كەشە, 29 قىركۇيەك كۇنى ەجەلگى گرەك جەرىندە الداعى جىلدىڭ اقپان ايىنىڭ 7-سىندە رەسەيدىڭ سوچي قالاسىندا باستالاتىن XXII قىسقى وليمپيالىق ويىنداردىڭ الاۋى تۇتاندى. ەندى وسى وتتى شىعىرشىقتى الىپ جۇرەتىن ەستافەتا ءۇش ايدان استام ۋاقىت جەر-دۇنيەنىڭ ءبىراز جەرىن شارلاپ كەلىپ, قارا تەڭىزدىڭ جاعاسىنداعى قالاعا ويىنداردىڭ سالتاناتتى اشىلاتىن كۇنى كەلىپ جەتەدى.
ەرتەدەن كەلە جاتقان اڭىزدارعا سايكەس, وتتى تۇتاتۋ ءراسىمى ءبىزدىڭ زامانىمىزعا دەيىنگى VIII عاسىردا العاشقى دانەگى ءونىپ شىققان وليمپيالىق ويىندار مەكەنى – وليمپيا تاۋىنداعى گەرانىڭ حرامىنىڭ قيراندىسى ەتەگىندە كەرۋەن كەردى. بۇرىننان قالىپتاسقان ءۇردىس بويىنشا, تەاترلاندىرىلعان قويىلىم وينالىپ بىتكەننەن كەيىن, ابىز قىز پروتيەريا بولىپ ويناعان افينالىق بويجەتكەن پارابوليكالىق اينانىڭ كومەگىمەن كۇن ساۋلەسىنەن الىنعان قىزۋ ارقىلى وليمپيالىق الاۋدى تۇتاتتى.
وسىدان كەيىن وتتى تۇعىردى ءبىرىنشى بولىپ گرەكتىڭ 18 جاسار شاڭعىشىسى ياننيس انتونيۋ الدى. ول ءبىرشاما ۋاقىت جۇگىرىپ وتكەننەن كەيىن ونى حوككەيدەن رەسەي قۇراماسىنىڭ مۇشەسى الەكساندر وۆەچكيننىڭ قولىنا ۇستاتتى.
بۇل ەستافەتا ەندى بەس كۇن بويى گرەكيا قالالارى اۋماعىنان ءجۇرىپ وتەدى. الاۋ سودان سوڭ, 5 قازان كۇنى «سوچي-2014» ۇيىمداستىرۋ كوميتەتىنىڭ دەلەگاتسياسىنا تاپسىرىلىپ, ۇشاقپەن ماسكەۋگە جەتكىزىلەدى. ال 7 قازاننان باستاپ الاۋدىڭ ۇزىن-ىرعاسى 123 كۇنگە سوزىلاتىن رەسەيلىك مارافونى باستالادى. ونىڭ سوڭى 7 اقپان كۇنى سوچيگە كەلىپ تابان تىرەۋمەن اياقتالادى.
بۇدان بۇرىن وليمپيادانى ۇيىمداستىرۋشىلار وتتىڭ قاي جەرلەردە بولاتىنىن دا ايتىپ وتكەن ەدى. تاريحتاعى ەڭ ۇزاق ەستافەتا – 2,9 مىڭ شاقىرىمدىق جول كالينينگراد پەن ۆلاديۆوستوكتىڭ اراسىن جالعايدى. وليمپيادانىڭ باستى ءرامىزىن الىپ جۇرۋگە بارلىعى 14 مىڭ الاۋشى قاتىسادى.
وليمپيا الاۋى جولاي تۋلا وبلىسىنداعى «ياسنايا پوليانا», نوۆگورود جەرىندەگى «ريۋريكتەر قالاشىعى» ارحەولوگيالىق ەسكەرتكىشتەر اۋماعى مەن تيۋمەن ولكەسىندەگى توبىل كرەملى سەكىلدى تاريحي تانىمال مەكەندەرگە ارنايى ايالداپ وتەدى. وتتى شىعىرشىق سونداي-اق كارەلياداعى اتاقتى «كيجي» مۇراجاي-قورىعى مەن رەسەيدىڭ پلەتسەسك عارىش ايلاعىندا دا بولادى.
الاۋ كولىكتىڭ الۋان ءتۇرلى قۇرالدارىمەن دە الىپ وتىلەدى. ول اەروستاتپەن اۋاعا كوتەرىلىپ, ونىمەن بىرگە اسپالى جولدىڭ بويىمەن قۇلدىرايدى. ونى ورىستىڭ ءۇش ات جەككەن تارانتاسى دا الىپ جۇرەدى.
رۋسلان يگىلىك.
