ايماقتار • 28 مامىر، 2020

تۇركىستان: اۋىل شارۋاشىلىعى تەحنيكاسىن قۇراستىرۋ جوباسى جۇزەگە اسىرىلادى

15 رەت كورسەتىلدى

تۇركىستان وبلىسىنىڭ اكىمدىگى مەن «ۋزاگروتەحسانواتحولدينگ» اق جانە «Orbis Kazakhstan» كومپانيالارى اراسىندا اۋىل شارۋاشىلىعى تەحنيكاسىن قۇراستىرۋ جوباسىن جۇزەگە اسىرۋ اياسىندا ينۆەستيتسيالىق كەلىسىم مەن جول كارتاسىنا قول قويىلدى. كورشى مەملەكەت وكىلدەرىن وبلىس اكىمى ومىرزاق شوكەەۆ قابىلدادى.

وزبەكستاننىڭ «ۋزاگروتەحسانواتحولدينگ» مەملەكەتتىك كومپانياسى قازاقستاندىق «Orbis Kazakhstan» كومپانياسىمەن بىرلەسكەن جوبانى «Turkistan» يندۋستريالدى ايماعىنداعى «Brownfield» وندىرىستىك الاڭىندا جۇزەگە اسىرۋعا نيەتتى. جوبانى 3 كەزەڭدە ىسكە اسىرۋ جوسپارلانىپ وتىر. ينۆەستيتسيالاردىڭ جالپى كولەمى شامامەن 12 ملن اقش دوللارىن قۇرايدى. جوبا تولىققاندى ىسكە اسىرىلعاندا 100-گە جۋىق جۇمىس ورنى اشىلادى.

ينۆەستورلار كەڭ قولدانىسقا يە بولاتىن اۋىل شارۋاشىلىعى تەحنيكالارىن ءوندىرۋدى جوسپارلاۋدا. ماسەلەن، امبەباپ-جەر ايداۋ تراكتورى، ماقتا شارۋاشالىعىنا ارنالعان تراكتور، ولاردىڭ تىركەمەلەرى مەن روتورلى وراقتار، سۋ بۇركۋ جەلدەتكىشتەرى، سوقا جانە باسقا دا تەحنيكالارىن قۇراستىرۋ كوزدەلگەن. سونىمەن قاتار «ۋزاگروتەحسانواتحولدينگ» اق قازاقستاندىق مامانداردى وقىتۋ مەن بىلىكتىلىگىن ارتتىرۋدى، تەحنيكالىق پەرسونال ءۇشىن تاجىريبەلىك ترەنينگتەر جۇرگىزۋدى ءوز موينىنا الىپ وتىر. ال، وتاندىق «Orbis Kazakhstan» كومپانياسى ەلىمىزدىڭ اۋماعىندا اۋىل شارۋاشىلىعى تەحنيكاسىن ساتۋ ءۇشىن ديلەرلىك جانە سەرۆيستىك جەلىنى دامىتاتىن بولادى. «Turkistan Invest» تاراپىنان ينۆەستورمەن جوبانى ودان ءارى ىسكە اسىرۋ ءۇشىن قاجەتتى اقپارات الماسۋ بويىنشا قارقىندى جۇمىس جۇرگىزىلۋدە.

كەزدەسۋ بارىسىندا تۇركىستان وبلىسىنىڭ اكىمى ومىرزاق شوكەەۆ مۇنداي جوبالاردىڭ ەكى ەل ءۇشىن دە ماڭىزدىلىعىن جانە ءوزارا ءتيىمدى ىنتىماقتاستىقتىڭ ۇلگىسى بولىپ تابىلاتىنىن اتاپ ءوتتى. «قازاق-وزبەك ىنتىماقتاستىعى تۇركىستان وبلىسىن دامىتۋدا ەرەكشە ماڭىزعا يە. وزبەكستان ءبىزدىڭ ءوڭىرىمىز ءۇشىن ەكىنشى ماڭىزدى ساۋدا-ەكونوميكالىق ارىپتەس بولىپ تابىلادى. اۋىل شارۋاشىلىعى تەحنيكاسىنىڭ توزۋىن ەسكەرسەك، بۇل جوبانىڭ وزەكتىلىگى داۋسىز. ەلىمىز بويىنشا 185 مىڭ بىرلىك تەحنيكانىڭ 76%-ى، وبلىستا 19 مىڭ بىرلىك تەحنيكانىڭ 83%-ى توزعان. مەملەكەت ءوز تاراپىنان ينۆەستيتسيالىق سۋبسيديالار، فەرمەرلەرگە جەڭىلدىكپەن نەسيەلەر، اۋىل شارۋاشىلىعى تەحنيكاسىن ساتىپ الۋ ءۇشىن سۋبسيديالار، سونداي-اق ينفراقۇرىلىم جۇرگىزۋ تۇرىندە كوپتەگەن مەملەكەتتىك قولداۋ شارالارىن ۇسىنىپ كەلەدى. ءبىزدىڭ تاراپىمىزدان سىزدەرگە قولداۋ جانە تولىق اقپارات بەرىلەدى»، - دەدى ومىرزاق ەستاي ۇلى.

كەزدەسۋدە «ۋزاگروتەحسانواتحولدينگ» اق-نىڭ باسقارما توراعاسى ن. وتاجونوۆ تۇركىستان وبلىسىنىڭ ينۆەستيتسيالىق احۋالىنا جوعارى باعا بەردى. جوباعا قىزىعۋشىلىق تانىتقان وزبەكستاندىق كومپانيانىڭ باسشىلىعى 49/51% شارتى نەگىزىندە، اكتسيالاردىڭ نەگىزگى پاكەتى «Orbis Kazakhstan» قازاقستاندىق سەرىكتەس كومپانياسىندا بولۋىن ءجون كوردى.

ايتا كەتەلىك، «Orbis Kazakhstan»– ەكونوميكانىڭ ءتۇرلى سالالارىندا جۇمىس ىستەيتىن، ونداعان كاسىپورىندار مەن ۇيىمداردى بىرىكتىرگەن كوپبەيىندى وتاندىق كومپانيالار توبى. مۇناي سەرۆيسى، مۇناي حيمياسى، اگروبيزنەس، قۇرىلىس، كولىك، تاسىمالداۋ جانە قوعامدىق تاماقتانۋ بويىنشا قىزمەتتەردىڭ كەڭ ءتۇرىن جۇزەگە اسىرىپ كەلەدى.

سوڭعى جاڭالىقتار

NASA مارسكا قامداندى

تەحنولوگيا • كەشە

ۇقساس جاڭالىقتار