قاۋىپسىزدىك ادام ومىرىندەگى ەڭ ماڭىزدى فاكتوردىڭ ءبىرى بولىپ تابىلادى. وسى ورايدا, اتالمىش دەپارتامەنت ءوز قۇزىرى اياسىندا ءوڭىردىڭ سۋ ايدىندارىندا ەرەسەكتەر مەن بالالار ولىمىنە جول بەرمەۋ شارالارىن قامتاماسىز ەتەدى. اقمولا وبلىسىنىڭ اۋماعىندا دەمالاتىن جانە بالىق اۋلايتىن 754 سۋ ايدىنى بار.
– نۇرا مەن ەسىل وزەندەرى ەڭ قاۋىپتى سۋ ايدىندارى بولىپ تابىلادى. مۇندا ەكى جىلدىڭ ىشىندە 14 ادام, ونىڭ ىشىندە 5 بالا سۋعا كەتتى. وتكەن جىلدىڭ سۋعا شومىلۋ ماۋسىمىندا وبلىستىڭ سۋ ايدىندارىندا بارلىعى 22 ادام, ونىڭ ىشىندە 7 ءجاسوسپىرىم قايتىس بولدى. بارلىق وقيعا قۇتقارۋ بولىمشەلەرى جوق, كۇزەتىلمەيتىن سۋ ايدىندارىندا جانە جابدىقتالماعان سۋعا شومىلۋ ورىندارىندا تىركەلدى. بيىلعى جىلدىڭ 1 ماۋسىمىندا سۋعا شومىلۋ ماۋسىمى باستالادى. كارانتين اياقتالىسىمەن جانە جازعى دەمالىس باستالىسىمەن وبلىس تۇرعىندارى مەن مەيماندارى دەم الۋ ءۇشىن دەمالىس اۋماعىنا, كەمپينگتەرگە, ءارتۇرلى سۋ ايدىندارىنا كوپتەپ بارادى. وسى ورايدا, سۋدا ادام ولىمىنە جول بەرمەۋ ماقساتىندا دەپارتامەنت وبلىستىڭ جەرگىلىكتى اتقارۋشى ورگاندارىمەن بىرگە كەشەندى الدىن الۋ شارالارىن جۇرگىزۋدە. وبلىستىڭ سۋ ايدىندارىندا قۇتقارۋ جۇمىسىن جۇرگىزۋ ءۇشىن دەپارتامەنتتىڭ ارنايى وتريادىندا 61 كاسىبي قۇتقارۋشى, 4 قۇتقارۋ بولىمشەسى, بۋراباي, زەرەندى, قوپا جانە ششۋچە كولدەرىندە سۇڭگۋىرلەر بولىمدەرى دايىندالدى. ولاردىڭ تەحنيكاسى مەن ءجۇزۋ قۇرالدارى, سۋ استى جابدىقتارى پايدالانۋعا دايىن. بالالار جىل سايىن سۋدا مالتۋعا ۇيرەتىلەدى. بيىلعى جىلى وسىعان 165 بالا وقىتىلدى. سۋ كوزدەرىندە ادام ءولىمىنىڭ الدىن الۋ ءۇشىن باق قۇرالدارى جانە وزگە دە جولدارمەن ۇگىت-ناسيحات جۇمىستارى جۇرگىزىلەدى. سونداي-اق, كەرەك جەرلەردە «سۋدا شومىلۋعا بولمايدى» دەگەن بەلگىلەر ورناتىلۋدا. ازىرگە وسىنداي 160 بەلگى ورناتىلدى. زەرەندى مەن ەسىل اۋداندارى اۋماعىندا سۋعا تۇسەتىن كوممۋنالدىق ورىندار اشىلدى. بۇگىنگى كۇنى 55 قۇتقارۋشىسى بار 28 ماۋسىمدىق قۇتقارۋ بەكەتى قۇرىلدى. وبلىستىڭ سۋ ايدىندارىندا قايعىلى وقيعالاردىڭ الدىن الۋ ماقساتىندا وبلىس اكىمى «سۋعا شومىلۋ ماۋسىمىندا قاۋىپسىزدىكتى قامتاماسىز ەتۋ شارالارى تۋرالى» قاۋلىنى بەكىتتى.
سونداي-اق وبلىستا توتەنشە جاعدايدىڭ الدىن الۋ جونىندەگى كوميسسيانىڭ ەكى وتىرىسى بولىپ ءوتتى. مۇنداي وتىرىستار بارلىق قالا مەن اۋدانداردا وتكىزىلدى. دەگەنمەن, سوعان قاراماستان, بيىلعى جىلدىڭ وزىندە ەكى ادام سۋعا كەتتى. بۇدان شىعاتىن قورىتىندى, وزەن-كولدەردە ادامداردىڭ وزدەرى دە بارىنشا ساقتىق شارالارىن ساقتاپ, ءبىز دە وسى ماسەلەلەرگە مۇقيات كوڭىل ءبولىپ, تياناقتى جۇمىس ىستەۋىمىز كەرەك, – دەپ تۇيىندەگەن پولكوۆنيك قانات دوسپاەۆ سۋدا ءوزىن-ءوزى ۇستاۋدىڭ نەگىزگى ەرەجەسىن دە ەسكە سالدى.
