«تەستىلەۋگە قاتىسۋعا بارلىعى 14 972 ءوتىنىش كەلىپ ءتۇستى. ونىڭ ىشىندە 9047 ءوتىنىش جالپى ءبىلىم بەرۋ ۇيىمدارىنان بولسا, 5925 ورتا ارنايى وقۋ ورىندارىنىڭ تۇلەكتەرى. بيىل كەز كەلگەن ادام ۇبت Digital Agent قوسىمشاسى ارقىلى باقىلاي الادى. ەگەر ۇبت وتكىزۋ ەرەجەلەرىن بۇزۋ فاكتىسى انىقتالسا, Digital Agent ارقىلى فوتو/بەينە جازبانى تىكەلەي جىبەرە الادى نەمەسە 1414 جانە 1424 تەلەفوندارىنا حابارلاسا الادى. ۇبت-نىڭ وتكىزىلۋىن سىبايلاس جەمقورلىققا قارسى قىزمەت جانىنداعى ارنايى مونيتورينگتىك توپتىڭ مۇشەلەرى قاداعالايدى», – دەدى گۇلنار ەرمەكباەۆا.
ەسكەرتە كەتسەك, تەستىلەۋگە كىرۋ كەزىندە تاپسىرۋشى تۇلەكتە تىيىم سالىنعان زاتتار, ياعني سمارتفون, قاراپايىم تەلەفون, گادجەت, شپارگالكا تابىلسا, ول تەستىلەۋگە جىبەرىلمەيدى ءارى بيىل ۇبت-نى اقىلى نەگىزدە تاپسىرۋ قۇقىعىنان ايىرىلادى.
بريفينگ كەزىندە سپيكەر ۇلتتىق بىرىڭعاي تەستىلەۋ مەديتسينالىق-سانيتارلىق نورمالار ەرەجەلەرىن تولىق ساقتاي وتىرىپ وتكىزىلەتىنىن ايتتى. سونداي-اق كارانتيندىك جاعداي مەن ونىڭ تالاپتارىن ەسكەرە وتىرىپ, اتا-انالارعا قاراتا «تۇلەكتەرمەن بىرگە ىلەسىپ كەلمەۋلەرىڭىزدى سۇرايمىز» دەپ ءوتىنىش جاسادى.
ەستەرىڭىزگە سالساق, 6 ساۋىردەن باستاپ رەسپۋبليكا بويىنشا كارانتين ۋاقىتىندا مەكتەپتەر ءداستۇرلى وقىتۋدان قاشىقتان وقىتۋعا اۋىستىرىلعان بولاتىن. سوعان وراي پەداگوگتارعا ساپالى جۇمىس جاساۋ ءۇشىن بارلىق جاعداي جاسالعانىمەن, قيىندىقتار تۋىنداعانى جاسىرىن ەمەس.
«مەكتەپتەر ءبىرىنشى رەت ستاندارتتى ەمەس وقىتۋ فورماسىمەن بەتپە-بەت كەلگەندىكتەن, قيىندىقتار بولدى. قاشىقتان وقىتۋدى ۇيىمداستىرۋ ماسەلەلەرى بويىنشا اتا-انالاردان 50-دەن استام ءوتىنىش كەلىپ ءتۇستى. ول سۇراقتار مەن وتىنىشتەر بويىنشا دەپارتامەنت ۋاقىتىلى تۇسىندىرمە جۇمىستارىن جۇرگىزدى», – دەدى گ. ەرمەكباەۆا.
كارانتين جاعدايىندا قاشىقتان ءبىلىم الۋعا وراي مەكتەپتەر وقۋشىلار مەن مۇعالىمدەرگە 10 000 استام كومپيۋتەردى ۋاقىتشا پايدالانۋعا بەرگەن. ال 1469 وتباسىعا دەمەۋشىلەردىڭ قولداۋىمەن كومپيۋتەر سىيعا بەرىلگەن. ال پرەزيدەنت قاسىم-جومارت توقاەۆ ۇستىمىزدەگى جىلدىڭ 27 مامىر كۇنى وتكىزگەن كەڭەستە بەلگىلى بولعانداي, 2025 جىلعا دەيىن ءبىلىم سالاسىنا 6 ەسە, عىلىم سالاسىنا 7 ەسە قاراجات بولىنەتىنى ايتىلدى.
«پرەزيدەنت ءبىلىم مەن عىلىم سالاسىنىڭ بولاشاقتاعى ءرولىن ايقىن ءتۇسىنۋ ءۇشىن بۇكىل مەملەكەتتىك ساياساتتى سوعان سايكەس جۇزەگە اسىرۋدا 2020-2025 جىلدارعا ارنالعان مەملەكەتتىك باعدارلامانى قايتا زەردەلەۋ قاجەتتىگىنە توقتالدى. سونىمەن قاتار, ءتىل كوميتەتىن ءبىلىم جانە عىلىم مينيسترلىگىنىڭ قاراماعىنا وتكىزىپ, قازاق ءتىلىن وقىتۋ ادىستەمەسىن ازىرلەۋگە جانە ۇيرەتۋگە مۇمكىندىك بەرەتىنىن اتاپ ءوتتى», – دەدى گ. ەرمەكباەۆا.
ءسوز سوڭىندا سپيكەر الماتى قالاسى ءبىلىم سالاسىندا ساپانى قامتاماسىز ەتۋ دەپارتامەنتىنە قازاقستان رەسپۋبليكاسى ءبىلىم جانە عىلىم مينيسترلىگى بيىلدان باستاپ بالالاردىڭ قۇقىقتارىن قورعاۋ جونىندەگى فۋنكتسيالار جۇكتەگەنىن ايتتى.
