ايماقتار • 29 مامىر، 2020

پرەزيدەنت ءسوزى - ءبىز ءۇشىن ۇلكەن قولداۋ

46 رەت كورسەتىلدى

مەملەكەت باسشىسى قاسىم-جومارت توقاەۆتىڭ توراعالىعىمەن وتكەن  ۇلتتىق قوعامدىق سەنىم كەڭەسىنىڭ ءۇشىنشى وتىرىسىندا ادام كاپيتالىن دامىتۋ، ءبىلىم بەرۋ، دەنساۋلىق ساقتاۋ ماسەلەلەرى ورتاعا سالىنىپ، تالقىلاندى.

مەملەكەت باسشىسى قانداي دا مەملەكەت ءۇشىن ادام كاپيتالىنىڭ ماڭىزدىلىعىن اتاپ ءوتتى. ادام كاپيتالى – مەملەكەتتىڭ، ونىڭ ەكونوميكاسى مەن ونىڭ ەڭبەككە جارامدى ازاماتتارىنىڭ باسەكەگە قابىلەتتىگىن ارتتىرۋدىڭ قاجەتتى رەسۋرسى ەكەنى بەلگىلى. وسى تۇرعىدا ەلىمىزدىڭ ەكونوميكاسىنىڭ دامۋىندا اسا ماڭىزدى ءرول اتقاراتىن سالا ءبىلىم جانە عىلىم جۇيەسىنە توقتالىپ: «جاڭا احۋال ءبىلىم جانە عىلىم جۇيەسىن تۇبەگەيلى رەفورمالاۋدى تالاپ ەتىپ وتىر. ەندى بۇل سالانىڭ ماڭىزى ارتا تۇسەتىنى انىق. ءتىپتى ەكونوميكانىڭ ءوزى سوعان تاۋەلدى بولماق. ءبىز ءبىلىم مەن عىلىم سالاسىنىڭ بولاشاقتاعى ءرولىن ايقىن ءتۇسىنۋىمىز كەرەك. بۇكىل مەملەكەتتىك ساياساتتى سوعان سايكەس جۇزەگە اسىرامىز»- دەدى.

كەڭەس بارىسىندا قازىرگى تاڭدا قابىلدانعان ءبىلىم بەرۋدى جانە عىلىمدى دامىتۋدىڭ 2025 جىلعا دەيىنگى مەملەكەتتىك باعدارلاماسىنداعى رەفورمالار قايتا قارالىپ، ءبىلىم مەن عىلىمدى دامىتۋ ءۇشىن، ءبىلىم سالاسىنا بولىنەتىن قارجى 6 ەسە، عىلىمعا بولىنەتىن قارجى كولەمى 7 ەسە وسەتىنىن ايتتى. بۇل اسىرەسە وسى ماڭىزدى سالا قىزمەتكەرلەرى ءۇشىن اسا جاعىمدى جاڭالىق.

مەملەكەت باسشىسى ءاربىر باياندامالارىندا پەداگوگ مارتەبەسىنە كوتەرۋگە كوپ كوڭىل اۋدارادى. الداعى ءتورت جىلدا مۇعالىمدەر جالاقىسى ەكى ەسە ءوسىپ، ولارعا قولداۋ كورسەتىلەتىنى ايتىلدى. سونىمەن قاتار، ءبىلىم ساپاسىن ارتتىرۋ ماقساتىندا پەداگوگيكالىق وقۋ جوسپارلارىنىڭ 100 پايىز جاڭارتىلۋىن، ءىت-قۇزىرەتتەر، وقىتۋدىڭ زاماناۋي ادىستەرى مەن تەحنولوگيالارىن ەنگىزۋدى تاپسىردى. پەداگوگ مۇعالىمدەردى دايىندايتىن ارنايى جوعارى وقۋ ورىندارى بولۋ قاجەتتىلىگىن كوتەردى.

ەل ەكونوميكاسىن دامىتۋدا زاماناۋي، جان-جاقتى، كرەاتيۆتى ويلايتىن، ساپالى ءبىلىمدى مامانداردىڭ قاجەتتىلىگى بەلگىلى. وسىنداي مامانداردى دايىندايتىن ەلىمىزدەگى جوعارى وقۋ ورىندارى اراسىندا باسەكەلەستىكتى دامىتۋ، قارجىلاندىرۋ مەن باسقارۋ جۇيەسىن جەتىلدىرۋ قاجەتتىلىگى اتالىپ ءوتتى. ءبىلىم ساپاسىن جاقسارتۋ ءۇشىن ءبىلىم وردالارىنا تالاپ كۇشەيتىلمەك. بۇل ورايدا اكادەميالىق ادالدىق مادەنيەتىن ەنگىزۋ جانە ونى تاراتۋ ماڭىزدى بولماق. ادالدىق پەن قۇقىقتىق مادەنيەتتىلىكتى ناسيحاتتاۋ،  جاستار اراسىندا سىبايلاس جەمقورلىققا قارسى مىنەز-ق ۇلىقتىڭ ۇلگىسىن قالىپتاستىرۋ جانە جاڭا فورماتسياداعى سىبايلاس جەمقورلىققا قارسى قوزعالىستىڭ جاس وكىلدەرىن دايىنداۋ، جاستار بويىندا پاتريوتتىق رۋحتى، ازاماتتىق بەلسەندىلىكتى، قۇقىقتىق مادەنيەتتىلىكتى قالىپتاستىرۋ ءاربىر جوعارى وقۋ ورنى جۇمىسىنىڭ ماڭىزدى باعىتى بولۋى قاجەت.

