جاڭاوزەندەگى ايگىلى جەلاياق, «اقمىشتا تۋىپ, اقش-تا جۇلدە العان» ءامين تۇياقوۆ اتىنداعى ورتالىق ستاديون 2008 جىلى پايدالانۋعا بەرىلگەن بولاتىن. الايدا, ون ەكى جىلدان استام ۋاقىت بويى جاڭاوزەندىك ساپورتسۇيەر قاۋىمنىڭ قۇتتى ورداسىنا اينالىپ, ولارعا ساپالى قىزمەت كورسەتىپ كەلە جاتقان ستاديونعا اشىلعالى بەرى كۇردەلى جوندەۋ جۇمىستارى جۇرگىزىلمەگەن. بيىل اتالعان سپورت كەشەنىنە «جۇمىسپەن قامتۋ جول كارتاسى» باعدارلاماسى اياسىندا 200 ملن تەڭگە قاراجات قاراستىرىلىپ, ستاديونداعى 3000 ورىندىق جاڭالانىپ, حالىقارالىق ستاندارتقا ساي توسەنىش توسەلەدى. كەشەننىڭ 1250 مەتر اۋماعى تاستان قاشالعان قورشاۋمەن قورشالىپ, اينالاسىنا 57 قۋاتتى جارىقشامدار ورناتىلىپ, جارىق ديودتى شامدارمەن جارىقتاندىرىلادى جانە پەريمەترى بويىنشا 3900 شارشى مەتر جۇگىرۋ جولى سالىنادى. ورتالىق ستاديونداعى جوندەۋ جۇمىستارى اياقتالعاننان كەيىن جاڭاوزەندەگى ستاديون وبلىستىق «كاسپي» فۋتبول كلۋبىنىڭ رەزەرۆتىك الاڭى بولماق. ياعني, جوندەۋدەن وتكەن الاڭنىڭ باعى باسقاشا جانادى – وندا حالىقارالىق دارەجەدە فۋتبول ويىنى وتكىزىلەدى دەپ جوسپارلانۋدا. بۇگىندە قۇرىلىس الاڭىندا «جۇمىسپەن قامتۋ جول كارتاسى» باعدارلاماسى بويىنشا 50 ادام جۇمىس جاساۋدا. جاڭعىرعان الاڭنىڭ حالىقپەن قاۋىشار كەزى دە الىس ەمەس – بيىلعى جىلدىڭ قازان ايى.
جاڭاوزەن قالاسىنداعى قولعا الىنعان ىستەردىڭ ءبىرى – ورتالىق ساياباعىن اباتتاندىرۋ جانە «جۇمىسپەن قامتۋ جول كارتاسى» باعدارلاماسى اياسىندا قالاىشىلىك اۆتوكولىك جولدارىنىڭ ورتاشا جوندەۋ جۇمىستارى. بۇگىندە ورتالىق ساياباقتا سۋ بۇرقاعىن جوندەۋ جانە كىشى ارحيتەكتۋرالىق فورمالاردى ورناتۋ جۇمىستارى جۇرگىزىلۋدە. ال قالاىشىلىك 54 شاقىرىم جول جوندەلىپ, اۆتوكولىك تاس جولىن سالۋ جۇمىستارى دا جوسپاردا. سونداي-اق 220 وقۋشىعا ارنالعان جانە 110 ورىندىق جاتاقحاناسى بار, اعىمداعى جىلدىڭ تامىز ايىندا وقۋشىلار يگىلىگىنە تاپسىرىلاتىن جاڭاوزەن ءبىلىم-يننوۆاتسيا ليتسەي-نتەرناتى دا قالانىڭ الەۋمەتتىك سالاسىنا قوسىلار جاڭا كۇش بولماق.
جاڭاوزەندەگى جاڭالىقتىڭ ءبىرى – بۇرىنعى تۋبەركۋلەز اۋرۋحاناسىنىڭ ورنىنا جەدەل جاردەم ءبولىمى عيماراتىن سالۋ. قايتا قۇرىلىمداۋ جوباسى «جۇمىسپەن قامتۋ جول كارتاسى» باعدارلاماسى اياسىندا قايتا قارجىلاندىرۋعا ۇسىنىلعان. جوبا جۇزەگە اسقاندا جاڭاوزەن قالاسىنان بولەك, قاراقيا اۋدانىنا قاراستى بوستان, سەنەك, قۇلاندى اۋىلدارى تۇرعىندارىنىڭ سۇرانىسى تولىقتاي ورىندالىپ, مەديتسينالىق كومەك الا الاتىن بولادى.
