ەلىمىزدىڭ بارلىق وڭىرلەرىنەن كەلىپ جاتقان كومەككە العىس قايتارۋ ماقساتىندا اۋدان اكىمى باقىت اسانوۆتىڭ باستاماسىمەن جەكە كاسىپكەر قانات مارات ۇلى 600 توننا قىرىققاباتتى گۋمانيتارلىق كومەكتى الىپ كەلگەن وڭىرلەردىڭ جۇك كولىكتەرىنە تيەپ, تەگىن تاراتۋدا. كاسىپكەر ماقتاارالدىقتارعا قيىن تۇستا كومەك قولىن سوزعان ازاماتتارعا العىسپەن جاۋاپ قاتۋدى ازاماتتىق پارىزى سانايدى.
قوستاناي وبلىسىنىڭ تۇرعىندارى دا ماقتاارال اۋدانىنا گۋمانيتارلىق كومەك الىپ كەلىپ, جەرگىلىكتى جۇرتتىڭ العىسىنا بولەندى. «Birgemiz» اكتسياسى اياسىندا Nur Otan پارتياسىنىڭ قوستاناي وبلىستىق فيليالى جەرگىلىكتى «Salamat» جانە «اتامەكەن-دوس» جشس قولداۋىمەن توپان سۋدان زارداپ شەككەندەرگە 20 توننا گۋمانيتارلىق كومەك جىبەردى.
پارتيا بەلسەندىلەرى مەن ۆولونتەرلەرى بىرلەسە جيناعان كومەك تيەلگەن جۇك كولىگى ءۇش كۇن جول ءجۇرىپ, اتاكەنتتەگى ورتالىق قويماعا جەتتى.