مەملەكەت باسشىسى جوعارى ءبىلىمنىڭ قولجەتىمدىلىگىنە، مەملەكەتتىك ءبىلىم گرانتتارىن بولۋدە ۇمىتكەرلەردىڭ وقۋ جەتىستىكتەرىنە عانا ەمەس، الەۋمەتتىك جاعدايىنا دا نازار اۋدارۋدى تابىستادى. عىلىمي كادرلار دايىنداۋعا كوپ كوڭىل بولىنۋدە. دوكتورانتتاردىڭ ستيپەندياسىن 150 مىڭ تەڭگەگە دەيىن كوتەرۋدى، جاس عالىمدار ءۇشىن گرانتتار سانى الداعى 3 جىلدا 3 ملرد تەڭگەگە ارتاتىنى، جىل سايىن كەمىندە 100 جاس عالىمنىڭ شەت ەلدىك جەتەكشى وقۋ ورىندارىندا تاعلىمدامادان وتۋىنە قارجى ءبولۋدى قاراستىرۋدى تاپسىردى.

ء«بىلىم گرانتتارىنىڭ ورتاشا قۇنىن 340-420 مىڭ تەڭگەدەن 1 ميلليون تەڭگەگە دەيىن كوبەيتۋ تۋرالى شەشىم قابىلدادىق. ياعني، گرانت قۇنى ءۇش ەسە ارتادى. سول ارقىلى وقىتۋشىلاردىڭ جالاقىسىن كەزەڭ-كەزەڭمەن ارتتىرىپ، ۋنيۆەرسيتەتتەردىڭ ماتەريالدىق بازاسىن نىعايتۋعا بولادى. بۇل – ماڭىزدى قادام. ويتكەنى گرانت قۇنى 2011 جىلدان بەرى وسكەن جوق. ەلىمىزدىڭ 10 جوعارى وقۋ ورنى الەمنىڭ ۇزدىك 500 ۋنيۆەرسيتەتىنىڭ قاتارىنا قوسىلۋى كەرەك. جو­عارى ءبىلىم بەرۋ ساپاسىنىڭ نەگىزگى كورسەتكىشىنىڭ ءبىرى – وسى. بۇل مەجەگە 2025 جىلى جەتۋىمىز قاجەت. قوس ديپلومدى باعدارلامالاردى، ستۋدەنتتەردىڭ، جوعارى وقۋ ورىندارىنىڭ وقىتۋشى-پروفەسسورلىق قۇرامىنىڭ ىشكى جانە سىرتقى اكادەميالىق ۇتقىرلىعىنىڭ ءتۇرلى فورمالارىن دامىتقان ءجون. قازاقستاندىق ۋنيۆەرسيتەتتەردىڭ بازاسىندا شەتەلدىك جەتەكشى جوعارى وقۋ ورىندارىنىڭ كامپۋستارىن اشۋ كەرەك. 10 ۋنيۆەرسيتەتتە اكادەميالىق باسىمدىق دەپ اتالاتىن ستۋدەنتتەردىڭ تۇرۋىنا قاۋىپسىز ءارى جايلى ورتالىقتار قۇرىلۋى ءتيىس. الداعى 5 جىلدىڭ ىشىندە كەمىندە 90 مىڭ جاتاقحانا ورنى سالىنۋى كەرەك. جاتاقحانا وتە وزەكتى ءارى ومىرلىك ءمانى بار ماسەلە»، - دەدى مەملەكەت باسشىسى. سونىمەن قاتار، ۇكىمەت باسشىسى جوعارى وقۋ ورنى وقىتۋشىلارىنىڭ ەڭبەكاقىسىن كوبەيتۋ ماسەلەسىن قاراستىرۋى كەرەكتىگىن دە اتاپ ءوتتى.

مۇنىڭ ءبارى مەملەكەت تاراپىنان ءبىلىم مەن عىلىم سالاسىن رەفورمالاۋ مەن ءبىلىم ساپاسىن ارتتىرۋعا، جوعارى ءبىلىم سالاسىن دامىتۋعا  جاسالىپ جاتقان ۇلكەن قولداۋ دەپ قابىلدايمىز.

گۇلسارا دجولداسباەۆا،

Yessenov University،

«بيزنەس جانە قۇقىق» فاكۋلتەتىنىڭ دەكانى

اقتاۋ قالاسى

سوڭعى جاڭالىقتار

اراق اۋرۋدان ايىقتىرمايدى

كوروناۆيرۋس • كەشە

ۇقساس جاڭالىقتار