بايقاۋدىڭ نەگىزگى ماقساتى – 29 ەلدىڭ, ونىڭ ىشىندە قازاقستان رەسپۋبليكاسىنىڭ ۋنيۆەرسيتەتتەرى ستۋدەنتتەرىنىڭ, زەرتتەۋشىلەرىنىڭ جانە وقىتۋشىلارىنىڭ شىعارماشىلىق شەشىمدەرىن جاساندى ينتەللەكت (جي) نەگىزىندە ءبىلىم بەرۋ سالاسىنا ەنگىزۋ. سۋلەيمان دەميرەل ۋنيۆەرسيتەتىنىڭ (كاسكەلەن ق., قازاقستان) ستۋدەنتتەرى مەن ماگيسترانتتارىنان قۇرالعان كوماندا بايقاۋعا قاتىسىپ, ەكىنشى ىرىكتەۋ كەزەڭىنەن كەيىن فينالعا شىقتى.
4 ادامنان قۇرالعان كوماندا «ەمتيحانداردى باسقارۋدىڭ جەتىلدىرىلگەن جۇيەسى» («Advanced Examination Management System») ۆەب-قوسىمشاسىن ازىرلەدى. قوسىمشا ارقىلى پەداگوگتار ەمتيحان ۇدەرىسىن باسقارا الادى (كەڭەيتىلگەن رەداكتورى بار سۇراقتار مەن جاۋاپتار قىزمەتىن قولدانىپ) جانە ونلاين-ەمتيحاندار قابىلداي الادى. ەمتيحان كەزىندە ۆەب-قوسىمشا ارقىلى تەرەزەلەر اراسىندا اۋىسۋ, كوشىرۋ جانە كىرىستىرۋ سياقتى براۋزەردىڭ قولدانۋ بەلسەندىلىگىن قاداعالاۋعا بولادى. سونداي-اق فوكۋستى, ەموتسيالار مەن قىزىعۋشىلىقتى باقىلاۋعا بولادى. سونىمەن قاتار, جۇيە وقىتۋشىعا ەمتيحان كەزىندە ستۋدەنتتىڭ ءىس-ارەكەتى تۇرالى حاباردار بولۋعا مۇمكىندىك بەرەدى. جۇيە پلاگياتتى انىقتاۋ جانە ونلاين ەمتيحان كەزىندە باسقا كۇدىكتى ارەكەتتەردى بولدىرماۋ ءۇشىن ارنايى قىزمەتىمەن جابدىقتالعان. قوسىمشا ارقىلى ەمتيحان اياقتالعاننان كەيىن جينالعان مالىمەتتەردى (ترەكەرلەردەن) ماشينامەن وقىتۋ الگوريتمدەرىن پايدالانا وتىرىپ تالداۋعا, ۇسىنىمداردى دايىنداۋعا جانە وقۋشىلاردىڭ ۇلگەرىمىن قاداعالاۋعا بولادى.
«جوبا يدەياسى ماعان نۇسقاۋشىنىڭ كومەكشىسى بولىپ جۇمىس ىستەپ, ونلاين-ۆيكتورينانى وتكىزگەن كەزدە كەلدى. سول كەزدە مەن اقىلى پلاگيندى قولداندىم, بىراق ۇمىتتەرىم اقتالمادى, ونلاين ەمتيحاندارمەن مەنىڭ ەكسپەريمەنتىم ءساتسىز بولىپ شىقتى. سوندىقتان مەن ءۇشىن ەمتيحاندى باعالاۋعا بايلانىستى قاعاز جۇمىسىن ازايتۋعا جانە كوشىرۋدى انىقتاي ولاتىن پلاتفورمانى ازىرلەۋ وتە قىزىقتى بولدى. وسى بايقاۋدا ءبىز كوماندامەن «The next AI Guardians» بايقاۋىنا ءوز كونتسەپتسيامىزدى ۇسىنىپ, فينالعا وتتىك» - دەپ كوماندانىڭ مۇشەسى قۇرمانعازى كونگراتباەۆ ءوز اسەرىمەن ءبولىستى.
ىرىكتەۋ كەزەڭىندە قازاقستاندىق كوماندا نورۆەگيالىق قاتىسۋشىلارعا كەڭەس بەرگەن Microsoft-تىڭ تالىمگەرىمەن ۇزدىكسىز جۇمىس ىستەدى. ونىڭ كومەگىمەن كوماندا جوبانىڭ تەحنيكالىق ءبولىمىن دايىنداپ, ءتيىمدى بيزنەس-مودەلدى قۇرىپ, ءوزىنىڭ باسەكەلەستىك ارتىقشىلىقتارىن باعالاپ, نارىققا شىعۋ ستراتەگياسىن قالىپتاستىردى. Microsoft-تىڭ قازىلار القاسىن كونتسەپتسيامەن تانىستىرۋ ونلاين رەجيمدە ءوتتى, ناتيجەسىندە كوماندا فينالعا شىققان التى ۇزدىك كوماندا قاتارىنا كىردى.
قازىر كوماندا مۇشەلەرى فينالعا دايىندالىپ جاتىر, تالىمگەرمەن اپتا سايىن ونلاين كەڭەسىپ, بايقاۋدىڭ فينالىندا جەڭىسكە جەتۋدى جوسپارلاپ وتىر.
AI University Virtual Bootcamp فينالى 2020 جىلدىڭ 18 ماۋسىمىندا ءوتۋى ءتيىس ەدى. الايدا, قازىرگى جاعدايلارعا بايلانىستى ءىس-شارا ونلاين فورماتقا كوشىرىلەدى. فينالدىڭ كۇنى مەن ۋاقىتى بەلگىلەنگەندە, بارلىق 6 كوماندا جوبالارىن ونلاين رەجيمدە قورعايدى.
ء«بىز قازاقستاندىق كوماندانىڭ وسى بايقاۋداعى جەتىستىكتەرىن ماقتان تۇتامىز. ءبىز قورىتىندى كەزەڭنىڭ ءبىر بولىگى رەتىندە جوسپارلانعان ەكى كۇندىك حاكاتوندى ءالى دە وتكىزە الامىز دەپ ۇمىتتەنەمىز, قازىر ول جاعداي جاقسارعانعا دەيىن بەلگىسىز مەرزىمگە كەيىنگە قالدىرىلدى. سول كەزدە بارلىق التى كوماندا ماجارستاندا, بۋداپەشت قالاسىندا وتەتىن فينالعا قاتىسا الادى. ۇيىمداستىرۋشىلار بارلىق قاتىسۋ جونىندەگى شىعىستاردى وزىنە الادى», – دەپ «Microsoft قازاقستان» كومپانياسىنىڭ ءبىلىم بەرۋ سەكتورىنىڭ جەتەكشىسى نۇرلان جانىبەك اتاپ ءوتتى.
