ايماقتار • 20 مامىر، 2020

جۇبانوۆ كوشەسىندەگى جايسىزدىق

29 رەت كورسەتىلدى

بۇل شاعىن اۋدان وبلىس ورتالىعىنىڭ كراسنويار اۋىلىنىڭ ورتاسىنداعى جول بويىنان ەڭسە كوتەرگەن. ۇزاق جىلدار بويى كوممۋنالدىق جاعدايى سىن كوتەرمەي، تۇرعىنداردىڭ ورىندى وكپە-رەنىشىن تۋدىرىپ  كەلە جاتقان جايى بار.

قالا  ىرگەسىندەگى   جۇبانوۆ  كوشەسىنىڭ  تۇرعىندارىن  30  جىلدان  بەرى  جول  ماسەلەسى الاڭداتۋدا. التى جىلدان  بەرى  قۇرىلىسى اياقتالماي كەلە جاتقان مەكتەپ، يەسىز قالعان ترانسفارماتور. كەشە بازىناسىن ايتقان تۇرعىندارمەن  قالا  اكىمى  امانگەلدى سمايىلوۆ كەزدەستى. ول حالىقتىڭ شاعىمىن تىڭداپ، تاياۋ ارادا تاپ-تۇيناقتاي ەتىپ  شەشۋگە  ۋادە  بەردى.

كەزدەسۋ بارىسىندا ايتىلعان شاعىم از ەمەس. بۇل شاعىن اۋداندا ءسال عانا جەل سوعىپ، داۋىل تۇرسا ەلەكتر قۋاتى ءوشىپ قالادى. بيىلعى كوكتەمدە مۇنداي وقيعا بىرنەشە رەت قايتالاندى. ەلەكتر قۋاتىمەن قامتىپ تۇرعان تراسفورماتوردىڭ ورناتىلعانىنا دا ءبىراز ۋاقىت ءوتتى. دەگەنمەن، تۇرعىندار ونىڭ تەحنيكالىق جاعدايىن قاداعالاپ، يە بولىپ جۇرگەن ەشكىمدى كورمەگەن.

–مەن وسى جەرگە ءبىرىنشى قونىستانعان ادامنىڭ ءبىرىمىن. مىنا ترانسفورماتور مەنىڭ كوز الدىمدا سالىندى. سودان بەرى جارىتىپ جۇمىس ىستەگەن ەمەس، دەيدى قالا تۇرعىنى بەرىك جۇماعۇلوۆ. 

قالا باسشىسى بۇل ماسەلەنىڭ تاياۋ ۋاقىتتا وڭ شەشىمىن تاباتىندىعىن ايتىپ، كوپشىلىكتى يلاندىرۋعا تىرىستى. اكىمنىڭ ۋاجىنە قاراعاندا، ەندى ەلەكتر قۋاتىنا جاۋاپتى  «ينۆەست  ەلەكترو»  مەكەمەسى  بولماق.

ء–بىز بۇل ترانسفورماتوردى كوممۋنالدىق مەنشىك يەلىگىنە بەردىك. مەكەمە باسشىسىن تۇرعىندارمەن كەزدەستىردىك. تەلەفونىن بەردىك. ەندى اپاتتى جاعداي ورىن السا، ولار بىردەن كەلەدى. ياعني، ديسپەتچەرلىك قىزمەت قۇرىلادى، دەيدى كوكشەتاۋ قالاسىنىڭ اكىمى امانگەلدى سمايىلوۆ.

كوشەنىڭ جايى تاراتىپ ايتساڭ، كوپ-كورىم جىر بولار ەدى. جاڭبىر جاۋسا، سۋعا تولادى. كوشە ەڭىستە ورنالاسقاندىقتان، تاۋ سۋى دا وسى باعىتقا اعادى. سوندىقتان، الداعى ۋاقىتتا قۇبىر سالىپ، سۋاعارلاردى، ارىقتاردى جونگە كەلتىرگەن ءلازىم. سولاي ىستەلسە، قارعىن سۋدان قارا جول دا ەزىلىپ، بۇزىلا بەرمەس ەدى.

–بيىل بارلىق 6 كىرمە جولعا اسفالت سالامىز. اينالما جول جاساپ، اۆتوبۋس جۇرزىگەمىز. ءۇش باعدارشام ورناتامىز. مەردىگەر كومپانيا – «كوكشەتاۋ جولدارى»، دەدى قالا اكىمى امانگەلدى سمايىلوۆ.

ازىرگە جۇبانوۆ كوشەسىنىڭ جۇرتى تولارساقتان ساز كەشىپ، ىمىرت ۇيىرىلگەندە كەيدە جارىق، كەيدە قاراڭعى ۇيلەرىندە لاجداپ كۇن كەشىپ جاتىر. اكىم ايتقان جاقسىلىق قاشان جارىلقار ەكەن؟!

 

كوكشەتاۋ قالاسى

سوڭعى جاڭالىقتار

ۇستازى جاقسىنىڭ ۇستامى جاقسى

رۋحانيات • بۇگىن، 18:30

بالقاشتا قار جاۋىپ جاتىر

اۋا رايى • بۇگىن، 15:48

توي تويلاۋ تىيىلماي تۇر

قوعام • بۇگىن، 10:45

ۇقساس جاڭالىقتار