جاڭاوزەن قالاسىنىڭ تۇرعىندارىن اۋىز سۋمەن قامتاماسىز ەتىپ, كارىز قىزمەتى جانە قالانىڭ اباتتاندىرۋ جۇمىستارىمەن اينالىساتىن «وزەنينۆەست» مەملەكەتتىك كوممۋنالدىق كاسىپورنى قالا ومىرىندە ەرەكشە مانگە يە. مەملەكەتتىك اۆتوموبيل جولدارىن كۇتىپ ۇستاۋ, سپورتتىق-ساۋىقتىرۋ وبەكتىلەرىن, مادەنيەت جانە دەمالىس ساياباقتارىن كۇتىپ ۇستاۋ, مەملەكەتتىك مەنشىكتەگى سۋ شارۋاشىلىعى جۇيەلەرى مەن قۇرىلىس جايلارىن كۇتىپ ۇستاۋ, پايدالانۋ, جوندەۋ جانە رەكونسترۋكتسيالاۋ, سونداي-اق ولاردىڭ قاۋىپسىزدىگىن قامتاماسىز ەتۋ قىزمەتىن اتقاراتىن مەكەمەدە بارلىعى 641 ادام جۇمىس ىستەۋدە. ولاردىڭ 350-ءى «جۇمىسپەن قامتۋ جول كارتاسى» باعدارلاماسى بويىنشا قابىلدانعان. دەرەكتەردەن بەلگىلى بولعانداي, مەكەمە قالانى كەشەندى دامىتۋ جوسپارى نەگىزىندە 542 ملن تەڭگەگە اباتتاندىرۋعا قاجەتتى 39 تەحنيكالار مەن قۇرال جابدىقتار الۋعا تاپسىرىس بەرگەن. بۇگىندە شۇڭقىر قازاتىن, جول جيەكتەرىن سىزاتىن بۋلدوزەر سىندى 8 تەحنيكا الىنعان.
– جاڭاوزەن قالاسىندا «جۇمىسپەن قامتۋ جول كارتاسى» باعدارلاماسى بويىنشا 39 جوبا ىسكە اسىرىلۋدا. ول – 3 ملرد قاراجات. وعان جول قۇرىلىسى, الەۋمەتتىك نىسانداردىڭ جوندەۋ جۇمىستارى جۇرگىزىلەدى. بۇگىنگى ارالاعان نىسانداردىڭ بارلىعىنا قاراجاتتارى ءبولىنىپ, قۇجاتتار راسىمدەلۋى اياقتالعان. ەندىگى ءبىزدىڭ ماقسات – وسى جۇمىستاردى ساپالى اياقتاپ, تۇرعىنداردى جۇمىسقا تارتۋ. بۇدان بولەك, جاڭاوزەن قالاسىنا قاتىستى ۇكىمەت تاراپىنان قابىلدانعان الەۋمەتتىك ەكونوميكالىق جاعدايدى دامىتۋعا ارنالعان كەشەندى جوسپار بار. وسىعان سايكەس قالادا الەۋمەتتىك وبەكتىلەر ىسكە اسىپ جاتىر. جاڭاوزەن قالاسىندا جۇمىسسىزدىق ماسەلەسى باستى نازاردا. ماسەلەنىڭ وڭ شەشىمىن تابۋ ءۇشىن بىرقاتار جوبالار ىسكە اسىرىلۋدا. ءبىز تۇرعىنداردى جۇمىسپەن قامتۋ ءۇشىن «جۇمىسپەن قامتۋ جول كارتاسى» باعدارلاماسىمەن جانە شاعىن جانە ورتا بيزنەستى قولداۋعا ارنالعان جەڭىل نەسيەلەر بەرۋ ارقىلى جاڭا جۇمىس ورنىن قۇرامىز. ەگەر جاستار اقتاۋ قالاسىندا جۇمىس جاسايمىن دەسە جاتاقحانامەن قامتاماسىز ەتىپ, وندىرىستىك مەكەمەلەرگە تارتۋعا بولادى, – دەدى س.ترۇموۆ.
ماڭعىستاۋ وبلىسى اكىمدىگىنىڭ دەرەگىنە سۇيەنسەك, جاڭاوزەندە قازىرگى تاڭدا 39 جوبا ىسكە اسىرىلىپ جاتىر ەكەن. جاڭاوزەندىكتەرمەن بىرگە جاڭا جوبالار ىسكە قوسىلىپ, حالىقتىڭ يگىلىگىنە جاراعان قۋانىشتى كۇندى كورۋدى كۇتەمىز.
ماڭعىستاۋ وبلىسى
