– جاھاندىق ىندەت ءبىرىنشى كەزەكتە ەۋروپا ەلدەرىنە قيىن ءتيدى. قازىرگى جاعداي قالاي؟
– شىن مانىندە, ەۋروپانىڭ وزگە ەلدەرى سياقتى, ءبىز دە بىرتىندەپ ەكونوميكالىق قىزمەتىمىزدى باستاپ جاتىرمىز. دەسە دە, ۇيدە بولۋ تۋرالى نۇسقاۋلار قاتاڭ ساقتالۋدا. كارانتيننىڭ جاريالانعانىنا ەكى ايداي ۋاقىت بولعان ەكەن. قالا اكىمدىكتەرى ءالى دە ۇيدە بولۋدى مىندەتتەپ وتىر. ال اۋرۋدىڭ ورشۋىنە يا باسەڭدەۋىنە قاراي كارانتين تالاپتارىنا وزگەرىس بىرتە-بىرتە ەنگىزىلەدى.
– ءسىز تۇراتىن ايماقتا پاندەميا تۋرالى العاشقى جاڭالىقتار قاشان ايتىلا باستادى؟
– العاش اقپان ايىنىڭ سوڭىندا ۆيرۋسقا قاتىستى اقپاراتتار شىعا باستادى. مەن يتاليانىڭ ورتالىق بولىگىندە تۇرامىن. ال ۆيرۋس سولتۇستىكتە باستالدى. وزگە ايماقتاعىلار ادەتتەگى تۇماۋ دەپ ويلاپ, ءمان بەرگەن جوق. تەك ناۋرىز ايىنىڭ ورتاسىندا عانا مۇنىڭ وينايتىن ەمەس, ويلايتىن دۇنيە ەكەنىن ۇعا باستادىق. ال ەڭ باستى ماسەلە – ۆيرۋستا ەمەس, ينتەنسيۆتى تەراپيا ءۇشىن توسەك ورىندارىنىڭ جەتىسپەۋشىلىگىندە بولىپ شىقتى. وسىدان دا حالىق ىندەتتى اۋىر وتكەردى.
– ال توتەنشە جاعداي رەجىمى قالاي ەنگىزىلدى؟ سىزگە قالاي حابارلاندى؟
– ءبىزدىڭ ۇكىمەت ءتيىستى ساقتىق شارالارىن بىردەن ساقتامادى ءارى ۆيرۋستان ساقتانۋ تۋرالى قىتايدىڭ تاجىريبەسى مەن كەڭەستەرىن قۇلاققا ىلمەدى, باعالامادى. ءدال وسى سەبەپتى شەتەلدەن كەلگەن ادامدار ءتيىستى تۇردە باقىلاۋعا الىنعان جوق. سولتۇستىك ايماقتا اۋرۋ بەلگىلەرى بىلىنە باستاعاندا دا دەر كەزىندە ءتيىستى شەشىم قابىلدانبادى. يتاليا كوپتەگەن ايماققا بولىنگەن. ۇكىمەت ۆيرۋستىڭ وزگە ايماقتارعا تارالۋىن شەكتەۋ بويىنشا ارەكەت ەتە باستاعاندا, بارلىعى كەش ەدى. ستۋدەنتتەر يتاليانىڭ سولتۇستىگىنەن وڭتۇستىگىنە جاپپاي قاشۋىنا قاراماستان (بۇل وقيعا سولتۇستىك وبلىستاردى جابۋ تۋرالى شەشىم قابىلدانعان تۇندە بولعان) ىندەت وڭتۇستىك ايماققا تارالا قويمادى. ياعني سولتۇستىكتەگىدەي زارداپ شەككەندەر سانى وسپەدى. 9 ناۋرىز كۇنى تۇندە ۇكىمەت يتاليا تەرريتورياسىن تۇگەل جاۋىپ, ادامداردىڭ بارلىعىنا ۇيدە بولۋدى جانە جولعا شىقپاۋدى مىندەتتەدى. ال بۇل ۋاقىتتا مەن يسپانيادا جۇرگەن ەدىم. ماعان وتباسىم مەن دوستارىم حابارلاسىپ, ءمان-جايدى ايتتى. تەلەديدار ارقىلى دا حابار جەدەل تاراتىلىپ تۇردى. قازىر تۇرعىندارعا ءدارى-دارمەك ساتىپ الۋعا, دۇكەنگە بارۋعا عانا رۇقسات ەتىلدى. ءبىلىم بەرۋ سالاسى جانە وزگە دە باعىتتار بويىنشا جۇمىس قاشىقتان جالعاسىپ جاتىر.
