قيىن ساتتە ەلمەن, حالىقپەن بىرگە ەكەندىكتەرىن كورسەتكەن اسكەريلەر بلوك-بەكەتتەردە ءتارتىپتى كۇشەيتىپ, زالالسىزداندىرۋ جۇمىستارىنا اتسالىستى. قالالىق پوليتسيا وكىلدەرىمەن بىرگە مولتەك اۋدانداردا پاترۋلدىك قىزمەت اتقاردى. وبلىس اكىمىنىڭ ورىنباسارى ساكەن قالقامانوۆ اسكەري مىندەتتىلەردى ارنايى جيىننىڭ اياقتالۋىمەن قۇتتىقتاپ, وبلىس اكىمىنىڭ العىس حاتىن تابىس ەتتى. «ارنايى جيىن ءبىر اي ىشىندە اۋقىمدى جۇمىستار اتقاردى.
اتاپ ايتقاندا, ماقتاارال اۋدانىندا بولعان تەحنوگەندى سيپاتتاعى توتەنشە جاعدايدىڭ سالدارىن جويۋ ءۇشىن تارتىلعان ماقتاارال, جەتىساي, سارىاعاش, كەلەس, شاردارا اۋداندارىنداعى بولىمشەلەرىنىڭ ساربازدارى ەرلىكپەن اسكەري قىزمەتىن اتقاردى. جيىن كەزىندە, ارقايسىڭىز جانقيارلىق پەن اسكەري ديستسيپلينانىڭ ۇلگىسى بولدىڭىزدار», دەگەن وبلىس اكىمىنىڭ ورىنباسارى, بىرقاتار جاۋىنگەرگە قورعانىس ءمينيسترى گەنەرال-لەيتەنانت ن. ەرمەكباەۆتىڭ ارنايى گراموتاسىن, وڭتۇستىك وڭىرلىك قولباسشىلىعى اسكەرلەرىنىڭ قولباسشىسى, گەنەرال-مايور ك. قاراقۇلوۆتىڭ العىس حاتىن تابىستادى.
جالپى, وبلىس بويىنشا 230 اسكەري مىندەتتى تىركەلگەن, ونىڭ 50-ءى تۇركىستان قالاسىنا جۇمىلدىرىلدى. ولارعا تۇراقتى جۇمىسىندا بەرىلەتىن جالاقى مولشەرى وزگەرىسسىز بەرىلىپ وتىردى. ال, جۇمىسسىز رەتىندە تىركەلگەن ازاماتتار 42500 تەڭگە كولەمىندە ايلىق العان.
تۇركىستان وبلىسى
