اۋىل وكرۋگىنىڭ اكىمى مولدابەك بيتەمىروۆتىڭ ايتۋىنشا, جالپى ورگەباس اۋىلىندا 189 ءۇي بار. سونىڭ بۇگىندە 138-ءىنىڭ يەسىنە ۇكىمەت تاراپىنان 17 ملن تەڭگەنىڭ 50 پايىزى ياعني, 8,5 ملن تەڭگەسى تولىق اۋدارىلعان. قازىرگى ۋاقىتتا مۇندا 162 ءۇيدى بۇزۋ جانە 45 باسپانانىڭ ىرگەتاسىن قۇيۋ جۇمىستارىنا دايىندىق جۇرگىزىلۋدە. ورگەباس اۋىلىنان ءوز ءۇيىنىڭ قۇرىلىسىن العاش بوپ باستاعانداردىڭ ءبىرى – كامال ساپاروۆ. بۇگىندە ول ءۇيىنىڭ قابىرعاسىن جارتىلاي كوتەرىپ ۇلگەرگەن. «ۇكىمەتىمىزگە راقمەت, ۋادە ەتكەن 17 ملن تەڭگەنىڭ 8,5 ملن. تەڭگەسىن بەردى. سول قارجىعا قۇرىلىس ماتەريالدارىن ساتىپ الىپ, جۇمىستاردى باستاپ جىبەردىك. بارلىق قاجەتتى كومەكتەر بەرىلۋدە. تەك ەندى بىزگە قۇرىلىسشىلار قاجەتتىلىگى تۋىنداۋدا. اقشاسىن كەلىسىپ, جۇمىس ۇسىنا الامىز. ءۇي سالۋشىلار جەرگىلىكتى ءوزىمىزدىڭ اۋداننان بولسا, ءتىپتى جاقسى بولار ەدى», دەيدى كامال ساپاروۆ.
بۇدان بولەك, اۋىلدى كۇل-قوقىستان تازارتۋ, ءۇي بۇزۋ, اۋلا تازالاۋ جۇمىستارى دا قارقىندى جالعاسۋدا. بۇل جۇمىستارعا 175 ادام مەن 6 ارنايى تەحنيكا تارتىلعان.
تۇركىستان وبلىسى
