800 بەتتى قۇرايتىن «زونتاگ: ءومىرى مەن شىعارماشىلىعى» اتتى كولەمدى بيوگرافيالىق ەڭبەككە رومانيست تۋرالى بۇرىن-سوڭدى جاريالانباعان سۇحباتتار مەن اڭگىمەلەر ەنگەن. بۇنىمەن قوسا زونتاگتىڭ جەكە ارحيۆىندەگى سۋرەتتەر مەن تاڭسىق ماتەريالدار دا بار. موزەر زونتاگتىڭ بيوگرافياسىنا جەتى جىل ۋاقىتىن ارناپ, التى جۇزدەي اداممەن پىكىرلەسكەن.
پۋليتتسەر سىيلىعىنىڭ تاريحى سوناۋ 1917 جىلدان باستالادى: سول جىلى امەريكاندىق جۋرناليست گەربەرت بايارد سۆوپ 1916 جىلدىڭ قازان ايىندا «New York World» گازەتىندە جاريالانعان «گەرمانيا يمپەرياسىنا ىشتەن كوزقاراس» دەگەن تاقىرىپتاعى ماتەريالدار سەرياسى ءۇشىن العاشقى سىيلىق العان ەدى. 21 نوميناتسيا بويىنشا بەرىلەتىن جۋرناليستيكا مەن ادەبيەت سالاسىنداعى بەدەلدى سىيلىقتىڭ تاريحىن ارىدەن قوزعاساق, دجوزەف پۋليتتسەر جۋرناليستيكاعا اياقاستى كەلگەن ەكەن. ول سەنت-لۋيستاعى كىتاپحانادا وتكەن شاحمات ويىنىندا باتىل پىكىر ايتىپ, گازەت رەداكتورلارىنىڭ كوزىنە ءتۇسىپتى. كەيىن ولار دجوزەفتى گازەتكە جۇمىسقا شاقىرادى. ستۋدەنتتەردى جۋرناليستيكاعا ۇيرەتۋدى پۋليتتسەر العاشقى بولىپ ۇسىنعان.
1911 جىلدىڭ قازان ايىندا ۆەنگەرلىك گازەتتىك ماگنات دجوزەف پۋليتتسەر ومىردەن وزىپ, سوڭىنا ونەگەلى وسيەت قالدىرادى. ول بويىنشا 2 ميلليون دوللار ءوز اتىنداعى جۋرناليستىك مەكتەپ اشۋعا جۇمسالعان. وسيەت 1903 جىلى تامىز ايىندا جازىلىپ, سول كۇننەن باستاپ پۋليتتسەر سىيلىعى راستالدى. ادەبيەت, جۋرناليستيكا, مۋزىكا جانە تەاتر سالالارى بويىنشا ۇزدىكتەر انىقتالىپ, ءار جەڭىمپازعا $10 000 تابىستالدى. ال كەيبىرىنە التىن مەدال بەرىلەدى.
جىل سايىن الەم ادەبيەتىنىڭ تىنىس-تىرشىلىگىنەن حابار بەرىپ, ۇزدىكتەردى تانىستىرىپ جۇرگەن پۋليتتسەر سىيلىعى قازاق اۆتورلارىنا دا بۇيىرسىن دەيمىز.
