سۋرەتتى تۇسىرگەن ەرلان ومار, EQ
قازاقستان ستۋدەنتتەرى اليانسىنىڭ توراعاسى ءىلياس تۇستىكباەۆ كەز كەلگەن ازاماتتىڭ ءوزى وقىعان نە وقىپ جاتقان ءبىلىم ورداسى تۋرالى ساۋالداماعا قاتىسا الاتىنىن حابارلادى. ءبىلىم الۋشىلار مەن تۇلەكتەردىڭ جاۋاپتارى ۋنيۆەرسيتەتتەرگە بەرىلمەيدى, ياعني قۇپيا ساقتالادى.
«بۇل رەيتينگىنىڭ ماقساتى – جوعارى وقۋ ورىندارىندا ءبىلىم الۋشىلار مەن تۇلەكتەر تاراپىنان تاۋەلسىز باعا بەرۋ, ابيتۋريەنتتەرگە, جۇمىس بەرۋشىلەرگە تولىققاندى اقپارات پەن كاسىپتىك باعدار بەرۋ. مۇنىڭ مەملەكەتتىك ۇيىمداردىڭ رەسمي رەيتينگىسىنە قاراعاندا ەرەكشەلىگى – ساۋالدامانىڭ ءانونيمدى وتۋىندە. انونيمدىك ساقتالاتىنىن بىلەتىن قاتىسۋشى بارىنشا اشىق ءارى شىنايى جاۋاپ بەرۋگە تىرىسادى. سونىڭ نەگىزىندە جاسالعان رەيتينگ ۋنيۆەرسيتەتتەرگە دە جۇمىسىنداعى ولقىلىقتاردان حاباردار بولۋعا مۇمكىندىك بەرەدى. جاۋاپتى نەگىزگە الىپ جۇمىس ساپاسىن ارتتىرۋعا تىرىسادى دەگەن ۇمىتتەمىز. ءبىلىم جانە عىلىم مينيسترلىگى مەن جوعارى وقۋ ورىندارىنا ۇسىنىستار ازىرلەۋ دە جوسپاردا بار. ءوزىم پرەزيدەنت جانىنداعى جاستار كەڭەسىنىڭ مۇشەسى رەتىندە كەڭەس جينالىسىندا دا جاريالاسام دەگەن جوسپارىم بار», دەيدى اليانس توراعاسى.
ساۋالداما سۇراقتارى جوعارى وقۋ ورىندارىنىڭ ءبىلىم بەرۋ باعدارلاماسى, ماتەريالدىق-تەحنيكالىق بازاسى, سىبايلاس جەمقورلىق, جاتاقحانا, تاماقتانۋ ورىندارى, رەكتوراتتىڭ اشىقتىعى سياقتى بىرنەشە باعىتتاردى قامتيدى. وسىلايشا, وقۋ ورىندارىنىڭ تەك ءبىلىم بەرۋ ساپاسى ەمەس, ستۋدەنتتەرگە جاسالعان جاعداي دا, ساباقتان تىس ۋاقىتتى ءتيىمدى وتكىزۋگە ارنالعان مۇمكىندىكتەر دە سارالانادى.
«ازاماتتاردان بۇل جوباعا بەلسەنە ارالاسۋىن وتىنەمىز. بۇل جوبادا ءار ادامنىڭ پىكىرى ماڭىزدى. ساۋالداماعا قازاقستان ستۋدەنتتەرىنىڭ اليانسىنىڭ الەۋمەتتىك جەلىلەردەگى پاراقشالارى ارقىلى قاتىسۋعا بولادى. بۇل ۋنيۆەرسيتەتتەرگە ستۋدەنتتەردىڭ كوزىمەن باعا بەرۋ ەكەنىن ەسكەرگەن ءجون», دەپ تۇيىندەدى ءىلياس تۇستىكباەۆ.
ءبىر ايعا سوزىلاتىن ساۋالداما ستۋدەنتتەر تاراپىنان ازىرلەنىپ جاتقان العاشقى رەيتينگ. بۇعان دەيىن جوعارى وقۋ ورىندارىنىڭ جۇمىس ساپاسىن ء«بىلىم ساپاسىن قامتاماسىزداندىرۋ بويىنشا تاۋەلسىز اگەنتتىگى» مەن «اككرەديتتەۋ جانە رەيتينگتىڭ تاۋەلسىز اگەنتتىگى» ۇيىمدارى باعالايتىن.
