سەناتورلار الدىمەن توتەنشە جاعدايعا بايلانىستى وبلىستىق شتابتىڭ ورتالىقتاندىرىلعان قويماسىندا بولدى. جالپى بۇگىنگە دەيىن قويماعا ەلىمىزدىڭ بارلىق وبلىستارىنان 620 توننادان استام تاۋار كەلىپ تۇسكەن. ونىڭ 220 تونناعا جۋىعى ەۆاكۋاتسيالىق پۋنكتتەردە ۋاقىتشا ورنالاسقان ازاماتتارعا ۇلەستىرىلىپ بەرىلگەن. «اۋىلدارىن توپان سۋ شايىپ, قيىندىققا دۋشار بولعان ماقتاارالدىقتاردىڭ ماسەلەسى ءبىزدى دە قاتتى تولعاندىردى. دەسەك تە, ەلباسىمىز, پرەزيدەنتىمىز, Nur Otan پارتياسى, وبلىس اكىمدىگى جانە بۇكىل وبلىستار بارىنشا كومەك قولىن سوزىپ, ءمىرزاشول حالقىمەن بىرگە ەكەنىن تانىتىپ جاتىر. الداعى 1-2 ايدا جاڭا ۇيلەر بوي كوتەرىپ, ەگىن, مال شىعىندارى تولىق تولەنىپ, بۇل قيىندىقتاردى دا ەڭسەرەتىنىمىزگە سەنىمدىمىز. سەنات دەپۋتاتتارى رەتىندە ماقتاارالدىقتارعا قاشاندا قولداۋ بىلدىرۋگە ءبىز دە دايىنبىز», دەيدى ءالي بەكتاەۆ.
دەپۋتاتتار سۋ باسىپ قالعان ورگەباس جانە فيردوۋسي اۋىلدارىنا بارىپ, تۇرعىنداردىڭ تالاپ-تىلەكتەرىن تىڭدادى. قازىرگى تاڭدا ارنايى مامانداردىڭ كومەگىمەن اۋىلداردى سۋدان تازارتۋ جۇمىستارى جالعاسۋدا. اپاتتىڭ زارداپتارىن جويۋعا نۇر-سۇلتان, شىمكەنت قالالارى مەن الماتى, جامبىل, قاراعاندى وبلىستارىنداعى توتەنشە جاعداي دەپارتامەنتتەرىنەن قوسىمشا كۇش تارتىلعان. بۇل جۇمىستارعا جالپى 37 تەحنيكا, 102 سورعىش, 1494 مامان جۇمىلدىرىلعان. بۇگىنگە دەيىن اۋىلداردى باسىپ قالعان سۋدىڭ 10 مىڭ تونناسى ناسوس ارقىلى قاۋىپسىز ايماققا شىعارىلعان. اتاكەنت كەنتى مەن ماقتاارال اۋىلدىق وكرۋگىندەگى №14 كوللەدجى مەن №42 جالپى ورتا مەكتەبىندەگى ەۆاكۋاتسيالىق بەكەتتەرىندە ۋاقىتشا ورنالاسقان تۇرعىندار دەپۋتاتتارمەن كەزدەسۋدە وسىنداي قيىن-قىستاۋ كەزەڭدە بار كومەگىن اياماعان ۇكىمەت پەن وبلىس باسشىلىعىنا جانە بارشا قازاقستاندىقتارعا شىنايى العىستارىن ءبىلدىردى.
سونداي-اق, حالىق قالاۋلىلارى جاڭادان بوي كوتەرىپ جاتقان ەلدى مەكەندە بولىپ, قۇرىلىس جۇمىستارىمەن تانىستى. توپان سۋدا قالعان جاڭاتۇرمىس, جەڭىس, دوستىق اۋىلدارىن باسقا جەرگە قونىستاندىرۋ ءۇشىن مىرزاكەنت كەنتىنەن جالپى 160 گەكتار اۋماققا 505 ءۇي سالىنۋدا.
