جاسىراتىنى جوق, توتەنشە جاعدايدىڭ اياقتالىپ, كارانتين تالابىنىڭ جەڭىلدەۋى كەيبىر وڭىردە كوروناۆيرۋستىڭ كۇرت ءورشىپ كەتۋىنە الىپ كەلگەندەي. 24 مامىر كۇنى قاۋىپتى ىندەتتى جۇقتىرعان تاعى 209 ناۋقاس تىركەلدى. ناقتىراق ايتساق, الماتى قالاسىندا – 37, قاراعاندى جانە جامبىل وبلىستارىنىڭ ارقايسىسىندا – 33, نۇر-سۇلتان قالاسىندا – 32, باتىس قازاقستان وبلىسىندا – 28, اتىراۋدا – 12, سونىمەن ينفەكتسيا باس-اياعى 12 وبلىس پەن ەكى قالانىڭ تۇرعىندارىنان انىقتالدى. وسىعان بايلانىستى باتىس قازاقستان وبلىسى كارانتين مەرزىمىن 15 ماۋسىمعا دەيىن, اتىراۋ وبلىسى مەن شىمكەنت قالاسى 8 ماۋسىمعا دەيىن, شىعىس قازاقستان وبلىسى 1 ماۋسىمعا دەيىن سوزۋعا ءماجبۇر بولدى. جامبىل وبلىسىندا ىندەتتىڭ ءوسۋ قارقىنى 12,7 پايىزعا جەتكەندىكتەن بۇل ايماقتا دا كارانتين تالاپتارى قايتادان قاتاڭداتىلماق.
و باستا بۇل ىندەت جاسى ۇلكەن جاندار ءۇشىن وتە قاۋىپتى ەكەنى ايتىلعان بولاتىن. ءسويتىپ كەيبىر مەكەمەلەر جاسى 65-تەن اسقان كىسىلەردى ۇيدە وتىرىپ جۇمىس ىستەۋگە جىبەردى. بىراق جاقىندا نۇر-سۇلتان قالالىق دەنساۋلىق ساقتاۋ باسقارماسىنىڭ باسشىسى ساۋلە قيسىقوۆا ۆيرۋس جۇقتىرعانداردىڭ 76 پايىزى 18 جاستان 49 جاس ارالىعىنداعىلار ەكەنىن ايتتى. 16%-ى 50-69 جاس شاماسىنداعى كىسىلەر بولسا, 70 جاستان اسقان قارتتار – 2%, ال بالالار 6%-دى قۇراپ وتىر.
بۇدان دەنساۋلىق ساقتاۋ مينيسترلىگىنىڭ وكىلدەرى وتىرىك ايتقان با دەپ قالاتىنىڭ انىق. جوق. COVID-19 ينفەكتسياسىنىڭ قارت كىسىلەر ءۇشىن وتە قاۋىپتى ەكەنىنە كۇمان جوق. بۇل ءبىزدىڭ ەلدە 18 جاستان 49 جاس ارالىعىنداعىلاردىڭ ءتارتىپ پەن تازالىقتى كوبىرەك بۇزاتىنىن, سودان بۇل ىندەتتىڭ قۇرىعىنا وسى جاستاعىلاردىڭ كوبىرەك ىلىنەتىنىن اڭعارتسا كەرەك. مىسالى, قاراعاندى وبلىسىندا اۋرۋدىڭ 1 جاعدايى 18 وشاقتىڭ پايدا بولۋىنا سەبەپ بولدى. تۇركىستان وبلىسىندا دا 1 پاتسيەنت 8 اۋرۋ وشاعىن پايدا قىلىپ, 20 ادامعا جۇقتىرعان. نۇر-سۇلتان قالاسىندا ءبىر وتباسىنداعى 5 بىردەي ادام تۇگەل سىرقاتتاندى. ياعني اۋىزاشارعا بارعان پاتسيەنت ماڭىنداعىلارعا ينفەكتسيا تاراتقان. ءبىر ادامنىڭ سالعىرتتىعى بۇتىندەي ءبىر وتباسىنىڭ, ءبىر اۋلەتتىڭ وسىناۋ ىندەتكە شالدىعۋىنا سەبەپ بولۋدا. سوندىقتان ءار ادام ءتارتىپتى ءوزى عانا ساقتاماي, جانىنداعىلاردان دا تالاپ ەتۋى ءتيىس.
تاعى ءبىر ايتارى, ىندەتتى جۇقتىرعانداردىڭ 62 پايىزىندا اۋرۋدىڭ بەلگىلەرى بايقالمايدى. دەنساۋلىق ساقتاۋ ءمينيسترى ە.ءبىرتانوۆ: «ۆيرۋس جۇقتىرعانداردىڭ سانىنىڭ ءوسۋى حالىق اراسىندا پروفيلاكتيكالىق تەستتىڭ كوبەيگەنىمەن بايلانىستى. تەست ناتيجەسىندە انىقتالعان ناۋقاستاردىڭ 80-85 پايىزى اۋىرماعان, سيمپتومى جوق» دەيدى. ياعني ەل تۇرعىندارى «جوتەل, دەنە قىزۋىم جوق, بويىمدا كوروناۆيرۋستىڭ ەشقانداي بەلگىلەرى بايقالمايدى» دەپ ارقانى كەڭگە سالۋىنا بولمايدى. كەز كەلگەن ادام ينفەكتسيانى تاراتىپ جۇرگەنىن ءوزى دە بىلمەۋى مۇمكىن.
بۇل ىندەتكە بەيجاي قاراۋدىڭ سالدارى عوي, بلوك-بەكەتتەردە ءتارتىپ بۇزۋ ءالى كۇنگە تىيىلماي كەلەدى. 25 مامىردا تاڭعى ساعات 05.26-دا BMW ماركالى كولىگىن جۇرگىزۋشى الماتى وبلىسى قاراساي اۋدانى كوكساي شاعىن اۋدانى قوجابەكوۆ كوشەسىمەن سولتۇستىك باعىتتا كەلە جاتىپ, جاڭا عاسىر كوشەسىنىڭ قيىلىسىندا №4 بلوك-بەكەتكە بارىپ سوعىلىپ, ينەرتسيامەن پاترۋلدىك كولىكتى بارىپ ۇرعان. كولىكتەگى ەكى پوليتسيا قىزمەتكەرى قايتىس بولدى. اراق ءىشىپ, ماشينا ايداعان جۇرگىزۋشى قاماۋعا الىنىپ, سوتقا دەيىنگى تەرگەۋ باستالدى.
پوليتسەيلەردىڭ بىرەۋى – 42 جاستاعى اعا لەيتەنانت جاراس جانعازيەۆ العان جاراقاتىنان جەدەل جاردەم جەتكەنگە دەيىن قايتىس بولدى. ول – باتىس قازاقستان وبلىسىنىڭ تۋماسى, ىشكى ىستەر ورگاندارىندا 2001 جىلدان باستاپ ەڭبەك ەتكەن. ۇيلەنگەن, ارتىندا ەكى پەرزەنتى قالدى. ال 1994 جىلى تۋعان پوليتسيا سەرجانتى داستان ابدىقانوۆ اۋرۋحانادا قايتىس بولدى. ۇيلەنگەن, سوڭىندا تۋعانىنا ءبىر اي بولعان قىزى قالدى.
سوڭعى مالىمەتتەرگە قاراعاندا بۇل ىندەتتەن جازىلعانداردىڭ سانى 4532-گە جەتتى.
ينفوگرافيكانى جاساعان امانگەلدى قياس, EQ
