ەلباسى • 24 مامىر، 2020

ورازا ايت يسلامنىڭ باستى رۋحاني قۇندىلىقتارىن دارىپتەيدى - ەلباسى

35 رەت كورسەتىلدى

تۇڭعىش پرەزيدەنت – ەلباسى نۇرسۇلتان نازارباەۆ ورازا ايت مەرەكەسىمەن قۇتتىقتادى. بۇل تۋرالى ەلباسىنىڭ ءباسپاسوز قىزمەتى حابارلادى.

قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان نازارباەۆتىڭ ورازا ايت مەرەكەسىمەن قۇتتىقتاۋى

 

قۇرمەتتى وتانداستار!

بارشاڭىزدى مۇسىلمانداردىڭ قاسيەتتى ورازا ايت مەرەكەسىمەن قۇتتىقتايمىن!

رامازان ايىنىڭ اياقتالعانىن بىلدىرەتىن بۇل مەيرام يسلامنىڭ ەڭ باستى رۋحاني قۇندىلىقتارى – جاقسىلىقتى، كەڭ پەيىلدىلىك پەن مەيىرىمدىلىكتى دارىپتەيدى.

يسلام ءبارىمىزدى بەيبىتشىلىككە، بىرلىك پەن تۇراقتىلىققا شاقىرادى. بۇل قۇندىلىقتار مۇسىلمان ۇمبەتىمەن بىرگە بارلىق ءدىن وكىلىنە جاقىن. سوندىقتان ءبىزدىڭ ەلىمىزدە ورازا ايت ءدىني سەنىمىنە قاراماستان كۇللى قازاقستاندىقتى بىرىكتىرە تۇسەدى.

وسى داستۇرلەردى ودان ءارى نىعايتۋ، ادامگەرشىلىك قۇندىلىقتاردى باعالاي ءبىلۋ ماڭىزدى. بۇل – قازاقستاننىڭ تۇراقتى جانە سەنىمدى دامۋىنىڭ نەگىزى.

مەرەكە كۇندەرى جاقسى ىستەر جاسالىپ، جاقىن ادامدارعا قامقورلىق، مۇقتاج جاندارعا قولداۋ كورسەتىلەدى. مەيرام قوعامداعى ءوزارا تۇسىنىستىك پەن كەلىسىمدى نىعايتۋعا سەپتىگىن تيگىزەدى.

وسىناۋ قاستەرلى كۇن سەكىلدى ءبىزدىڭ ءومىرىمىز دە يگى ىستەرگە، ىزگى ويلار مەن مەيىرىمدىلىككە تولى بولسىن.

بارشا قازاقستاندىققا رۋحاني كۇش-قۋات، زور دەنساۋلىق جانە باق-بەرەكە تىلەيمىن!

ورازا ايت قابىل بولسىن!

سوڭعى جاڭالىقتار

ۇقساس جاڭالىقتار