سۋرەت مۋزەيدەن الىندى
بۇل يگى ءىس بۇگىندە اۋدان ورتالىعى اققۋلى اۋىلىنداعى بالالار جانە جاسوسپىرىمدەر سپورت كلۋبىنىڭ ديرەكتورى توقتامىس كەنجەعاليەۆتىڭ باستاماسىمەن جالعاسۋدا. وتكەن جىل سوتسياليستىك ەڭبەك ەرى جۇمابەك جانعوجينگە ارنالىپتى.
كەيىنگى ۇرپاق ەسىمىن ءبىلسىن دەگەن جۇمابەك جانعوجينمەن بىرگە سوتسياليستىك ەڭبەك ەرى اتانعان جانپەيىس سىزدىقوۆ, بالعاباي وسپانوۆ, جۇماحان اسىلحانوۆتار بولسا, ال جولامان قالىموۆ, كەرىمحان يبراگيموۆتار اۋدانداعى بەسقاراعاي اسىل تۇقىمدى قوي زاۋىتىندا ەڭبەك ەتىپ, سولتۇستىك قازاق مەرينوس قويىنىڭ تۇقىمىن شىعارۋعا ۇلەس قوسقان ەكەن.
ال بيىلعى سپورتتىق شارالار سوتسياليستىك ەڭبەك ەرلەرى كۇلاي شارباقباەۆا مەن ونىڭ بالاسى عابدىناسىر ەرعالي ۇلىنىڭ قۇرمەتىنە ارنالادى.
– مەن كۇلاي شارباقباەۆانىڭ نەمەرەسىمىن. اپامىزدىڭ ەڭبەك جولى جالعاسۋدا. ۇرپاقتارى دا اۋىلدا قالىپ, مال شارۋاشىلىعىمەن اينالىسۋدا. اۋداندىق سپورتتىق سپارتاكيادانىڭ بيىل ءبىزدىڭ اۋلەتىمىزگە ارنالاتىنىن ەستىپ ەرەكشە قۋاندىق, – دەيدى نۇرسۇلۋ شارباقباەۆا.
ءبىز دە ءبىر جىلى اپامىز جايلى جازۋ ءۇشىن اۋدانعا بارىپ قايتقان ەدىك. كۇلاي اپامىز 1958 جىلى سوتسياليستىك ەڭبەك ەرى اتاعىن العان. ون جىل بويى قوي باققان ادام. جىل سايىن قوزىلار سانىن كوبەيتكەن قوي وسىرۋدەگى بۇل ءادىستى بۇكىل ەل «شارباقباەۆتار كونۆەيەرى» دەپ اتاعان.
كەيىن اناسىنىڭ اق تاياعىن يەلەنگەن ۇلى عابدىناسىر دا 1981 جىلى سوتسياليستىك ەڭبەك ەرى اتاعىن الادى.
ال شابار اۋىلىنا دىنمۇحامەد قوناەۆ كەلگەنىن جۇرت وسى كۇنگە دەيىن ايتادى.
– دىنمۇحامەد قوناەۆ 1958 جىلى وبلىسقا ساپارمەن كەلىپ, ارنايى ءبىزدىڭ اۋىلعا اتباسىن بۇرىپ, شەشەمىزدىڭ ۇيىنە سوقتى. ۇلكەن ادامنىڭ كىشكەنتاي اۋىلعا كەلۋى مەرەكە بولدى. ول كىسى انامىزدىڭ جوعارى ماراپاتىنا قۇتتى بولسىن ايتا كەلىپتى. سوندا قوناەۆ اعامىز ەسكى ءۇيىمىزدى كورىپ «باتىر باتىرعا لايىق ۇيدە تۇرۋى كەرەك» دەگەن ەدى, – دەپ ەسكە العان ەدى سول كەزدە كوزى ءتىرى عابدىناسىر اتا.
اققۋلى اۋىلىنداعى تاريحي-ولكەتانۋ مۋزەيىندە ەسىمدەرى ەل ەسىندە قالعان ادامداردىڭ قۇجاتتارى, قولدانعان زاتتارى, فوتوسۋرەتتەرى قويىلعان.
– بۇل جوبادا قاي جىلى قانداي ادامعا قۇرمەت كورسەتىلەتىنى دە بەلگىلەنگەن. اۋدانداعى ەل اۋزىندا اتى قالعان ادامداردىڭ ەسىمدەرىن جاڭعىرتۋ, سوعىس جانە بەيبىت كۇن باتىرلارىنىڭ ەرلىگىن كەيىنگى ۇرپاققا جەتكىزۋ – بىزگە مىندەت. وسى جوبا بويىنشا 2014 جىلى ابىلقايىر بايمولدين زيراتىنا ءتاۋ ەتىپ, رەسەيدىڭ نەۆەل قالاسىنا دەيىن باردىق. قالا تۇرعىندارى جەرلەسىمىزدى ەرەكشە قۇرمەتتەيدى ەكەن, – دەيدى توقتامىس جانىبەك ۇلى.
پاۆلودار وبلىسى,
اققۋلى اۋدانى
