بۇل تۋرالى وبلىستىق اۋىل شارۋاشىلىعى باسقارماسى ۆەتەريناريالىق شارالاردى ۇيىمداستىرۋ ءبولىمىنىڭ باس مامانى ارمان تاعاەۆ وڭىرلىك كوممۋنيكاتسيالار قىزمەتىندە وتكەن ونلاين رەجيمدەگى بريفينگتە مالىمدەدى.
«توتەنشە جاعدايدان كەلگەن زارداپتاردى جويۋ ماقساتىندا وبلىستىق اۋىل شارۋاشىلىعى باسقارماسى, ماقتاارال اۋداندىق اۋماقتىق ينسپەكتسياسى جانە ماقتاارال اۋداندىق «ۆەتەريناريالىق قىزمەتى» وكىلدەرىنەن ارنايى كوميسسيا قۇرىلعان بولاتىن. جۇمىس بارىسىندا مال ولەكسەلەرىنىڭ سانى انىقتالىپ, ونىڭ كوپشىلىگى وزبەكستاننان اعىپ كەلگەنى بەلگىلى بولدى. قازىرگى تاڭدا مال شىعىنى تولىعىمەن ەسەپتەلىپ, ناتيجەسىندە 10,6 ملن تەڭگە وبلىستىق قوردان تولەۋ جولدارى قاراستىرىلۋدا», – دەدى ا.تاعاەۆ.
توپان سۋ باسقان ايماقتاردا اۋرۋدىڭ تارالۋىن بولدىرماۋ ماقساتىندا 1 018,5 مىڭ شارشى مەتر اۋماق زالالسىزداندىرىلعان. بۇل جۇمىستاردى اتقارۋعا 39 مامان مەن 16 تەحنيكا جۇمىلدىرىلىپتى. سونداي-اق اۋداندا ۆەتەريناريالىق قاۋىپسىزدىكتى قامتاماسىز ەتۋ ءۇشىن ولەكسەدەن تازارتىلعان اۋماقتاردى 3 پايىز كاۋستيكالىق سودامەن زالالسىزداندىرۋ جۇمىستارى جۇرگىزىلۋدە.
تۇركىستان وبلىسى
