سالتاناتتى شارا Microsoft Teams پلاتفورماسىندا ۇيىمداستىرىلدى. ەكى كەزەڭدە وتكىزىلگەن جيىنعا وقۋشىلار, ۇستازدار جانە اتا-انالار ونلاين قاتىستى. العاشقى جيىن بيىل مەكتەپ ءبىتىرىپ جاتقان 162 تۇلەككە ارناپ ۇيىمداستىرىلسا, ەكىنشى كەزەڭدە تومەنگى سىنىپ وقۋشىلارى ءوز شاڭىراقتارىندا مەكتەپ ديرەكتورىنىڭ ورىنباسارلارى مەن شاڭىراق كۋراتورلارىمەن ونلاين-كەزدەسۋ وتكىزىپ, وقۋ جىلىن قورىتىندىلادى. جيىن بارىسىندا مەكتەپ ديرەكتورى ەرمەك پايزوۆ بيىل مەكتەپپەن قوشتاسقان تۇلەكتەردى قۇتتىقتاپ, «نازارباەۆ زياتكەرلىك مەكتەپتەرى» دببۇ باسقارما ءتورايىمى كۇلاش شامشيدينوۆانىڭ قۇتتىقتاۋ حاتىن وقىپ بەردى.
- قۇرمەتتى تۇلەكتەر! سىزدەردى بۇگىنگى مەكتەپ بىتىرۋلەرىڭىزبەن شىن جۇرەكتەن قۇتتىقتايمىن! شەكارا دەگەن تۇسىنىككە باعىنباعان بۇكىلالەمدىك ىندەت كوروناۆيرۋس پاندەمياسىمەن قۇرەسۋ ماقساتىندا ەلىمىزدە توتەنشە جاعدايدىڭ ورىن الۋىنا بايلانىستى بۇگىن سىزدەرمەن ونلاين-كەزدەسىپ وتىرمىز. سىزدەردى ساعىنساق تا, ەلىمىزدىڭ جاس ۇرپاعىنىڭ دەنساۋلىعى بارىنەن ماڭىزدى, دەدى ەرمەك سەرىك ۇلى.
كەيىن مەكتەپتىڭ قامقورشىلار كەڭەسىنىڭ توراعاسى بەكمۇرات ءجۇسىپوۆ تە تۇلەكتەردى وقۋ جىلىنىڭ اياقتالۋىمەن قۇتتىقتاپ, تۇلەكتەرگە ۇلكەن ومىرگە ءساتتى قادام تىلەدى. سالتاناتتى جيىننان سوڭ, وقۋشىلار ەلىمىزدىڭ تانىمال ءانشىسى ديماش قۇدايبەرگەننىڭ نزم تۇلەكتەرىن قۇتتىقتاۋ ۆيدەوسىن تاماشالادى.
ايتا كەتۋ كەرەك, بيىل زياتكەرلىك مەكتەپتى 162 تۇلەك اياقتاپ وتىر. بۇل – وقۋ ورنىنىڭ تاريحىنداعى ەڭ كوپ تۇلەك. وقۋ جىلىنىڭ اياعىندا 9 التىن بەلگى, 9 ۇزدىك اتتەستاتقا ۇمىتكەر ءوز بىلىمدەرىن دالەلدەپ, ۇزدىك ناتيجە كورسەتتى. سونىمەن قاتار, بيىلعى وقۋ جىلىندا تۇلەكتەردىڭ IELTS جانە SAT ەمتيحاندارىنداعى كورسەتكىشى دە جوعارى ەكەندىگى بايقالىپ وتىر. ماسەلەن, اعىلشىن ءتىلىن مەڭگەرۋ دەڭگەيىن انىقتايتىن IELTS ەمتيحانىنان دايانا بۋلاتبەكوۆا, ايگەرىم شوراەۆا, ءىنجۋ كوشەرباەۆا, ماليكا نۇرمۇحامەت جانە امينا ابيل 8,0 بالل جينادى.
اقتاۋداعى نازارباەۆ زياتكەرلىك مەكتەبىنىڭ بيىلعى جىلعى تۇلەكتەرى اقش,كانادا, نيدەرلاند, وڭتۇستىك كورەيا, گونكونگ, ۆەنگريا, سينگاپۋر, تۇركيا, رەسەي ەلدەرىندەگى بەلدى ۋنيۆەرسيتەتتەرىنىڭ ستۋدەنتى اتانۋعا شاقىرتۋ الدى. 23 تۇلەك نازارباەۆ ۋنيۆەرسيتەتىنىڭ (Foundation – 17, Direct - 6), 12 –تۇلەك ۆەنگريا ۋنيۆەرسيتەتتەرىنە 100 % ءبىلىم گرانتىن السا, 40-تان اسا تۇلەك كانادا, اقش, تۋركيا, گونكونگ جانە ۆەنگريا ۋنيۆەرسيتەتتەرىنەن جاۋاپ كۇتۋدە.
ماڭعىستاۋ وبلىسى
