اۋدان اۋماعىنا كىرگەن 15 چيزەل اگرەگاتى, 11 جۇيەكارالىق قوپسىتقىش, 14 ءدان سەپكىش (سەيالكا) تەحنيكالار قازىرگى ۋاقىتتا سۋى تارتىلعان ەلدى مەكەندەردەگى شارۋالارعا كومەكتەسىپ, ماقتا داقىلىن قايتا ەگىپ بەرىپ جاتىر. ماسەلەن, ج.نۇرلىباەۆ اۋىلدىق وكرۋگىنە قاراستى قاراقىر ەلدى مەكەنىندەگى «جامانقۇل» شارۋا قوجالىعى وزبەكستاندىق تەحنيكانىڭ ارقاسىندا 7 گەكتار القابىنا ماقتا ءشيتىن قايتا سەۋىپ شىقتى. كورشى اعايىندار تەحنيكادان بولەك, جانار-جاعارمايىن, سۇرىپتى ءشيتىن دە تەگىن بەرىپ وتىر. ياعني كورشى ەلدەن 243,6 توننا ماقتا ءشيتى جەتكىزىلدى. «سۋ شايعان القاپتاردا مامىر ايىنىڭ سوڭعى كۇندەرىنە دەيىن ماقتا ەگۋگە بولادى. سوندىقتان شارۋالار كۇندىز-ءتۇنى تىنباي ەگىستىك القاپتارىن قايتا قالپىنا كەلتىرۋ جۇمىستارىنا جۇمىلۋدا. ءبىر تاۋلىكتە شامامەن 100 گەكتاردان استام القاپقا كۇلتە جۇرگىزىلىپ, 100 گەكتارعا ماقتا ەگىلۋدە», دەيدى اۋداندىق اۋىل شارۋاشىلىعى ءبولىمىنىڭ مامانى جارقىنبەك مىرزاليەۆ.
ايتا كەتەيىك, جالپى توپان سۋدان ماقتاارال اۋدانىنداعى 7 مىڭ 500 گەكتار ەگىستىك القاپ زارداپ شەككەن بولاتىن. سونىڭ 5035 گەكتارى جاڭاجول اۋىل وكرۋگىنە تيەسىلى. وزبەكستاندىق تەحنيكالاردىڭ باسىم كوپشىلىگى دە وسى اۋىل وكرۋگىنە بولىنگەن وتىر. بۇدان بولەك, ەڭبەكشى اۋىلدىق وكرۋگىنە قاراستى جاڭا تۇرمىس جانە جانتاقساي ەلدى مەكەندەرىندەگى جالپى اۋماعى 113,31 گەكتار ەگىستىك القاپتى قايتا وڭدەۋ جۇمىستارىنا دا وزبەكستاندىق تەحنيكالار ءبولىندى. سونىمەن قاتار, ج.نۇرلىباەۆ اۋىلدىق وكرۋگىنە قاراستى قاراقىر ەلدى مەكەنىندە 61,8 گەكتار ەگىستىككە قايتارا ماقتا ءدانىن سەبۋ جۇمىستارى جۇرگىزىلىپ جاتىر.
