ەلوردادا بالالاردىڭ جازعى دەمالىسى قالاي ۇيىمداستىرىلادى؟

ايماقتار • 22 مامىر، 2020

ەلوردادا بالالاردىڭ جازعى دەمالىسى قالاي ۇيىمداستىرىلادى؟

26 رەت كورسەتىلدى

لاگەرگە 2،2 مىڭنان استام جەتىم بالا، اتا-اناسىنىڭ قامقورلىعىنسىز قالعان جانە «قيىن» بالالار قابىلدانادى، دەپ حابارلايدى ەلوردا اكىمدىگىنىڭ رەسمي سايتى.

Egemen Qazaqstan

«جازعى دەمالىسقا شىققان وقۋشىلاردىڭ اتا-انالارىن لاگەرلەردىڭ جۇمىس جاساۋى مەن جازعى دەمالىستىڭ ۇيىمداستىرىلۋى الاڭداتادى. بيىل بالالارعا ارنالعان جازعى دەمالىس قالا سىرتىنداعى لاگەرلەردە وتەدى. «اrman» تۋريستىك-ساۋىقتىرۋ كەشەنى 900 بالانى قابىلداي الادى، 750 ورنى بار «بوروۆيچوك» ساۋىقتىرۋ لاگەرى، 280 ورىندى «باتىر» شاتىرلى لاگەرى جانە 300 بالا قابىلداي الاتىن «تۇلپار» لاگەرى جاز ايلارىندا جۇمىس ىستەيتىن بولادى»، - دەپ نۇر-سۇلتان قالالىق ءبىلىم باسقارماسىنىڭ باسشىسى شولپان قادىروۆا بۇگىنگى بريفينگتە مالىمدەدى.

بۇل لاگەرلەردە جەتىم بالالار، اتا-اناسىنىڭ قامقورلىعىنسىز قالعان بالالار، «قيىن» بالالار مەن كوپ بالالى جانە از قامتىلعان وتباسى بالالارى دەمالا الادى. سونىمەن قاتار، وقۋشىلار سارايىندا جازعى دەمالىس اكادەمياسى ۇيىمداستىرىلادى. «بيىلعى حالىقارالىق بالالاردى قورعاۋ كۇنى

«بارلىعى بالالار ءۇشىن» دەگەن ۇرانمەن وتەدى. جوسپارلانعان ءىس-شارالارعا #NS_balalarkuni_bilim حەشتەگى قويىلادى. مەيرام كۇنى ينستاگرام الەۋمەتتىك جەلىسىندە بالالار پسيحولوگىنىڭ، ىشكى ىستەر ورگاندارى وكىلدەرىنىڭ، ادۆوكاتتاردىڭ، ءبىلىم بەرۋ ۇيىمدارى مەن ۇەۇ وكىلدەرىنىڭ قاتىسۋىمەن تىكەلەي ەفير ۇيىمداستىرىلادى جانە اتا-انالار مەن بالالار قۇقىقتىق كومەك پەن كەڭەستەر الا الادى»، - دەدى ش.قادىروۆا.

سپورت مەكتەبىنىڭ اشىلۋى كۇنى جۇزىك اتۋ، بەس تاس، اسىق اتۋ، توعىزقۇمالاق، لاڭگى تەبۋ، كىر تاسىن كوتەرۋ، قازاق كۇرەسى بويىنشا جارىستار مەن ماستەر-كلاستار ۇيىمداستىرىلادى.

بالالار «سوقپاق-تروپينكا» تۋريستىك جولاعىندا كەدەرگىلەردەن ءوتىپ، «ەكو ASAR»-عا قاتىسادى. سونىمەن قاتار، قيىن جاعدايداعى بالالاردى قولداۋ ورتالىعى مەن «SOS استانا بالالار اۋىلىنىڭ» تاربيەلەنۋشىلەرى ءۇشىن مەرەكەلىك باعدارلاما ۇيىمداستىرىلادى.