وقىرماننىڭ كىمدى ءھام قاي تاقىرىپتا كىتاپ وقۋى كىرپياز تالعامنان بولەك وزىندىك كوزقاراستى دا قاجەت ەتپەك. ءبىر قاۋىم جاڭا زامان پروزاسىنا قىزىقسا, ەندى ءبىرى نوستالگيالىق كوڭىل كۇيمەن قايبىر جىلدارى وقىپ, ەستەن تانعان, سورەدەگى ماڭگىلىك كلاسسيكتەردى قايتا وقۋدى ءجون كورەدى. دەسەك تە قوعامداعى بولىپ جاتقان وقيعالاردى ادامنان الىس قاراي المايمىز. كوروناۆيرۋس ىندەتى ەتەك جايعالى بەرى كوڭىلدە ءبىر كىربىڭ بار. ۇرەيلىمىز. بەيبىت جۇرتتى تىنىشىنان ايىرعان ۋاقىتتا كوپ وقىرمان كلاسسيكانى ىسىرىپ قويىپ, جانتۇرشىگەرلىك وقيعالارعا تولى شىعارمالاردى وقىپ ءجۇر دەسەدى. بۇل پىكىردى قورقىنىش كورولى اتانعان امەريكاندىق جازۋشى ستيۆەن كينگ ونلاين-ەفيردە وتكەن ستيۆەن كولبەرتتىڭ باعدارلاماسىندا («The Late Show») ايتتى.
سۇحبات بارىسىندا العاش پاندەميا تۋرالى 1978 جىلى جاريالانعان «تەكەتىرەس» («پروتيۆوستويانيە») رومانىن جازۋ ۇستىندە بىلگەنىن حابارلاعان قالامگەر كارانتيندە ادامداردىڭ نەگە قورقىنىشتى كىتاپتارعا قىزىققانىن بولجاپ كورىپتى. جانە ءوز كەيىپكەرلەرىنىڭ قايسىسىمەن كارانتينگە قامالعىسى كەلمەيتىنىن دە اتاپ ءوتتى. ەنني ۋيلكسپەن بە, الدە دجەك توررەنسپەن بە؟ قىزىق... ستيۆەننىڭ ءوز كەيىپكەرلەرىنە اۆتورلىق تىڭ كوزقاراسپەن قاراۋىنا دا ىندەتتىڭ اسەرى بولعان شىعار, بالكي.
«مەنىڭشە, وسىنداي اۋىر كەزەڭدە حالىق قورقىنىشتى دۇنيەلەرگە ەركىنەن تىس ءۇيىر كەلەدى. ماسەلەن, وقىرماندار مەنىڭ جانتۇرشىگەرلىك شىعارمالارىمدى («ەسلي ونو كروۆوتوچيت», ياكي «يگرا دجەرالدا») نەمەسە باسقا اۆتورلاردىڭ وسى سارىنداس كىتاپتارىن وقىسا, ونداعى شىتىرمان وقيعالار ءوزىنىڭ (وقىرماننىڭ) رەالدى ومىرىنەن الدەقايدا ازاپتى ەكەنىن تۇيسىنەدى», دەيدى ول. ءسوز-اق. ستيۆەن اعايدىڭ بۇل ويىنا قوسىلامىز. نەگە دەسەڭىز, ادام ادام بوپ جارالعالى كوز الدىنداعى دۇنيەگە عانا سەنەدى. سوعان عانا يلانادى. ءتىپتى كەي جۇيكەسى ءالسىز ادامدار وقيعانى سۋىق اقىلمەن پايىمداي الماي, تىم اسىرەشىلدىككە سالىنىپ جاتادى. ويتكەنى ادام ساناسىنا ءاۋ باستا بۇدان دا قاۋىپتى وقيعامەن سالىستىرۋ كەلە قويمايدى. سول ءۇشىن دە, ستيۆەنشە ايتساق, وزىنىكىنەن دە اۋىر جاعدايدى كورگەن ءھام كوڭىلى سەنگەن جۇرت ءسال سابىرعا كەلەدى.
«مۇنداي تىم اۋىر تاقىرىپتاعى شىعارمانى وقىعان سوڭ وقىرماننىڭ كارانتيندەگى قورقىنىشى سەيىلەدى. ولار «بىزدىكىنەن دە احۋالى ناشار جاعداياتتار بار ەكەن» دەگەن پايىمعا كەلەدى. وسىدان سوڭ ءسىز كىتاپ بەتىن وپ-وڭاي جاۋىپ, الاڭسىز ۇيقىعا كەتەسىز. ارينە بۇل – تەك مەنىڭ تەوريام». دەمەك, قورقىنىشتى كىتاپتار پاندەميا كەسىرىنەن الاڭسىز ويىنان ءھام ءتاتتى ۇيقىسىنان ايىرىلعان ادامدارعا كومەكتەسەدى. راسىندا, قانداي اۋرۋ بولماسىن, ول ەڭ الدىمەن ادامنىڭ ءوز ىشىنەن, ياعني ويىنان باستاۋ السا كەرەك. ساناڭىزعا ابايسىزدا ەنگەن كەز كەلگەن وي – مەيلى ءسىز وعان سەنبەگەنىڭىزبەن – ءتۇبى شىندىققا اينالۋى مۇمكىن دەسەدى. ەگەر زامانداسىمىز كارانتين رەجىمىندە قاتتى قايعىرىپ, ۋايىمعا سالىنسا, ستيۆەن تەورياسىنا جۇگىنگەنى دۇرىس تا بولار. ويتكەنى قانداي جاعداي بولماسىن, ادامعا ەڭ ءبىرىنشى جۇرەك تىنىشتىعى كەرەك.
ستيۆەننىڭ سۇحباتىنان سوڭ ويلاپ قاراساق, كوركەم شىعارما وقۋدىڭ زيانىن ەشقاشان ەشكىم كورمەپتى. بۇگىنگى جاعداياتتا دا ماسەلەنىڭ ءتۇيىنى وقۋعا كەلىپ تىرەلىپ وتىر. ءتىپتى كەيدە كىتاپ پەن كلاسسيكا ادامنىڭ ادام بولىپ قالۋى ءۇشىن عانا, ادامنىڭ سۇلۋ بوپ ءجۇرۋى ءۇشىن عانا كەرەك سەكىلدى كورىنەدى. قايتكەنمەن دە, ادامزات وقۋدان اجىراماسا ەكەن دەيسىڭ.
