قازاقستان كاسىپكەرلەرىنىڭ قۇقىعىن قورعاۋ جونىندەگى كوميسسارى رۋستام ءجۇرسىنوۆ كەشەگى ۆەبينار جيىندا الداعى ۋاقىتتا كاسىپورىندارعا شابۋىل جاساۋ تولقىنى بولۋى مۇمكىندىگىنەن قاۋىپتەنەتىنىن ايتتى.
«بۇل نازار اۋدارماساق بولمايدى. مەملەكەت باسشىسى بانكروتتىق تۋرالى شەشىمدى 2020 جىلدىڭ 1 قازانىنا دەيىن توقتاتا تۇرۋدى بۇيىردى. بىراق قازىر ءبىز مۇنى قالاي ىستەۋ كەرەكتىگىن ابدەن تالداپ, جاعدايدىڭ قالپىنا كەلە باستاۋىن كۇتۋىمىز كەرەك» دەدى ول.
ءجۇرسىنوۆ بارلىق كاسىپورىندار سۇرانىستىڭ تومەندەۋىنە بايلانىستى كىرىستى ازايتقانىن, اينالىمداعى از قارجى جۇمىستى جالعاستىرۋعا مۇمكىندىك بەرمەي وتىرعانىن دا ايتىپ ءوتتى. جۇمىس ىستەيتىن اقشا جوق, كەلىسىمشارتتىق قاتىناستار ورىندالمايدى. «ەگەر كومپانيانىڭ اينالىمىندا قارجى جەتكىلىكتى بولماسا, سالىق ورگاندارى ونىڭ بارلىق بانكتىك شوتتارىن جاۋىپ تاستايدى جانە بانكروتتىق تۋرالى ءىس جۇرگىزۋدى باستايدى. ءبىزدىڭ ەلدە, ادەتتە, مۇنداي راسىمدەر كومپانيانى ساۋىقتىرۋمەن اياقتالمايدى. قولدانىستاعى زاڭ بانكروتتىقتى بارىنشا تەزدەسۋگە باعىتتالعان. مۇنىڭ سوڭى كومپانيانىڭ اكتيۆتەرىن تالان-تاراجعا سالۋمەن اياقتالۋى مۇمكىن. ءدال قازىرگى جاعداي باردى جويۋ ەمەس, ساقتاپ قالۋعا باعىتتالۋى كەرەك» دەپ جالعاستىردى ۋاكىلەتتى وكىل.
ر. ءجۇرسىنوۆتىڭ پايىمداۋىنشا, كومپانيانى بانكروت دەپ تانيتىن ءىس-شارالار كارانتينگە دەيىن باستالعان بولسا, ونى جالعاستىرۋ دۇرىس. سەبەبى ول كومپانيانىڭ جۇمىسىن توقتاتۋىنا توتەنشە جاعدايدىڭ اسەرى از.
2019 جىلى بانكروتتىق تۋرالى قولدانىستاعى زاڭناماعا بورىشكەردىڭ قاۋقارسىزدىعىنا قاتىستى جاڭا انىقتاما ەنگىزىلگەن بولاتىن. جاڭا نورماعا سايكەس, بورىشكەردىڭ جالپى قارىزى ونىڭ بارلىق اكتيۆتەرىنەن ارتىق بولسا, سوت ءوز شەشىمىن شىعارا بەرەدى. سوندا قارىز اكتيۆتەن قانشاعا ارتىق بولۋى قاجەت؟ زاڭدا ول ايىرماشىلىقتىڭ ناقتى كولەمى كورسەتىلمەگەن. دەمەك, قارىزدىڭ سوماسى اكتيۆتەن ءسال-ءپال باسىم بولسا, كاسىپورىندى بانكروت دەپ جاريالانىپ كەلگەن. سول سەبەپتى ساراپشىلار توتەنشە جاعدايدا, جەڭىلدەتىلگەن ليكۆيداتسيانىڭ جاڭا مەxانيزمى ينۆەستيتسيالىق كليماتقا كەرى اسەرىن تيگىزۋى مۇمكىن ەكەنىن ايتىپ جاتىر. زاڭسىز ارەكەتتەر, رەيدەرلىككە جول بەرىلۋى ىقتيمال.
ايتا كەتەيىك, قر قارجى مينيسترلىگىنىڭ اقپاراتى بويىنشا 2019 جىلدىڭ باسىندا ەلىمىزدە 4000-عا جۋىق بيزنەس سۋبەكتىسى بانكروتتىق راسىمدەردەن ءوتىپ جاتىر. ال 400 كاسىپورىن وڭالتۋعا ءوتىنىش ءبىلدىردى.
2019 جىلدىڭ قورتىندىسى تۋرالى مالىمەتتەر ءالى جاڭارتىلعان جوق.
