سەناتورلار سونىمەن قاتار «قازاقستان رەسپۋبليكاسىنىڭ كەيبىر زاڭنامالىق اكتىلەرىنە مەملەكەتتىك قىزمەت ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن دا قارادى.
زاڭ جوباسىنىڭ نەگىزگى ماقساتى مەملەكەتتىك قىزمەت سالاسىنداعى زاڭنامانى ودان ءارى جەتىلدىرۋ بولىپ تابىلادى. وندا بىرقاتار زاڭنامالىق اكتىلەرگە وزگەرىستەر مەن تولىقتىرۋلار ەنگىزۋ كوزدەلگەن.
قوسىمشا بايانداما جاساعان سەناتور نۇرلان بەكنازاروۆ زاڭ جوباسى قازاقستان رەسپۋبليكاسى تۇڭعىش پرەزيدەنتى – ەلباسىنىڭ جانە مەملەكەت باسشىسىنىڭ تاپسىرمالارىنا سايكەس ازىرلەنگەنىن اتاپ ءوتتى. ۇسىنىلىپ وتىرعان زاڭ جوباسى مەملەكەتتىك قىزمەتتىڭ قازىرگى زامانعى قازاقستاندىق مودەلى مەريتوكراتيا قاعيداتتارىنا نەگىزدەلگەنى ايتىلدى.
زاڭ جوباسىمەن ەنگىزىلەتىن وزگەرىستەر:
-«ديپلوممەن – اۋىلعا!» جوباسىن مەملەكەتتىك قىزمەتشىلەرگە قولدانۋ;
-«ا» كورپۋسىنىڭ كادر رەزەرۆىن جاساقتاۋدان باس تارتۋ;
-بارلىق مەملەكەتتىك ورگانداردىڭ مەملەكەتتىك قىزمەتشىلەرى اراسىنداعى كونكۋرستىق راسىمدەردى 3 كەزەڭنەن 2 كەزەڭدىك ىرىكتەۋگە وڭتايلاندىرۋ;
-مەملەكەتتىك قىزمەتشىلەردىڭ بىلىكتىلىگىن ارتتىرۋدى جۇزەگە اسىراتىن ءبىلىم بەرۋ ۇيىمدارىنا قويىلاتىن تالاپتاردى ايقىنداۋ;
-سىبايلاس جەمقورلىق قۇقىق بۇزۋشىلىق نەمەسە مەملەكەتتىك قىزمەتكە كىر كەلتىرەتىن تارتىپتىك تەرىس قىلىق جاساعانى ءۇشىن جاۋاپكەرشىلىگى قارالاتىن ادامداردى باسقا مەملەكەتتىك لاۋازىمعا اۋىسۋىنا بايلانىستى جۇمىستان شىعارۋعا تىيىم سالۋدى ەنگىزۋ;
-مەملەكەت باسشىسىنىڭ شەشىمى بويىنشا جەكەلەگەن ساياسي لاۋازىمدارعا بىلىكتىلىك تالاپتارىن بەلگىلەۋ;
زاڭ جوباسى قابىلدانعاندا مەملەكەتتىك قىزمەت سالاسىنداعى زاڭناما ودان ءارى جەتىلدىرىلەتىن بولادى.
قۇجاتتار پالاتانىڭ قاراۋىنا بەرىلدى.
