قاي ءتىل بولسا دا ادامدار ءسويلەسپەسە تۇل بولماي ما؟ اۋىز ادەبيەتى تەڭدەسسىز باي قازاق ءتىلى دە اۋىزەكى سويلەگەندە تۇساۋىن شەشكەن تۇلپارداي اشىلا, كوسىلە تۇسەتىنى راس. ادامدارعا قىزمەت كورسەتەتىن بايلانىس سالاسى جۇمىس بارىسىندا ناعىز ءتىلدىڭ قولدانىس اياسىن, ءورىسىن كەڭەيتەدى. جاقىندا قوستانايدا «مەملەكەتتىك ءتىل – ۇلت بىرلىگىنىڭ باستى فاكتورى» اتتى ءداستۇرلى تىلدەر فەستيۆالى ءوتتى. كولىك جانە كوممۋنيكاتسيا مينيسترلىگىنىڭ ۇيلەستىرۋىمەن جانە «قازاقتەلەكوم» اق ۇيىمداستىرۋىمەن وعان بايلانىس سالاسىنىڭ «قازاقتەلەكوم», «قازپوشتا», «قازتەلەراديو», «ترانستەلەكوم», «موبايل تەلەكوم سەرۆيس», «كسەلل» كومپانيالارىنىڭ التى كومانداسى قاتىستى.
قاي ءتىل بولسا دا ادامدار ءسويلەسپەسە تۇل بولماي ما؟ اۋىز ادەبيەتى تەڭدەسسىز باي قازاق ءتىلى دە اۋىزەكى سويلەگەندە تۇساۋىن شەشكەن تۇلپارداي اشىلا, كوسىلە تۇسەتىنى راس. ادامدارعا قىزمەت كورسەتەتىن بايلانىس سالاسى جۇمىس بارىسىندا ناعىز ءتىلدىڭ قولدانىس اياسىن, ءورىسىن كەڭەيتەدى. جاقىندا قوستانايدا «مەملەكەتتىك ءتىل – ۇلت بىرلىگىنىڭ باستى فاكتورى» اتتى ءداستۇرلى تىلدەر فەستيۆالى ءوتتى. كولىك جانە كوممۋنيكاتسيا مينيسترلىگىنىڭ ۇيلەستىرۋىمەن جانە «قازاقتەلەكوم» اق ۇيىمداستىرۋىمەن وعان بايلانىس سالاسىنىڭ «قازاقتەلەكوم», «قازپوشتا», «قازتەلەراديو», «ترانستەلەكوم», «موبايل تەلەكوم سەرۆيس», «كسەلل» كومپانيالارىنىڭ التى كومانداسى قاتىستى. «قازاقتەلەكوم» اكتسيونەرلىك قوعامى وسى شاراعا بيىل التىنشى رەت قاتىستى. ءتىل جارىسىنا قاتىسقان كوماندا قۇرامىنداعى ون قىزمەتكەردىڭ جەتەۋى وزگە ۇلت وكىلدەرى ەدى. فەستيۆال كومپانيالارداعى نەگىزگى قىزمەت باعىتى جانە مەملەكەتتىك ءتىلدى ەنگىزۋ ماسەلەلەرى بويىنشا وتكىزىلگەن سەمينارلار, بايقاۋلار جانە ءتۇرلى ءىس-شارالاردىڭ ماتەريالدارى ورنالاستىرىلعان ستەندتتەر ەكسپوزيتسياسىمەن باستالدى. «جايدارمان» فورماتىندا وتكەن نەگىزگى بايقاۋ «ەڭ ءبىرىنشى باقىتىم – ءتىلىم مەنىڭ...», «شيراتۋ», «ءازىل-وسپاق, تاپقىرلىق» جانە «ماماندىعىم – ماقتانىشىم» اتتى ءتورت كەزەڭنەن تۇردى. ولاردىڭ بارلىعىندا كوماندالار بايلانىس سالاسى قىزمەتكەرلەرىنىڭ جۇمىستاعى, ۇيدەگى ومىرىنەن قىزىقتى, كۇلكىلى وقيعالاردى, ساتتەردى كورسەتتى. مۇنىڭ ءوزى ءتىل ۇيرەنۋدى كۇندەلىكتى ومىردەگى اۋىزەكى اڭگىمە ارقىلى شيراتۋىمەن قاتار, فەستيۆالدىڭ كورەرمەندى زەرىكتىرمەيتىن قىزىقتى بولۋىنا دا ىقپال ەتتى.
– فەستيۆالدىڭ باستى ماقساتى – بايلانىس سالاسىنداعى ءىرى كومپانيالاردىڭ اراسىندا مەملەكەتتىك ءتىلدى مەڭگەرۋدى ناسيحاتتاۋ بولىپ تابىلادى. ءبىزدىڭ سالا قىزمەتكەرلەرى ءۇشىن مەملەكەتتىك ءتىلدى مەڭگەرۋدىڭ ماڭىزى زور. كەلۋشى قاي تىلدە قىزمەت كورسەتۋدى ءوتىنىش ەتسە, سول تىلدە جاۋاپ بەرۋگە مىندەتتىمىز. فەستيۆالدى «قازاقتەلەكوم» اكتسيونەرلىك قوعامى وسىمەن ءۇشىنشى رەت وتكىزىپ وتىر. 2007 جىلى ءبىزدىڭ كومپانيا ءىس جۇرگىزۋگە مەملەكەتتىك ءتىلدى ەنگىزۋگە, ول ءۇشىن بايلانىس وپەراتورلارىنىڭ كۇشىن بىرىكتىرۋگە باستاماشى بولعان ەدى, – دەيدى «قازاقتەلەكوم» اكتسيونەرلىك قوعامى ۇيىمداستىرۋ-باقىلاۋ دەپارتامەنتىنىڭ ديرەكتورى ناعيا سماعۇلوۆا. – كومپانيادا جىل بويى مەملەكەتتىك تىلگە قاتىستى جۇمىستار اتقارىلىپ وتىرادى.
كولىك جانە كوممۋنيكاتسيا مينيسترلىگى مەملەكەتتىك ءتىلدىڭ قولدانىس اياسىن كەڭەيتۋ جۇمىستارىنا ءجىتى قارايدى. بيىلعى فەستيۆالگە «قازاقتەلەراديو» كومانداسىنىڭ قوسىلۋى وسىنىڭ ءبىر دالەلى بولسا كەرەك. الداعى بەس جىلدا بايلانىس سالاسى كومپانيالارى اراسىندا تىلدەر فەستيۆالىن وتكىزۋگە جاۋاپتىلار بەلگىلەندى. كەلەسى جىلى ەستافەتانى «ك-سەll» كومپانياسى الاتىن بولدى.
قوستانايدا وتكەن تىلدەر فەستيۆالىندە قازاقشاسى يكەمگە كەلىپ قالعان «قازاقتەلەكوم» اكتسيونەرلىك قوعامىنىڭ كومانداسى ءبىرىنشى ورىندى يەلەندى. قالعان ەكى جۇلدەنى «ترانستەلەكوم» مەن «موبايل تەلەكومسەرۆيس» جاۋاپكەرشىلىگى شەكتەۋلى سەرىكتەستىگى ءبولىستى.
ءنازيرا جارىمبەتوۆا,
«ەگەمەن قازاقستان».
قوستاناي.
