بۇگىندە القاپتاعى ءونىمىن تەگىن بەرۋگە دايىن ديقاندار دا بارشىلىق. قايىرىمدىلىق ۇيىمدارى ارقىلى وڭىرلەرگە جونەلتىپ جاتقاندار دا بار. ال كاسىپكەر حۋسەين بابۋروۆ ديقانداردان 500 توننا ورامجاپىراق ساتىپ الۋعا كەلىسكەن. ءسويتىپ, 200 توننا ءونىمدى جۇك كولىكتەرىنە تيەپ, بەلورۋسسياعا جونەلتتى. ارنايى جۇك كولىكتەرىنە تيەلگەن قىرىققاباتتى بەلارۋس ەلىنە جەتكىزۋگە 5 كۇن كەتەدى ەكەن. ول جاقتاعى قويماعا تۇسكەن قازاقستاندىق ءونىمدى ساۋداگەرلەر وزگە قالالارعا جونەلتەدى. ديقاندار ءۇشىن بۇل دا ۇلكەن دەمەۋ. ويتكەنى شارۋا ورامجاپىراقتى تۇتىنۋعا دايىن كۇيىنە جەتكىزۋمەن قاتار كوكونىس تيەيتىن تراكتور, جۇمىسشىلارعا تولەنەتىن جالاقىنى ەسەپتەگەندە ءار گەكتارعا شامامەن 1 ملن تەڭگە جۇمسايدى ەكەن. شەتەلگە شىعاتىن جۇك كولىكتەرىنىڭ شىعىنى تاعى بار. قىرىققاباتتى تازالاپ, جۇك كولىگىنە قالايتىن جۇمىسشىلاردىڭ كۇندىك جالاقىسى 3000-7000 تەڭگە ارالىعىندا. قىسقاسى, شارۋالار ءۇشىن بىلتىرعىعا قاراعاندا تۇسەتىن كىرىس از. دەگەنمەن, ديقاندار بۇگىنگى جاعدايدا «بارعا قاناعات» دەپ وتىر.
ايتا كەتەلىك, جۇك كولىكتەرىنىڭ جۇرگىزۋشىلەرى شەكارادان ەش كەدەرگىسىز وتەدى. ارينە بارلىق تالاپتار ساقتالا وتىرىپ, ياعني دەنە قىزۋى مىندەتتى تۇردە تەكسەرىلەدى.
تۇركىستان وبلىسى
