اۋداندا وسى جۇقپالى اۋرۋعا قارسى جەدەل شتاب قۇرىلىپ, جۇمىس ىستەۋدە. ول اۋدان اۋماعىندا كوروناۆيرۋس ىندەتىنە جول بەرمەۋ جوسپارىنا جانە كۇدىكتىلەر انىقتالعان جاعدايدا دەرەۋ حابارلاۋ سىزباسىنا سايكەس جۇمىس ىستەيدى. اۋداندىق اۋرۋحانادا كارانتيندىك رەجيم ەنگىزىلگەن. كوروناۆيرۋس ىندەتىنە كۇدىكتى پاتسيەنتتەرگە ارنالعان 4 وقشاۋلاۋ ورنى ەمحانانىڭ كۇندىزگى ستاتسيونارىنىڭ نەگىزىندە دايىندالعان.
اعىمداعى جىلدىڭ 1-26 ساۋىرىندە باسقارماعا 2 وڭ COVID-19 تالداۋ ناتيجەلەرى ءتۇستى. ەكى جاعداي دا بوزايعىر اۋىلدىق وكرۋگىندە تىركەلدى. بىرەۋى 2018 جىلى تۋعان بالا, نۇر-سۇلتان قالاسىندا تۇرادى. ەكىنشىسى وسى قالاداعى «ننتسوت», ياعني, ترانسپلانتولوگيا جانە ونكولوگيا ينستيتۋتىنىڭ مەديتسينا قىزمەتكەرى بولىپ جۇمىس ىستەيتىن 1990 جىلى تۋعان ادام. ولاردى گوسپيتالعا تاسىمالداۋ, اۋرۋ وشاعىن دەزينفەكتسيالىق وڭدەۋ, سانيتارلىق-ەپيدەميولوگيالىق تەكسەرۋ جانە جاقىن ادامدارىن انىقتاۋ جۇمىسى جۇرگىزىلدى. تەكسەرە كەلگەندە, بۇل ىندەت بايلانىستا بولعان ادامدارعا جۇقپاعان. مەديتسينا قىزمەتكەرلەرى مەن ەپيدەميولوگتاردىڭ اراسىندا بارلىق شارالار ۋاقىتىلى ءارى كاسىبي تۇردە جۇرگىزىلدى دەپ ايتۋعا بولادى. 2018 جىلى تۋعان بالا ساۋىقتى. اتا-انالارى ءۇشىن مۇنىڭ ءوزى ۇلكەن قۋانىش. دەگەنمەن, ونىمەن بىرگە بولعان ادامدار مەن تۋعان-تۋىسقاندارىنىڭ اۋىرماۋى ءۇشىن كوپتەگەن جۇمىس ىستەلدى.
