• 30 قىركۇيەك, 2013

حوككەي. «بارىس» مينسكىدە «دينامونى» جەڭدى

300 رەت

كورسەتىلدى

1 مين

وقۋ ءۇشىن

Egemen Qazaqstan

01-10-13-hokkey-minsk-1

استانانىڭ «بارىسى» قۇرلىقتىق حوككەي ليگاسى چەمپيوناتىندا 30 قىركۇيەك كۇنى تۇندە بەلارۋستىڭ استاناسى – مينسك قالاسىندا جەرگىلىكتى «دينامومەن» كەزدەسىپ, الاڭ يەلەرىن 5:2 (1:0, 3:2, 1:0) ەتىپ جەڭدى. بۇل تۋرالى Vesti.kz ءتىلشىسى حابارلادى. ماتچ «مينسك-ارەنا» ستاديونىندا ءوتتى. وندا ءبىرىنشى بولىپ 5-مينۋتتا تالعات جايلاۋوۆ ەسەپ اشتى. الاڭ يەلەرى بۇعان ەكىنشى كەزەڭدە عانا جاۋاپ قايتارا الدى. ولار ەسەپتى تەڭەستىرىپ قانا قويماي, ءتىپتى العا دا شىعىپ كەتتى. مۇنى ءبىزدىڭ ۆيتالي ەرەمەەۆ قورعاعان قاقپاعا ءبىر مينۋتتىڭ ىشىندە ەكى شايبا سالعان ولەگ گوروشكو پەن الەكسەي ەفيمەنكو جاسادى. الايدا, «بارىستىڭ» شابۋىلشىسى برەندون بوچەنسكي سالعان ەكى شايبا تاعى دا قوناقتاردى العا شىعاردى. ال رومان ستارچەنكونىڭ گولى ايىرمانى ەكى شايباعا دەيىن جەتكىزدى. سوڭعى كەزەڭدە استانالىقتار مينسكىلىكتەردىڭ لارس حاۋگەن قورعاعان قاقپاسىن تاعى ءبىر مارتە ءدال كوزدەدى. ونى تاعى دا برەندون بوچەنسكي ءتۇسىرىپ, حەت-تريك جاسادى. وسى جەڭىستەن كەيىن ۇپاي سانىن 24-كە جەتكىزگەن «بارىس» شىعىس كونفەرەنتسياسىنداعى توپ باستاۋشىلىق ءرولىن وزىنە قايتارىپ الدى. ول وسىنىڭ الدىندا عانا الدىن وراپ كەتكەن قازاننىڭ «اق بارىسىن» تاعى 1 ۇپايمەن ارتتا قالدىردى. بۇعان قوسا, استانالىقتاردىڭ ودان ءبىر ويىنى كەم. «بارىس» كەلەسى ويىنىن 2 قازان كۇنى ماسكەۋدە «سپارتاكقا» قارسى وتكىزەدى. ويىن استانا ۋاقىتىمەن ساعات 21:30-دا باستالادى. دامير قوجامقۇل.