ءساۋىر ايىندا كەنتاۋ قالالىق پوليتسيا بولىمىنە جەرگىلىكتى تۇرعىننان مالى ۇرلانعانى جونىندە حابارلاما كەلىپ تۇسكەن. جابىرلەنۋشىنىڭ ايتۋىمەن پوليتسيا قىزمەتكەرلەرى, ونىڭ 20-دان استام جىلقىسى جوعالىپ كەتكەنىن انىقتاعان. اتالعان جايت سدتتبت-عا 188-1 باپ «مال ۇرلىعى» 4-بولىگى بويىنشا تىركەلىپ, پوليتسەيلەر شۇعىل ىزدەستىرۋ ءىس-شارالارىنا كىرىسىپتى.
ءتارتىپ ساقشىلارى جاقىن ماڭداعى بارلىق اۋماقتار مەن جايىلىمداردى ارالاپ, اۋىل تۇرعىندارىنان سۇراستىرىپ, مال تاسىمالدايتىن اۆتوكولىك جانە ءۇي مالدارىن ساتىپ الاتىن ورىنداردى مۇقيات تەكسەرىپ شىققان. ءسويتىپ, جەدەل-ىزدەستىرۋ ءىس-شاراسى بارىسىندا, كريمينالدىق پوليتسيا قىزمەتكەرلەرى تۇركىستان قالاسى مەن كەنتاۋ قالاسىنىڭ 5 كۇدىكتى تۇرعىنىن, ونىڭ ىشىندە ۇرلانعان مالداردى ساتىپ الۋشىنى دا ۇستاعان.
«تەرگەۋ بارىسىندا ۇرىلاردىڭ 125 جىلقى مەن 30 ءىرى قارا مالىن ۇرلاۋعا قاتىسى بار ەكەندىگى انىقتالدى. بۇگىنگى تاڭدا ولاردىڭ 2017-2020 جىلدار ارالىعىندا مال ۇرلىعىنىڭ 19 جايتىنا قاتىسى بارى بەلگىلى بولىپ وتىر. اتالعان توپ ۇيىمداسقان تۇردە قىلمىس جاساعان. ولاردىڭ ارقايسىسى وزىنە جۇكتەلگەن مىندەتتەردى ورىنداعان. كەيبىرەۋى جايىلىمنان مالدى ۇرلاپ الىپ شىقسا, باسقالارى ولاردى قورا-جايلارعا جايعاستىرىپ وتىرعان, ال ۇشىنشىلەرى ۇرلانعان مالداردى ساتقان نەمەسە سويىپ ەتىن وتكىزىپ جۇرگەن», دەدى گەنەرال-مايور قايرات دالبەكوۆ.
كۇدىكتىلەردىڭ ءۇيىن ءتىنتۋ كەزىندە ءتارتىپ ساقشىلارى 18 جىلقى مەن 9 سيىردى تاۋىپ, زاڭدى يەلەرىنە قايتاردى. قازىرگى ۋاقىتتا اتالعان جايت بويىنشا سوتقا دەيىنگى تەرگەۋ امالدارى جۇرگىزىلۋدە. جابىرلەنۋشىلەرگە 70 ميلليون تەڭگەدەن استام شىعىن كەلتىرىلگەن. كۇدىكتىلەر قاماۋعا الىنعان. پوليتسيا قىزمەتكەرلەرى ۇستالعانداردىڭ باسقا دا وسىعان ۇقساس مال ۇرلىعى دەرەكتەرىنە قاتىستىلىعىن انىقتاۋدا.