– ال توتەنشە جاعداي ءسىزدىڭ جەكە ومىرىڭىزگە قالاي اسەر ەتتى؟
– مەن اقپاندا زاڭ ماماندىعى بويىنشا جوعارى وقۋ ورنىن ءبىتىردىم. وسىدان سوڭ يسپانيادا ەكولوگتار قاۋىمداستىعىمەن بىرنەشە ايلىق كەلىسىمشارتقا وتىردىم. توتەنشە جاعداي كەزىندە تۋعان قالام ارەتستسوعا ورالۋعا ءماجبۇر بولدىم. قازىر ۇيدەن جۇمىس ىستەپ جاتىرمىن. مامىر ايىندا كەلىسىمشارت اياقتالادى. سوندىقتان كەلەسى ايدا ماعان جۇمىس تابۋ قيىنعا سوعىپ تۇر. ويتكەنى قازىر كوپتەگەن مەكەمە جۇمىسىن توقتاتقان. ال كارانتين ءبىزدىڭ ءومىرىمىزدى تولىقتاي وزگەرتتى. كۇندىز جۇمىس ىستەيمىن, اراسىندا بوي جازىپ سپورتپەن اينالىسامىن. ءۇيدىڭ ۇساق-تۇيەك تىرشىلىگى بار, سونىمەن كۇنىمىز ءوتىپ جاتىر.
– بيلىك تاراپىنان قانداي كومەك كورسەتىلدى؟ الەۋمەتتىك تولەمدەر بەرىلدى مە؟
– بۇل رەتتە اسا حابارىم بولماي تۇر. ويتكەنى جولداسىم ەكەۋمىز اتا-انامىزبەن بىرگە تۇرامىز. ءوز ءۇيىمىز بار, سوندىقتان پاتەراقى تولەۋ بويىنشا ماسەلە جوق. ال جۇمىسسىز قالعان جاندارعا وتكەن ايدا 600 € (456 مىڭ تەڭگە شاماسىندا) تولەنگەن, وسى ايدا 800 € بولۋى مۇمكىن. ال ەلەكتر, سۋ جانە گاز اقىسىن تولەۋگە دە بىرقاتار جەڭىلدىك جاسالعان.
– ارامىزدا ىندەتتىڭ تارالۋىنا كۇمانمەن قارايتىندار دا بار. ولارعا قانداي كەڭەس بەرەر ەدىڭىز؟
– كارانتين اياقتالعانىمەن ىندەت ەشقايدا جوعالمايدى. سوندىقتان ساقتىق تالاپتارىن ءالى دە ساقتاعان دۇرىس. باسقوسۋلار مەن جينالىستاردى كەيىنگە شەگەرگەن ءجون. بەتپەردە كيۋ, قولدى ءجيى جۋ جانە انتيسەپتيكالىق قۇرالداردى پايدالانۋ ەكى اي ىشىندە كۇندەلىكتى ءومىر سالتىمىزعا اينالدى. مۇنى ۇمىتپاۋىمىز كەرەك!
– اڭگىمەڭىزگە راحمەت.
اڭگىمەلەسكەن
ايا ءومىرتاي,
«Egemen Qazaqstan»
