قالا دۇكەندەرىندە اتالعان ءونىم بەلگىلەنگەن باعا بويىنشا ساتىلادى. ولشەنىپ ورالعان ەتتىڭ (سيىر ەتى) 1 كەلىسىنىڭ باعاسى 1950 تەڭگەنى ء(توس-جاۋىرىن بولىگى: مسك, قابىرعالار, ءتوس ەتى) قۇرايدى.
باعانىڭ تومەندىگى ءونىمدى جەرگىلىكتى ءوندىرۋشىنىڭ ءوزى وندىرەتىنىنە, سونداي-اق دەلدالدار تىزبەگىنىڭ بولماۋىنا نەگىزدەلىپ تۇسىندىرىلەدى. بۇل رەتتە, دۇكەندەردىڭ ۇستەمە باعاسىنىڭ شەگى جاي كەزدەگى 15%-عا قاراعاندا, بار-جوعى 7%-دى عانا قۇرايدى.
«سوڭعى 2 ايدىڭ ىشىندە, ءبىز قالا بويىنشا, ونىڭ ىشىندە, جەرگىلىكتى اۋىلشارۋاشىلىعى وندىرۋشىلەرىمەن ءوزارا تىعىز بايلانىستا بولۋىمىزدىڭ جانە ولاردىڭ قول جەتىمدى باعامەن ۇسىناتىن ءونىمىنىڭ ارقاسىندا سيىر ەتىنە قويىلاتىن باعالاردىڭ تومەندەگەنىن اتاپ وتەمىز. ءبىز ءونىمدى تىكەلەي جەتكىزۋگە جانە, ءوز كەزەگىندە, ولاردى بارىنشا قولداۋعا دايىنبىز», – دەپ حابارلادى الماتى قالاسى كاسىپكەرلىك جانە ينۆەستيتسيالار باسقارماسىنىڭ باسشىسى ەركەبۇلان ورازالين.
قازىرگى ۋاقىتتا, وسى سيىر ەتى قالانىڭ 150 دۇكەنىندە ساتىلۋدا. جىلدىڭ سوڭىنا دەيىن ولاردىڭ سانىن 1000-عا دەيىن جەتكىزۋ جوسپارلانىپ وتىر. بارلىق ءونىم جان-جاقتى باقىلاۋدان وتەدى جانە «حالال» ستاندارتىن قوسا العاندا, حالىقارالىق جانە ەكولوگيالىق ستاندارتتارعا سايكەس كەلەدى.
ء«بىز ءوزىمىز فەرمەرلەرمىز, مالدى ءوزىمىز سويامىز, ولشەپ-ورايمىز جانە «ەگىننەن سورەلەرگە دەيىن» تۇجىرىمداماسىن ناقتى تۇردە ىسكە اسىرا وتىرىپ, دۇكەن سورەلەرىنە دەيىن جەتكىزەمىز, بۇل بىزگە بارلىق ساتىلاردا ءونىمنىڭ ساپاسىن باقىلاۋعا جانە ساپالى ءونىم ۇسىنۋعا مۇمكىندىك بەرەدى» دەپ اتاپ ءوتتى MPS جشس ساتۋ جونىندەگى ديرەكتورى ۆيكتور بەگۋن.
ەتتى قايتا وڭدەيتىن «اسىل ەت» كەشەنى الماتى قالاسىنان 30 كم جەردە (قوشمامبەت اۋىلى), الماتى وبلىسىنىڭ ەكولوگيالىق تازا – كەگەن جانە قاراساي اۋداندارىندا ورنالاسقان. كاسىپورىن, ونىڭ ىشىندە, جەم بەرۋ الاڭى حالىقارالىق ستاندارتتارعا سايكەس سالىندى. مالدى سويۋ, بارلىق سانيتاريالىق نورمالاردى ساقتاي وتىرىپ, جوعارى تەحنولوگيالىق زاماناۋي, اۆتوماتتاندىرىلعان زاۋىتتا جۇزەگە اسىرىلادى. بۇدان باسقا, كاسىپورىندا تۇتىنۋشىلاردىڭ اۋرۋ جۇقتىرۋ تاۋەكەلدەرىن بارىنشا تومەندەتەتىن مالدى جانە ەتتى تەكسەرۋگە ارنالعان جەكە اككرەديتتەلگەن زەرتحانا بار.
