ايماقتار • 22 مامىر، 2020

ءبىز ءار كومپانيامەن جەكە جۇمىس ىستەيتىن بولامىز - التاي كولگىنوۆ

17 رەتكورسەتىلدى

ەلوردا اكىمى قۇرىلىس قارقىنىن ارتتىرىپ، جۇمىس ساپاسىنا ەرەكشە نازار اۋدارۋدى جانە نىسانداردا قاتاڭ سانيتارلىق نورمالاردى ساقتاۋدى تاپسىردى. بۇل تۋرالى قالا اكىمدىگىنىڭ رەسمي سايتى حابارلادى.

نۇر-سۇلتان قالاسى اكىمى التاي كولگىنوۆ قۇرىلىس كومپانيالارى باسشىلارىمەن كەزدەستى. ونلاين-جينالىستا الدىن-الا جوبالاۋدىڭ دايىندىعى، جەكە جوبالاۋدى جوسپارلاۋ، ينجەنەرلىك جەلىلەر مەن جۇيەلەردىڭ ورناتىلۋى جانە ت.ب. ماسەلەلەر تالقىلاندى. مەملەكەت باسشىسى قاسىم-جومارت توقاەۆتىڭ تاپسىرماسىمەن بيىل قۇرىلىس كولەمى ارتادى. 2020 جىلى نۇر-سۇلتان قالاسىندا جەڭىلدەتىلگەن باعامەن ساتىلاتىن 8 مىڭنان استام پاتەر سالىنادى (2019 جىلى 2900 پاتەر پايدالانۋعا بەرىلدى). جالپى، بيىل تۇرعىن ءۇيدىڭ جالپى كولەمى شامامەن 3 ميلليون شارشى مەترگە جەتتى. جىل باسىنان بەرى ەلوردادا 637 مىڭ شارشى مەتر پايدالانۋعا بەرىلدى.

ء«بىز بىرلەسە الدىمىزعا ورتاق مىندەت قويىپ، جۇمىس جاساۋدامىز. ول – ازاماتتارىمىز ءۇشىن ءۇي سالۋ. بيىل مەملەكەت باسشىسىنىڭ تاپسىرماسى بويىنشا، قۇرىلىس كولەمىن ارتتىرامىز، جەڭىلدەتىلگەن باعامەن بەرىلەتىن 8 مىڭنان استام پاتەر سالامىز. مىسالى، وتكەن جىلى 2900 الەۋمەتتىك پاتەر سالىندى. الەۋمەتتىك تۇرعىن ءۇي كەزەكتە تۇرعان ازاماتتارعا ارنالعان. ياعني، بۇل از قامتامتىلعان ازاماتتار ساناتى، «تۇرعىن ءۇي قۇرىلىس جيناق بانكىنىڭ» كەزەكتە تۇرعان سالىمشىلارى. ءبىز باسپاناعا كەزەكتى مەيلىنشە جىلدامداتۋعا تىرىسامىز. ءوز تاراپىمىزدان سىزدەردى قولداۋعا ءازىرمىز. بيۋروكراتيا بولماۋى كەرەك، قاجەت بولعان جاعدايدا ءار قۇرىلىس كومپانياسىمەن جەكە جۇمىس ىستەيمىز. سونداي-اق بيىل كەلەسى جىلعا دا جوسپار دايىنداۋ قاجەت»، - دەدى ەلوردا اكىمى التاي كولگىنوۆ.

كەزدەسۋ بارىسىندا التاي كولگىنوۆ جۇمىسپەن قامتۋ ورتالىعى ارقىلى جاڭا كادرلار الۋ كەرەكتىگىن ايتتى.

«جۇمىسپەن قامتۋ جول كارتاسى» باعدارلاماسى بويىنشا 15 مىڭ جۇمىس ورنى اشىلادى. سونىمەن قاتار وبەكتىلەردە ماسكا كيۋ، قاشىقتىق ساقتاۋ، سانيتارلىق تازارتقىشتار مەن دەزينفەكتسيا قۇرالدارىن ورناتۋ سياقتى قاتاڭ سانيتارلىق ەرەجەلەردى ساقتاۋ قاجەت.

سوڭعى جاڭالىقتار

ۇقساس جاڭالىقتار