اتىراۋ وبلىسىنىڭ اكىمى, Nur Otan پارتياسى وبلىستىق فيليالىنىڭ توراعاسى ماحامبەت دوسمۇحامبەتوۆتىڭ قولداۋىمەن جۇزەگە اسىرىلعان كومەكتى جىبەرۋ جونىندەگى شەشىم «دامبى» باستاۋىش پارتيا ۇيىمىنىڭ «نۇروتاندىق» بالىقشىلارى جالپى جينالىسىندا قابىلدانعان ەكەن. اتىراۋلىق بالىقشىلاردىڭ اماناتى ءمىرزاشول وڭىرىنە جەتكىزىلىپ, ورتالىق قويماعا قابىلدانىپ الىندى. سونىمەن بىرگە, «ترانسسەرۆيس اقجول» كومپانياسى اتىنان ازىق-ت ۇلىك پەن كيىم-كەشەك جەتكىزىلدى. جۇك كەرۋەنىن باستاپ كەلگەن وسى كومپانيانىڭ ديرەكتورى وتەگەن اينابەكوۆ اتىراۋلىق ازاماتتار اراسىندا كومەكتەسۋگە نيەتتىلەر وتە كوپ بولعانىن ايتادى.
بالىق دەمەكشى, ساردوبا سۋ قويماسىنان ماقتاارال اۋدانى اۋماعىنا اعىپ كەلگەن توپان سۋداعى بالىقتار جەۋگە جارامسىز ەكەنى انىقتالدى. اۋىل شارۋاشىلىعى مينيسترلىگى ۆەتەريناريالىق باقىلاۋ جانە قاداعالاۋ كوميتەتىنىڭ «رەسپۋبليكالىق ۆەتەريناريالىق زەرتحاناسى» ماماندارى وسىنداي قورىتىندىعا كەلىپ وتىر. زەرتحانا ماماندارىنىڭ ايتۋىنشا, توپان سۋداعى بالىقتاردىڭ ىشكى اعزالارىنان باكتەريالاردىڭ بىرنەشە ءتۇرى بار ەكەنى انىقتالعان. وسىعان وراي تۇركىستان وبلىستىق ورمان شارۋاشىلىعى جانە جانۋارلار دۇنيەسى اۋماقتىق ينسپەكتسياسى سارقىندى سۋلارداعى بالىقتاردى اۋلاپ, كوزىن جويۋ جۇمىستارىن باستاپ كەتتى. سونداي-اق, حالىق اراسىندا سارقىندى سۋداعى بالىقتاردى اۋلاۋعا, تۇتىنۋعا بولمايتىنى جونىندە ناسيحات جۇمىستارى جالعاسۋدا.
تۇركىستان وبلىسى
