«ياسنايا پوليانا» مۋزەي-ءۇيى جاساعان ەكى ونلاين شاراعا توقتالساق, «ياسنايا پوليانانىڭ سيمۆولدارى» اتتى مۋلتيمەديالىق جوبادا ۇلى جازۋشىنىڭ دۇنيەتانىمىنا قاتىستى ءھام وتباسى مەن ۇيىنە بايلانىستى جەتى وبەكت الىنعان. ونىڭ ارقايسىسى ەرەكشە سيمۆوليكالىق ماعىناعا يە. ماسەلەن, تولستوي ءۇيى – ءومىردىڭ سيمۆولى, قالامگەر كابينەتىندەگى ديۆان – تەكتىڭ سيمۆولى, لەۆ نيكولاەۆيچتىڭ قارىنداسى سىيلاعان جاستىق – ماحاببات سيمۆولى, جازۋشى ۇيىندە وسكەن اعاش – مەيىرىم سيمۆولى, تولستوي كىتاپحاناسىنداعى ەكپەرانتو تىلىندەگى كىتاپتار – حالىقتار بىرلىگى سيمۆولى, توماس ەديسون سىيعا تارتقان فونوگراف – پروگرەسس سيمۆولى, ءۇي الاڭىنداعى ۇلكەن ساعات – ۋاقىت سيمۆولى.
ال تولستوي حاتتارىنان تەست ۇيىمداستىرىلعان ەكىنشى جوبادا وقىرمان اۆتوردىڭ ءوزى جازعان حاتتار مەن كەيىپكەرلەرى جازعان حاتتاردى اجىراتادى. ۇلى جازۋشى بار عۇمىرىندا 10 000-نان اسا حات جازىپ, 50 000-عا جۋىق جاۋاپ حاتتار العان. تولستويدىڭ جازىسقان حاتتارى شىعارمالارىنىڭ 90 تومدىق جيناعىنىڭ 30 پايىزىن قۇرايدى. قازىرگىدەي تەحنولوگيا وزا دامىماي تۇرعان سول ۋاقىتتاردا حات الماسۋ شالعايداعى تۆورچەستۆو يەلەرىنىڭ سىر شەرتىسىپ, پىكىرلەسۋلەرىنە ۇلكەن مۇمكىندىك تۋعىزدى. ال بۇگىندە قولمەن جازىلاتىن قاعاز-حاتتار ادامداردىڭ ءبىر-بىرىنە دەگەن سەنىمىنىڭ, ساعىنىشىنىڭ سيمۆولىنا اينالعان سەكىلدى.
