– وسى كەزەڭدە 3-8 جاس ارالىعىنداعى سابيلەردىڭ جوعالۋى بويىنشا 7 فاكتى, 8-14 جاستاعى بالالارعا قاتىستى 5, ال, 15-17 جاستاعىلارعا قاتىستى 5 فاكتى تىركەلدى. بالالاردىڭ بارلىعى دەرلىك امان-ەسەن تابىلدى. تەك 20 مامىردا «جۇلدىز» ىقشام اۋدانىنداعى ۇيىنەن شىعىپ كەتىپ, جوعالعان 1,5 جاسار ءسابيدى امان-ەسەن تابۋ مۇمكىن بولمادى, - دەپ حابارلادى دەپارتامەنتتىڭ ءباسپاسوز قىزمەتى.
اتىراۋ قالالىق پوليتسيا باسقارماسى قىزمەتكەرلەرىنىڭ ايتۋىنشا, حابار-وشارسىز كەتەتىن جاسوسپىرىمدەر نەگىزىنەن 2-3 ساعاتتا تابىلادى ەكەن. كوبىنەسە, كىشكەنتاي سابيلەر ءۇي ماڭىندا ويناپ ءجۇرىپ, باسقا كوشەگە كەتىپ قالادى. ءسويتىپ, ولار ءوز ءۇيىن تابا الماي, اداسىپ كەتەدى. كەيدە جوعالعان بالانىڭ اتا-اناسى پوليتسياعا جۇگىنۋگە اسىقپاي, وزدەرى ىزدەيدى. بالانى تابا الماعان سوڭ عانا پوليتسياعا حابار بەرەدى.
– ەرەسەكتەردىڭ قاراۋىنسىز جۇرگەن بالالاردىڭ جول كولىك وقيعالارىنا ءتۇسىپ قالۋ جايتتارى دا جوق ەمەس.تەك مامىر ايىندا بالالاردىڭ قاتىسۋىمەن 3 جول-كولىك وقيعاسى تىركەلدى. قالاداعى ي.تايمانوۆ كوشەسىندەگى ساۋدا ۇيلەرىنىڭ ءبىرىنىڭ تۇسىندا ورنالاسقان جاياۋ جۇرگىنشى بەلگىسى تۇسىنان ءوتىپ بارا جاتقان 2016 جىلى تۋعان ءجاسوسپىرىمدى, ت.اماندوسوۆ كوشەسىندەگى كوللەدج ماڭىندا 2004 جىلى تۋعان ءجاسوسپىرىمدى, گەولوگ ىقشاماۋدانىندا 2015 جىلى تۋعان ءجاسوسپىرىمدى جول بويىندا كولىك قاعىپ, سالدارىنان ءبىر ءجاسوسپىرىم جاراقات الدى. قالعان ەكەۋى جاراقاتسىز ۇيىنە جەتكىزىلدى, - دەدى ءباسپاسوز قىزمەتىنەن.
ءتارتىپ ساقشىلارى جاسوسپىرىمدەردىڭ قاۋىپسىزدىگى ءۇشىن قاتەرلى جاعدايلاردىڭ الدىن الۋ, بولدىرماۋ ماقساتىندا اتا-انالار ءۇشىن ءتۇرلى جادىنامالار تاراتىپ, پروفيلاكتيكالىق اڭگىمەلەسۋلەر وتكىزىپ ءجۇر.
– ويناپ ءجۇرىپ, وزدەرىنىڭ تۇرعىلىقتى جەرىنەن ۇزاپ, كەيىن اداسىپ قالاتىنداردىڭ دەنى – 2 مەن 6 جاس ارالىعىنداعى سابيلەر. بۇعان بالاعا جاۋاپتى (باعۋشى,كۇتۋشى, ءسابيدىڭ وزىنەن ۇلكەن اعا-اپاسى) ەرەسەكتەردىڭ بالالاردى كوزدەن تاسادا قالدىرۋى سەبەپ بولىپ وتىر, - دەيدى پوليتسيا قىزمەتكەرلەرى.
