ازاماتتاردىڭ قولجەتىمدى باسپانا الۋ مۇمكىندىكتەرىن كەڭەيتۋگە ەرەكشە نازار اۋدارىلدى. وسى ماقساتقا جەتۋ ءۇشىن مەملەكەت بىرقاتار جۇيەلى شارالاردى قابىلدايدى.
ساراپشى-ەكونوميست جاراس احمەتوۆ الەۋمەتتىك قولداۋ رەتىندە «5-10-20» باعدارلاماسى ەنگىزىلگەنىن, بۇل شارا تۇرعىن ءۇي ماسەلەسىن شەشۋگە كومەكتەسكەنىن ايتادى. «وسى باعدارلاما اياسىندا 390 ملرد تەڭگە ءبولۋ جوسپارلانعان. ەكىنشىدەن, «تۇرعىنۇيقۇرىلىسجيناقبانكى» پلاتفورماسىندا تۇرعىن ءۇيدى ءبولۋ پروتسەستەرىن جۇيەلەۋ ماقساتىندا ازاماتتاردىڭ ءومىر ءسۇرۋ جاعدايلارىن جاقسارتۋ جونىندەگى جۇمىستى كۇشەيتەتىن جاڭا مەكەمە - «وتباسى بانكى» قۇرىلادى. ۇشىنشىدەن, تۇرعىنداردىڭ زەينەتاقى جيناقتارىنىڭ ءبىر بولىگىن تۇرعىن ءۇي ساتىپ الۋ ءۇشىن پايدالانۋ تەتىكتەرىن ازىرلەۋ جوسپارلانۋدا» دەيدى جاراس احمەتوۆ.
بۇل تۇرعىدا ساراپشى زەينەتاقى جۇيەسىن سالىمشىلاردىڭ قاراجاتتى پايدالانۋدىڭ سينگاپۋرلىق تاجىريبەسىنە نازار اۋدارۋ قاجەتتىگىن ايتادى. «سينگاپۋرلىق زەينەتاقى جۇيەسىنىڭ باستى قۇرىلتايشىسى ورتالىق جيناقتاۋشى قور – حالىقتىڭ زەينەتاقىعا, تۇرعىن ۇيگە جانە مەديتسينالىق قىزمەتكە دەگەن قاجەتتىلىكتەرىن قاناعاتتاندىرۋعا مۇمكىندىك بەرەدى. وسى مودەلگە سايكەس قىزمەتكەرلەر مەن جۇمىس بەرۋشىلەر اي سايىن قىزمەتكەردىڭ زەينەتاقى شوتىنا بىرلەسكەن جارنالار ەنگىزەدى. كەيىننەن جيناقتالعان قاراجاتتى تۇرعىن ءۇي ساتىپ الۋعا, وقۋ اقىسىن تولەۋگە, مەديتسينالىق شىعىنداردى جابۋعا جانە باسقا ماقساتتارعا پايدالانۋعا بولادى» دەيدى ساراپشى.
زەينەتاقى جيناقتارىن پايدالانۋدىڭ ۇقساس ءادىسىن قازاقستاندا دا بەيىمدەۋگە بولادى. ايتا كەتۋ كەرەك, بۇگىنگى تاڭدا 10,69 ميلليون ازامات قازاقستاننىڭ زەينەتاقى جۇيەسىنە ينۆەستورلار بولىپ تابىلادى. «قازاقستاننىڭ زەينەتاقى جيناقتارى 11 ترلن تەڭگەدەن اسادى. حالىقتىڭ زەينەتاقى جيناقتارىنىڭ ءبىر بولىگىن پايدالانۋ تەتىكتەرىن ەنگىزۋ قازاقستاندىقتاردىڭ مەملەكەتتىك تۇرعىن ءۇي باعدارلامالارىنا قاتىسۋ مۇمكىندىكتەرىن كەڭەيتەدى» دەيدى ج. احمەتوۆ.
ساراپشى وسى رەتتە قازاقستاندىقتاردىڭ جيناقتارىن باسقارۋعا رۇقسات بەرۋ ازاماتتاردىڭ بەيرەسمي سەكتوردان كەتۋىنە جانە جيناقتاۋشى زەينەتاقى جۇيەسىنە ەنۋىنە قوسىمشا ىنتالاندىرۋعا مۇمكىندىك بەرەتىنىن ايتادى. «وسى باسىمدىقتارعا قول جەتكىزۋ ءۇشىن قازاقستان ۇكىمەتى مەملەكەت باسشىسىنىڭ تاپسىرماسى بويىنشا ازاماتتاردىڭ زەينەتاقى جيناقتارىن 2020 جىلدىڭ 1 شىلدەسىنە دەيىن پايدالانۋدىڭ ناقتى تەتىكتەرىن ازىرلەۋى كەرەك» دەيدى جاراس احمەتوۆ.
