بۇل زاڭداردا پرەزيدەنتتىڭ ۇلتتىق قوعامدىق سەنىم كەڭەسىندە ايتقان ۇسىنىستارى ارنايى نورمالار رەتىندە قامتىلدى. سونىڭ ىشىندە پارتيالىق سايلاۋ تىزىمدەرىندە ايەلدەر مەن جاستار ءۇشىن كەمىندە 30 پايىزدىق كۆوتانى ەنگىزۋ باستاماسىن ەرەكشە اتاپ وتەر ەدىم. اسىرەسە وسى قادام ارقىلى جاستاردىڭ ساياسي بەلسەندىلىگى ارتا تۇسەدى دەپ ۇمىتتەنەمىن. ويتكەنى قاي كەزدە دە, قاي سالادا دا جالىنداعان جاستارعا بارىنشا مۇمكىندىك بەرىپ, ولاردىڭ ەل ىسىنە ارالاسۋىنا جول اشۋ كەرەك ەكەنى ۇدايى ايتىلىپ كەلەدى. مەن دە مۇنداي ىلكىمدى باستامالاردى ىسكە اسىرۋدى قاشاندا قولداپ جۇرەمىن.
ءوزىم جەتەكشىلىك ەتەتىن «Qazaqstan Team» رەسپۋبليكالىق قوعامدىق جاستار بىرلەستىگى ەلىمىزدىڭ بىرنەشە ءوڭىرىن ارالاپ, جەر-جەردەگى جاستارمەن كوپتەگەن كەزدەسۋ وتكىزدى. سونداي ساتتەردە جاستاردىڭ جاقسى يدەيالارى بار ەكەنىن, ءبىراز نارسەنى وزگەرتكىسى كەلەتىنىن, ەلدىڭ بولاشاعىنا بەيجاي قارامايتىنىن بايقادىق. ءبىزدىڭ وزىق ويلى, ءبىلىمدى, تالاپتى جاستارىمىز بارشىلىق. سوندىقتان ەلدىڭ ءسوزى ايتىلاتىن مىنبەرلەردەن جاستاردىڭ دا ءۇنى ەستىلۋى كەرەك.
دەموكراتياعا قاراي قارقىندى قادام جاسالىپ جاتقان كەزەڭدە جاستار ەلىمىزدىڭ قوعامدىق-ساياسي ءومىرىن جانداندىرا تۇسۋگە ءوز ۇلەسىن قوسا الادى. سايلاۋ كەزىندە پارتيالار تىزىمىندە جاستاردىڭ ناقتى ۇلەسىن مىندەتتەۋ ارقىلى ولاردىڭ ساياسي بەلسەندىلىگى كۇشەيە تۇسەتىنى انىق. بۇعان قوسا جاڭا پارتيالاردى تىركەۋدىڭ دە تالاپتارى جەڭىلدەتىلدى. الداعى ۋاقىتتا جاستاردىڭ ساياسي ومىردە ۇلكەن كۇشكە اينالاتىنىنا سەنەمىن. قازاقتىڭ «اسىل – تاستان, اقىل – جاستان» دەگەن دانا ءسوزى بار عوي. سوندىقتان جاستاردىڭ ۇتىمدى ۇسىنىستارى ارقىلى دا ءبىراز ۇپايىمىزدى تۇگەندەۋگە بولادى.
اسحات سادىرباي,
ۇلتتىق قوعامدىق سەنىم كەڭەسىنىڭ مۇشەسى, «Qazaqstan Team» رەسپۋبليكالىق قوعامدىق جاستار بىرلەستىگىنىڭ جەتەكشىسى
